سمکۆ عەبدولعەزیز
مه‌ترسیا مه‌زن ئه‌وه كو جیهان یا به‌رڤ گوهرینێن مه‌زن دچیت و هه‌رێما كوردستانێ هه‌ر لدور خۆ دزڤریت، مینا بونه‌وه‌ره‌كێ گێژ .
د دیروكیدا: گه‌ل هه‌نه گوهرینان دروست دكه‌ن و هنده‌ك هه‌نه خۆ ئاماده دكه‌ن بۆ وان گوهرینان و هنده‌ك هه‌نه پشتى گوهرین دروست دبن و جهێ خۆ دگرن، ژ نوی دزانن كا چ ب سه‌رێ وان هاتیه.
ئه‌رێ هه‌رێما كوردستانێ دكه‌ڤیته كیژ خانه‌یا وان گوهرینان ؟؟؟؟
هه‌مى نیشان به‌ره‌ف هندی دچن كو دەولەتێن رۆژهه‌لاتا ناڤین خۆ ئاماده دكەن و پێنگاڤا دهاڤێژن بوو هه‌بوون و بهێزبوون و پێناسا خۆ د وان گوهرینان دا.
(ئیران، توركیا، ئیسرائیل، ولاتێن كه‌نداڤى) هه‌ر ئێک ژ ڤانا ب شێوه‌یه‌ك ژ شێوەیان هه‌ولا دروستكرنا پێگه‌هێ خۆ دده‌ن.
ئه‌مریكا یا كارى دكه‌ت بۆ دارێشتنا ستراتیجیه‌تا نوى ل رۆژهه‌لاتا ناڤین دا و كاره‌كێ دژوار و خورت ئه‌نجام دده‌ت بۆ بجهئینانا وێ ستراتیجیه‌تێ .
هه‌ر یه‌ك ژ ڤان ولاتان و ئه‌وێن مه ناڤێن وان نه‌ئیناین و به‌رژه‌وه‌ندى هه‌نه ل روژهه‌لاتا ناڤێن گه‌هشتینه وێ باوه‌ریێ گه‌ر د ئاماده نه‌بیت د وان گوهرینان دا دێ بنه بینه‌رێن روویدانا و دیلێن ئه‌نجامێن روویدانا .
دپێڤاژویا وان گوهرینان دا، هه‌رێما كوردستانێ و پارتین سیاسی ل هه‌رێمێ د چ ئاست دانه ؟؟؟
ناكۆكیێن سیاسی گه‌هشتینه گۆپیتکا خۆ و ئه‌ز دشێم بیژم هنده‌ك پارتێن سیاسی مینا سنێلان ره‌فتارێ دكه‌ن و ب تایبەتی (ئێکەتی و ئاینده) ، دیسان ده‌وله‌تا عیراقێ شیایه ب رێكا یاساێن ناڤده‌وله‌تى قه‌یرانا دارایى ب گشتى و مووچێ فه‌رمانبه‌ران ل هه‌رێما كوردستانێ بتایبه‌تى دروست بكه‌ن و حكوومه‌تا كوردى توشی شه‌پرزه‌كرنه‌كا دژوار كریه و عیراق یا به‌رده‌وامه ل سەر زێدده‌كرنا كیشه‌یان بۆ هه‌رێمێ.
ئەڤرۆ حكوومه‌تا هه‌رێما كوردستانێ ل جهێ هندى كو خۆ ئاماده بكه‌ت بو گوهرینێن رۆژهه‌لاتا ناڤین یا كه‌تیه د بابەلیسکا كێشەیێن ناڤخۆ دا، ل ڤێره دا ئه‌م دشێین بێژین كو داگیركه‌رێن كوردستانێ سه‌ركه‌فتینه د ڤێ شه‌رنیخێدا و به‌شه‌كێ هیزێن سیاسی یێن كوردا ئه‌گه‌رن .
د كاودانێن نوكه دا ، گه‌له‌ك جاران هنده‌ك سیاسی هه‌بوونا ڤالاهییا ئه‌سمانى یان هاتنا هێزه‌كا چه‌كدارى بۆ ناڤ هه‌رێمێ دكه‌نه مه‌ترسی لسه‌ر هه‌رێمێ، ڤێ بووچوونێ تا رادەیە‌كێ راستیه‌ك بۆ هه‌یه، لێ ئه‌ڤه نه مه‌ترسیه‌كا ستراتیجیه، به‌لكو مه‌ترسیا ستراتیجى ل هه‌رێمێ ئه‌وه كو هێشتا ئه‌م كوردستانی نه‌بووینه خۆدان یه‌ك گوتارا سیاسی ژ بۆی پارستنا هه‌رێمێ .
