سووریێ تێکلداری گەفا ترکیێ بۆ ئێریشکرنا سەر رۆژئاڤایێ کوردستانێ داخویانی دا

وەزارەتا دەرڤە یا سووریێ تەڤگەرێن لەشکەری یێن ترکیێ ل سەر سینۆرێ ھەڤبەشێ لگەل سووریێ دا وەک کارەکێ دژمنانە ب ناڤ کر و رەد کر.

ل گۆر ئاژانسا فەرمی یا دەولەتا سووریێ «سانا»، چاڤکانیەکێ بەرپرس ژ وەزارەتا دەرڤەیا سووریێ راگھاندیە، سووریا کریارێن لەشکەری و دژمنکارییێن ھێزێن ترکیا یا داگیرکەر د چەند رۆژێن بۆری دا ل دژی ناڤچە و گوندێن باکورێ رۆژھلاتێ سووریێ پێک ئانیە، رەد دکە.

ھەمان چاڤکانیێ دیار کریە، ژ بەر تەڤگەرێن لەشکەری یێن ترکیێ یێن ل سەر سینۆر و د ناڤ ئاخا سووریێ دا خەلکێ سڤیل دبن قوربانی و دەربەدەر دبن.

چاڤکانیێ ژ وەزارەتا دەرڤەیا سووریێ ھەروھا گۆتیە، کارێ ترکیێ بۆ ئاڤاکرنا ناڤچەیەکا ئارام د ناڤا سینۆرێن سووریێ دا، “پاقژکرنا ئەتنیکی و ئەردنیگارییە.”

ل گۆر سانایێ، چاڤکانیێ وەزارەتا دەرڤەیا سووریێ دبێژە، “تشتا کو رەژیما ترکیێ ژ بۆ ئاڤاکرنا ھەرێمەکا ب ناڤێ “ھەرێما ئەولە” ل سەر ئاخا سووریێ دکە، کریارەکە شەرمەزار و دژمنکارییە و بەشەک ژ سیاسەتا پاقژکرنا ئەتنیکی و ئەردنیگارییە کو ژ ئالیێ حکوومەتا رەجەپ تەییب ئەردۆگان ڤە ل ھەرێمێن سووریێ یێن داگیرکری تێ مەشاندن، کو توانێن شەری و تاوانێن ل دژی مرۆڤاھیێ نە.

 ترکیا گەفان دکە کو دێ د دەمەکێ نێزیک دا ئۆپەراسیۆنەکا نوو ل دژی رۆژئاڤایێ کوردستانێ دەست پێ بکە. سەرۆککۆمارێ ترکیێ رەجەپ تەییب ئەردۆگان دوھ یەکشەمبێ 29ێ گولانا 2022یێ گەفا خوەیا ل دژی رۆژئاڤایێ کوردستانێ دوبارە کر و راگھاند، “ل باکورێ سووریێ بچووکترین گەف دژی ترکیا بهێتە دیتن ئەم دێ ب دژواری بەرسڤ بدن.”

ئەردۆگان رۆژا 23یێ گولانا 2022یێ د داخویانیەکێ دا بۆ مەدیایێ گەف کربوو کو ئەو دێ ئۆپەراسیۆنەکا نوو ل دژی رۆژئاڤیێ کوردستانێ بدن دەستپێکرن و تەکەز کربوو، ئەو دێ دەربارێ ئۆپەرسیۆنێ دا د جڤینا داھاتی یا ئەنجوومەنا ئاساییشا نەتەوی یا ترکیێ دا بریارا خوە بدن.

رۆژا پێنجشەمبێ 27ێ گولانێ ژی ئەنجوومەنا ئاساییشا نەتەوی یا ترکیێ ب سەرپرەشتیا ئەردۆگان جڤیا و تەکەزی ل سەر پێویستیا ئۆپەراسیۆنێن ئارتێشا ترکیێ ل سینۆرێن باشوورێ وی وەلاتی کر، لێ د داخویانیا وێ دا ب زەلالی ئاماژە ب چ ئۆپەراسیۆنەکا نوو یا ترکیێ ل دژی رۆژئاڤایێ کوردستانێ نەھات کرن.