سەرۆکێ پارتیا بزاڤا نەتەوەیی (مەھەپێ) دەولەت باخچەلی دەربارێ پێڤاژۆیا کو وەکی “ترکیەیا بێ تەرۆر” تێ بناڤکرن داخویانیێن نوو و بالکێش دان. باخچەلی دیار کر کو ئەڤ پێڤاژۆ ئێدی بوویە سیاسەتا فەرمی یا دەولەتێ و دەستنیشان کر کو د چارچۆڤەیا ڤێ پێڤاژۆیێ دە رێبەرێ پەکەکێ عەبدوللاھ ئۆجالان (کەسێ ل ئیمرالیێ) دکارە د کۆمیتە و خەباتێن کۆۆردیناسیۆنا سیاسی دە جھ بگرە.
دەولەت باخچەلی بال کشاند سەر کو چ ئاستەنگی د برێڤەچوونا پێڤاژۆیێ دە نینن و تەکەز کر کو ئەڤ گاڤ ب ئاوایەکی ب رێکوپێک و رێکخستی تێن ئاڤێتن. وی دیار کر کو ھەموو شاخێن رێڤەبەری، یاسادانین و دادوەری د ڤێ مژارێ دە د ناڤ کۆۆردیناسیۆنێ دە نە و گۆت: “ئەڤ پێڤاژۆ گەلەکی ب رێکووپێک دمەشە و ترکیەیێ د ڤێ رێیێ دە پێشکەتنەکا گرینگ ب دەست خستیە. د ڤێ تێکۆشین و سیاسەتا نوو دە ب چ ئاوایی پاشڤەچوون یان ژی ڤەگەر تونەیە.”
سەرۆکێ مەھەپێ ب تایبەتی بال کشاند سەر رۆلا ئۆجالان و داخویانیێن وی یێن بەرێ و ئانی زمان کو گرتنا بەرچاڤ یا داخویانیێن 27ێ سباتا 2026ێ دکارە دەریەکی نوو ڤەگرە. باخچەلی دەستنیشان کر کو د چارچۆڤەیا پێڤاژۆیا ئاشتیێ دە خەباتا کۆۆردیناسیۆنا سیاسی مافێ کەسێ ل ئیمرالیێ یە و دڤێت جڤاک ب گیانێ براتیێ پشتگریێ بدە ڤێ سیاسەتا دەولەتێ دا کو ترکیە ژ تەرۆرێ ئازاد ببە.
د داویا ئاخاڤتنا خوە دە، باخچەلی پشتگریا خوەیا تام ژ بۆ بریارداریا سەرۆککۆمار راگھاند و بانگ ل ھەموو ئالیان کر کو ژ داخویانی و کریارێن پرۆڤۆکاتیف دوور بسەکنن. وی تەکەز کر: “ئەم خوەدیێ گۆتنا خوە نە و ل پشت ھەموو داخویانیێن کو مە دانە رادوەستن؛ ریا کو مە گرتیە بەر ب ئاشتی و ئارامیێ ڤە دچە.”
