نەخشەڕێگای نوێی ئیمرالی ئاشکرا بوو؛ لە چەکدانانەوە تا پەنابەربوونی 200 سەرکردەی پەکەکە
ئەو گەریلایانەی پەکەکە کەوا دەیانهەوێ چەک دابنێن و بگەڕێنەوە بۆ تورکیا، دەتوانن لە ماوەی یەکساڵدا داواکاری پێشکەش بکەن.
لە چوارچێوەی پێشهاتەکانی پرۆسەی ئیمرالیدا، ڕەشنووسی یاسایەکی چوارچێوەیی ئامادەکراوە کە 9 خاڵ لەخۆی دەگرێت. بەگوێرەی ئەو پێشنیازە، ماوەی یەک ساڵ کات دەدرێتە ئەو گەریلایانەی پەکەکە کە چەکەکانیان ڕادەست بکەن، هاوکات بڕیاری قەدەغەکردنی چالاکیی سیاسی بۆ ماوەی 5 ساڵ بەسەریاندا دەسەپێندرێت.
دوابەدوای زنجیرەیەک کۆبوونەوەی نێوان دەزگا ئەمنییەکانی تورکیا و عەبدوڵا ئۆجەلان سەرۆکی بەندکراوی پەکەکە و سەرکردایەتی پەکەکە، پڕۆژە یاسای چەکدانانی پەکەکە و چارەنووسی سەرکردەکانی ئەو حیزبە داڕێژراوە.
میدیاکانی تورکیا ئەمڕۆ سێشەممە 2/6/2026، چەندین وردەکاری و خاڵەکانی ئەم پڕۆژەیاسایەیان بڵاوکردەوە، کە بەسەر سێ تەوەردا دابەشکراون:
دۆسیەی گەڕانەوەی گەریلاکان بۆ تورکیا: ئەو چەکدارانەی کە دەیانهەوێ چەک دابنێن و بگەڕێنەوە خاکی تورکیا، مافی ئەوەیان دەبێت بۆ ماوەی یەک ساڵ داواکاری پێشکەش بکەن.
دۆسیەی کادیرانی بەڕێوەبەریی: پێشبینی دەکرێت نزیکەی 200 کەس لە کادیرانی بەڕێوەبردنی ڕێکخراوی پەکەکە، لەبری تورکیا ڕەوانەی وڵاتانی سێهەم بکرێن.
قۆناغی یاسایی دوای هەڵوەشاندنەوە: دەقە یاساییەکان، شێوازی لێپرسینەوە، لێکۆڵینەوە و دادگاییکردنی ئەندامانی پەکەکە، دوای قۆناخی هەڵوەشاندنەوەی فەرمیی پەکەکە دیاری دەکرێن و ڕوون دەکرێنەوە.
