سەرۆک بارزانی لە نێوان سیاسەت، شوناس و ڕۆشنبیریدا
بارزانی بە جەختکردنەوە لەسەر میراتی ئەدەبی و کولتووریی کورد، لە ڕاستیدا هەوڵدەدات شوناسی نەتەوەیی لەگەڵ پڕۆژەیەکی کۆمەڵایەتی-سیاسیدا تێکەڵ بکات.
دوێنێ چوارەمین سیمپۆزیۆمی مەلای جزیری لە شارۆچکەی جزیرەی بۆتان کە دەکەوێتە پارێزگای شێرناخ لە باکووری کوردستان، بەڕێوەچوو. سەرۆک بارزانی لە سیمپۆزیۆمەکەدا بەشدار بوو کە بە جۆش و خرۆشێکی زۆرەوە لەلایەن خەڵکی بۆتانەوە پێشوازیی لێکرا و وتارێکی بەنرخی لەم سیمپۆزیۆمەدا پێشکەش کرد.
ناساندنی مەلا جزیری و “سیمپۆزیۆمی مەلا جزیری”
مەلا جزیری کە ناوی تەواوی مەلا ئەحمەدی جزیرییە، یەکێکە لە شاعیر و بیرمەندە بەناوبانگەکانی ئەدەبی کلاسیکی کوردی و کۆمەڵێک بەرهەمی قووڵی عیرفانیی و ئەدەبیی بە تایبەتی لە شیعری کوردیدا بە شێوەزاری کرمانجی خوڵقاندووە.
“سیمپۆزیۆمی مەلای جزیری” کۆنفرانسێکی نێودەوڵەتییە کە بۆ هەڵسەنگاندن و لێکۆڵینەوە لە بەرهەم و بیرۆکە و زمان و میراتی ئەدەبی و کولتووری مەلای جزیری بەڕێوەدەچێت؛ توێژەران و نووسەران و ئەکادیمیستەکان و کەسایەتییە فەرهەنگییەکان لە هەموو جیهانەوە بەشداریی تێدا دەکەن و بابەت و لێکۆڵینەوەکان لەسەر ژیان و شیعر و ڕامان و کاریگەریی مەلای جزیری پێشکەش دەکرێن.
گرنگی بەشداریکردنی سەرۆک مەسعوود بارزانی لەم سیمپۆزیۆمەدا لە چەند لایەنێکەوە دیارە:
1- بەهێزکردنی لایەنی چاندی-سیمبۆلیک: کاتێک کەسایەتییەک بە سەنگی سیاسی و کۆمەڵایەتی تایبەتەوە وەک سەرۆک بارزانی بەشداری کۆنفرانسێکی چاندی-ئەدەبی دەکات، تەنیا بە مانای بەشداریکردنی تاکێک نییە، بەڵکوو بە مانای پاڵپشتیی سیاسی بۆ دووبارە لێکدانەوە و زیندووکردنەوەی میراتی ئەدەبی و کولتووری کورد دێت. ئەمەش گرینگیدان بە شوناس و مێژوو و کولتووری کورد لە گۆڕەپانی گشتی و سیاسیدا نیشان دەدات.
2- پەیوەندی نێوان سیاسەت و ڕۆشنبیری: لە ناوچەیەکدا کە پرسە نەتەوەیی و ناسنامە و مێژووییەکان زۆر هەستیارن، بەشداریی سیاسەتمەدارێکی باڵای وەک بارزانی لە کۆنفرانسێکی ئەدەبی-مێژووییدا دەتوانێت پەیامێک بێت سەبارەت بە پێویستی گرنگیدان بە میراتی هاوبەش و دیالۆگی نێوان نەوەکان و جەختکردنەوە لە یەکڕیزی کولتووری لە چوارچێوەی کوردایەتیدا.
3- هەڵسەنگاندنی سیمپۆزیۆمەکە: سەرۆکی زانکۆ و ڕێکخەرانی سیمپۆزیۆمەکە بوونی سەرۆک بارزانییان بە “سەرچاوەی شەرەف و پێزانین” بۆ سیمپۆزیۆمەکە وەسف کرد، بۆیە ئامادەبوونی سەرۆک بارزانی زیاتر سەرنجی میدیاکانی بۆ ئەم کۆبوونەوەیە ڕاکێشا و ئاستی کۆنفرانسەکەی بەرزتر کردەوە.
4- نیشاندانی یەکڕیزی کولتووری لە هەر چوار پارچەی کوردستان: جزیرەی بۆتان ناوچەیەکی هەستیارە؛ حزووری بارزانی لەوێ، زیاتر لە بواری لێکۆڵینەوەوە، هەڵگری پەیامێکی سیاسی-فەرهەنگییە بۆ کۆمەڵگەی کوردی لە هەر چوار پارچەی کوردستان، بوونی سەرۆک بارزانی جەخت لەسەر ڕەگ و ڕیشە و یەکڕیزی شوناس و لێکگرێدراوبوونی کوردان دەکاتەوە.
بارزانی بە جەختکردنەوە لەسەر میراتی ئەدەبی و کولتووری کوردی، لە ڕاستیدا هەوڵدەدات شوناسی نەتەوەیی لەگەڵ پڕۆژەیەکی کۆمەڵایەتی-سیاسیدا تێکەڵ بکات؛ ئەم پێکەوەبوونە دەتوانێت ببێتە هۆی سەقامگیری کۆمەڵایەتی و چەسپاندنی ناسنامە لە نێوان کوردەکاندا.
سەرۆک بارزانی بەم بەشدارییە، پەرسپەکتیڤێکی لە دەرەوەی سیاسەتی سادە پێشکەش دەکات؛ واتە پڕۆژەیەکی شوناس-فەرهەنگی بۆ ئایندەی کوردستان پێشکەش دەکات کە تیایدا کولتوور و ئەدەب و میراتی هاوبەش ڕۆڵی سەرەکی دەگێڕن.
جگە لەوەش ئەم بەشدارییە دەتوانێت ببێتە هۆی بەهێزبوونی بزووتنەوە فەرهەنگی و لێکۆڵینەوە و ئەدەبییەکان لە نێو لاوان و ئەکادیمی و نووسەرانی کورددا؛ واتە بارزانی وەک ئاسانکارێک نەک تەنها دەسەڵاتی سیاسی، بەڵکو فەزای کولتووری و فیکریش چالاک دەکات.
ئامادەبوونی سەرۆک مەسعوود بارزانی لە سیمپۆزیۆمی مەلای جزیری زیاترە لە بەشدارییەکی سادەی تاکێک لە کۆنفڕانسەکەدا، بەڵکوو لە ڕاستیدا بانگەوازێکە بۆ هۆشیاریی کولتووری و پەیامێکی ناسنامەییە. بیرخستنەوەیەکە کەوا ئەدەبی کوردی و میراتی هاوبەشی کورد خاڵی لێکنزیکبوونەوەی مێژوو و شوناس و سیاسەتە. ئەم ڕووداوە دەتوانێ چەخماخەیەک بێت بۆ زیندووکردنەوەی ئەدەبیاتی کلاسیکی کوردی، لێکۆڵینەوە لە سەر ناسنامەی کورد و دووبارە خوێندنەوەی مێژوو، نەک هەر وەک میراتێک لە ڕابردوودا، بەڵکوو وەک بناغەیەک بۆ داهاتوو.
