جەسەدێ دامەزرینەرێ کۆلاڤ سپی یێن سووریێ ل ئیستەنبۆلێ هات دیتن

چاڤکانیان ل ترکیێ راگهاند کو جەسەدێ جیمز لامژرار، دامەزرینەرێ بەریتانی كو گرۆپا «بەرەڤانیا مەدەنی ئا سووریێ» یا بەرنیاس ب «کۆلاڤ سپی یێن سوریێ»  د ناڤا مالا وی دە ل ئیستەنبۆلێ هات دیتن.

رۆیتەرزێ ئەڤ نووچەیە ژ زارێ یەک ژ هەڤسۆیێن جیمز لامژرار هەر وها ژ زارێ دیپلۆماتکارەکێ بەلاڤکر، و مەدیایێن ترکیێ ژی بال کشاندە سەر نووچەیا کوشتنا جیمز.

رۆیتەرزێ ژ زارێ یەک ژ دیپلۆماتکاران دا زانین کو تا نها سەبەبا کوشتنا جیمز دیار نینە، لێ بەلێ هنەک مەدیایان راگهاندیە کو جیمز ژ بالەکۆنا شوقەیا خوە کەتیە، ئەڤ یەک ژی هاتیە راگهاندن کو دبە وی ب خوە، خوە کوشتبە.

جیمز، وەزیفەدارێ بەرێ یێ سازیا ئیستیخباراتی یا بەریتانیا بوو، کو گرۆپا «میدی ریسکیۆ» ژی دامەزراندبوو، ڤێ گرۆپێ بەرپرساتیا پەروەردا خوەبەخشێن کۆلاڤ سپیان هەبوو.

چالاکیێن کۆلاڤ سپیان وەکە گرۆپەکە ئالیکاری کرن و رزگارکرنێ د سووریێ دە ل سالێن رابووری دە کارڤەدانێن جوودا هەبوون ژ ئالیێ دەولەتێن جیهانی.

دەولەتێن رۆژئاڤا و دژبەرێن رەژیما بەشار ئەسەد پشتەڤانیا ڤێ گرۆپێ دکر، لێ بەلێ هکوومەتا سووریێ و هەڤپەیمانێن وێ وەکە رووسیێ ئەڤ گرۆپە ب سیخۆری کرنێ و پەیوەندی کرن ب تەرۆریستان سووچبار دکر.

ڤێ گرۆپێ ل سالا 2014ان دە دەست ب کارێ خوە کریە و بەهرا پێتێر چالاکیێن وان ل وان ناڤچەیان بوو کو ژ ئالیێ هکوومەتا سووریێ و رووسیێ دهاتنە بۆمبە باران کرن.