ملله‌ته‌كێ شیان هه‌نه كو خۆ ل به‌ر نه‌یاره‌كێ بهێز رابگریت و به‌رخودانێ بكه‌ت و دیروكا كوردان یا پره ژ نموونەیێن به‌رخۆدانێ، لێ ده‌مێ ملله‌ته‌ك دابه‌ش دبیت لسه‌ر چه‌ندین بووچوونێن هه‌ڤدژ و نه‌شێن گوتارا هه‌ڤبه‌ش دروست بكه‌ن، ل وى ده‌مى وى ملله‌تى شیانێن به‌رخودان و خوراگیریێ نامینن به‌رانبه‌ر هه‌ر فشاره‌كا بهیته پێش.
(نەفت و گاز، پێگەها جوگرافی یا کوردستانێ، هێزا پێشمەرگە و پەیوەندییێن نیڤدەولەتی) دبنه شاڤکانیێن سه‌ره‌كی یێن بهێزبوونا هه‌رێما كوردستانی، لێ بێی بڕیارەکا سیاسی یا هەڤبەش و دامەزراوەیێن بهێز، ئه‌ڤ چاڤکانیە دێ بنه ئەگه‌رێن زێده‌بوونا ناکۆکیان و لاواز بوونا هه‌رێمێ .
هه‌بوونا چاڤکانیێن سرووشتى ل هه‌ر ولاته‌كێ، دوو ئاراستەیان بۆ وى ملله‌تى دروست دكه‌ن:
ئاراستێ ئێکێ: دبنه ئه‌گه‌رێ بهێزبوونا وى ولاتى گه‌ر یه‌ك گۆتارا سیاسی ژ بو ده‌رڤه هه‌بیت .
ئاراستێ دویێ: دبنه ئه‌گه‌رێ لاوازییا ولاتى گه‌ر چه‌ندین گۆتارین سیاسی یێن هه‌ڤدژ هه‌بن ژ بۆ ده‌رڤه .
نه‌بخوشحالیڤه ئه‌ڤرۆ هه‌رێما كوردستانی كه‌تیه دناڤ ئاراستیێ دویێ دا، ئه‌ڤە نابیته بانگه‌وازیه‌ك بوۆ پشتگوهاڤێتنا جیاوازییێن سیاسی، نە ژی داخوازییەکە بۆ بێدەنگکرنا ڕەخنەیێ.
بەروڤاژی، جیاوازییا بۆچوونان دشێت ببیتە هێزەکا سیاسی، ئەگەر هەمی لایەن ل سەر پاراستنا بەرژەوەندییێن گشتی ڕێک بکەڤن.
به‌رژه‌وه‌ندێن گشتى دێ هێنه پارستن ده‌مێ بزانن چ بریار ژ ناكکكێن وان گرنگتره .
کوردستان پێدڤی ب ستراتیژییەکا نیشتمانی هەیە کو ب تنێ بۆ ماوێ د ناڤبەرا دوو هەلبژارتنان دا نەبیت، بەلکو بوو داهاتوویه‌كێ چەند دەهەکان ل بەرچاڤ بگریت. ستراتیژییەک کو ئاساییش، پەروەردە، ئابووری، دامەزراوەیێن دەولەتێ و مافێن نەتەوەیی ب ئێک ڤە گرێ بدەت.
دیرۆك هه‌مى گاڤا ده‌رفه‌تان دروست ناكه‌ت، هەندەک جاران دەرفەت بێ دەنگ جهێ خۆ دگریت.
ئەو ملله‌تێ خۆ بۆ داهاتوویێ ئامادە نەکەت، دێ داهاتویه‌ك هێته چێكرن بێى كو وى ملله‌تى رول د چێكرنا وێدا هه‌بیت، مخابنن د دیروكێدا ئه‌ڤ روویدانه چه‌ندین جاران لسه‌ر ملله‌تێ كورد دوباره بوویه .
لدوماهیێ ڤێ پسیارێ بۆ خوێنده‌ڤانا دهێلم و بلا ئه‌و ب كومێنتێن خو به‌رسڤێ بده‌ن:
ئەگەر دەولەتێن دەوروبەرێ مە بۆ سی سالێن داهاتی پلانان دانن، ئەرێ ئەم بۆ سی ڕۆژان پلانا ددانین؟
