سەردانەکەی سەرۆک بارزانی بۆ جزیرەی بۆتان؛ مۆرکردنی ناسنامەیە بۆ کانی کوردایەتی
کوردستان بە دووبەرەکی و شەڕی نێوان حزبەکان بنیات نانرێت، بەڵکوو بە یەکڕیزی بنیات دەنرێت. تاکە ڕێگای سەرکەوتنمان گەڕانەوەیە بۆ “ڕێگای هەقێقەت” کە لەبەرچاوگرتنی بەرژەوەندیی گشتییە نەک تاکەکەسی.
✍️ سمکۆ عەبدولعەزیز
سەردانەکەی جەنابی سەرۆک مەسعوود بارزانی، ڕێبەری کوردان بۆ جزیرەی بۆتان لە دەڤەری شێرناخ، تەنیا گەشتێک یان سەردانێکی ئاسایی نەبوو، بەڵکوو “بانگەوازێک” بوو بۆ سەلماندنی هەبوونی ئێمە لەسەر ئەم خاکە پیرۆزەدا.
کاتێک باسی جزیرەی بۆتان دەکەین، باسی لە دڵ و جەرگی مێژووی خۆمان دەکەین؛ ئەوێ زێدی میربەدرخانە، لانکەی ئەدەبییاتی کلاسیک و سۆفیگەریمانە و بەهێزترین کلیلی ناسنامەکەمانە.
کاتێک ڕێبەرێکی کورد پێی دەخاتە سەر ئەو خاکەی کە دەیان ساڵە هەوڵدەدەن ڕەنگی کوردانەی پێوە نەهێڵن، ئەمە لەخۆیدا گەورەترین نیشانەی سەروەرییە.
بۆ ئێمە جزیرەی بۆتان پارچە زەوییەک نییە، بەڵکو بەڵگەنامەی تاپۆکردنمانە.
کاتێک جەنابی سەرۆک بە کوردی قسەی دەکرد و لەو هۆڵەدا ناوی پیرۆزی “کوردستان”ی دەهێنا، وەک ئەوە وابوو ڕۆحێکی نوێی بە جەستەی نەتەوەیەک بەخشی.
لەو شوێنەی کە زمانەکەمان قەدەغە کرابوو، سەرۆک بارزانی بە کوردی قسەی کرد، سنووری ترسی شکاند و سەلماندی کە پێش ئەوەی خاک ئازاد بکرێت، دەبێت بیرۆکە و زمانەکان ئازاد بکرێن.
چونکە هیچ نەتەوەیەک بە تانک و تۆپخانە لەناو ناچێت، بەڵکو بە لەدەستدانی زمان و کولتوورەکەی، کۆتایی پێدێت.
کاتێک باسی مەلای جزیری کرد و گوتی “ئەستێرەیەکە کە هەرگیز ئاوا نابێت”، ئەوە پەیامێک بوو کە ئێمە میللەتێکی بێ ڕەگ و ڕیشە نین.
مەلای جزیری تەنیا شاعیر نەبوو، بەڵکوو سەرچاوەی مەعریفەی کورد بوو.
هێنانی ناوی مەلای جزیری بە واتای وروژاندنی ڕۆحی نەتەوەیی بوو بەرامبەر هەموو ئەو هزرە ڕزاوانەی کە دەیانویست کورد لە بنەچەی خۆی دوور بخەنەوە.
گرنگترین خاڵ ئەوەیە کە کاتێک جەنابی سەرۆک قسەکانی مەلا جزیری دووبارە کردەوە کە دەڵێ: “رێگای هەقێقەت یەکە”، ئەمە دەرمانی ساڕێژکردنی برینە ناوخۆییەکانمانە.
پەیامەکە ئەوەیە کە کوردستان بە دووبەرەکی و شەڕی نێوان حزبەکان بنیات نانرێت، بەڵکوو بە یەکڕیزی بنیات دەنرێت. تاکە ڕێگای سەرکەوتنمان گەڕانەوەیە بۆ “ڕێگای هەقێقەت” کە لەبەرچاوگرتنی بەرژەوەندیی گشتییە نەک تاکەکەسی.
هەروەها دەرکەوتنی سەرۆک بارزانی بە جلی کوردی و جامەدانی سوورەوە لە جزیرەی بۆتان وەک بەرزکردنەوەی ئاڵای کوردستان بوو بە بێ ئەوەی کە ئاڵایەک بە دەستەوە بێت. خودی ئەو جلوبەرگە، شوناسی ئێمە و شۆڕشەکەمان دەبووژێنێتەوە. نیشاندانێک بوو کە “ئێمە خاوەنی ئەم خاکەین، میوان نین”.
بە کورتی و کورمانجی؛ ئەم سەردانە پەیامێک بوو بۆ هەموو دۆست و دوژمنان کە:
کورد نەتەوەیەکی زیندووە و خاوەن خاک و مێژوو و شارستانییەتە.
دۆزی ئێمە، دۆزی کەمینەیەک نییە کە بە چەند مافێکی بچووک ڕازی ببێت، بەڵکوو دۆزی گەلێکە کە دەبێت بە مافە سروشتییەکانی خۆی بگات.
هەروەک چۆن سەرۆک پیشانیدا، کوردستانی گەورە لە سەری ئێمە و لە هزر و بیروباوەڕەکانماندا بنیات دەنرێت، پاشان لەسەر جوگرافیای جیهان دەنەخشێنرێت.
ئەمەش مانای ئەوەیە کە ئایندە بە دیاری نانەخشێندرێت، بەڵکوو بە ئیرادە و هۆشیاری خۆمان دەتوانین داهاتووی خۆمان لە دەستی خۆماندا ڕابگرین.
