دووران كالكان: ئەولەهییا ترکیێ ژ ئالیێ سەرۆک ئاپۆ ڤە تێ مسۆگەر کرن!
دووران كالكان، سەرکردەیێ پهكهكێ بەشداری «مەدیا هابەرێ» بوو و داخویانیێن گرنگ دان، كالكان نرخاندنێن خوە ل سەر بوویەرێن رۆژانە کرن.
كالكان كو ئەندامەکێ دامەزرینەر یێ پهكهكێ یه، وی د ئاخافتنا خوه دا وەک ئەندامهكێ ئاکادیمییا زانستێن جڤاکی بەحسا ئۆجالان کر.
پشتی پێڤاژۆیا کو ژ ئالیێ ئۆجالان ڤە هاتیە دەستپێکرن و هلوەشاندنا پهكهكێ، د ناڤەرۆک و شێوەیێ بەشداربوونا تەلەڤیزیۆنی یا رێڤەبەرێن پهكهكێ دا، گوهەرینەکا گرنگ چێبوویە. ل شوونا شرۆڤەیێن سیاسی، ئەو نها زێدهتر ل سەر پەسنا رۆلێ ئۆجالان و نرخاندنێن وی رادوهستن.
كالكان د تەڤاهییا ئاخفتنا خوە دا بانگ ل ترکیێ کر، ب نەرمی پەسنا باخچهلی كر و ب نەرمی گەف ل وان کەسان كرن یێن کو رەخنێ ل ئۆجالان دکهن. هەروهها وی بانگ ل دەولەتێ کر ل دژی کەسێن كو رەخنێ ل ئۆجالان دكهن، هەلوەستی وهربگریت.
كالكان ل سەر هێرشا ئیسرائیل و ئامەریکا یا ل سەر ئیرانێ ژی شرۆڤە کرن و دیار کر هەر چەنده ئەو “ل دژی شەری” بوون ژی، وان ب نەرمی پاراستنا ئیرانێ کرن و بەحسا پاراستنا یەکپارچەییا ئاخا ئیرانێ کر.
د ئاخفتنا خوە دا، وی گەف ل هەموو کەسێن کو رەخنێ ل ئۆجالان دكهن كرن و دیار کر کو پێڤاژۆیا كو ژ ئالیێ ئۆجالان ڤە هاتییە دەستپێکرن ترکیێ ل سەر پییان دهێلیت.
خالێن سەرەکی یێن کو د داخویانیا كالكان دا هاتینە دەستنیشانکرن ئەڤ بوون.
كالكان: پێڤاژۆیا کو ژ ئالیێ رێبەر ئاپۆ ڤە هاتیه پێشئێخستن، ئەولەهییا ترکیێ مسۆگەر دکەت
كالكان د ئاخفتنا خوە دا بەحسا ناکۆکیێن ل ئیران و رۆژهلاتا ناڤین ژی کر و دیار کر کو ئۆجالان ترکیێ ژ ئالۆزییان دپارێزیت و وێ یەکگرتی و ل سەر پییان دهێلیت.
كالكان گۆت: ترکیه نه ب مووشەکێن ناتۆیێ تێ پاراستن، لێ ب رێیا ئۆجالان تێ پاراستن و وهها بهردهوام كر: “ئەولەکارییا ترکیێ ب پێڤاژۆیا ئاشتی و جڤاکا دەمۆکراتیک تێ مسۆگەر کرن. رێبەر ئاپۆ وێ مسۆگەر دکەت. ئەڤ یەک پر ئاشکەرە بوویە. مەزناهی، جدیبوون و نێزیکتییا خەتەرەیان ئاشکەرایە. ل ترکەیێ هەر کەس ڤێ یەکێ قەبوول دکەت. رەوشا رۆژهلاتا ناڤین ژی زەلالە. میناک، ل سەر ترکیێ هن گەف هەنە، لێ دیسا ژی، ل گۆری هاویردۆرا رۆژهلاتا ناڤین، ترکییە هەری ئارام و ب خوەباوەر دژیت. ب خێرا چ؟ ب خێرا پێڤاژۆیا ئاشتی و جڤاکا دەمۆکراتیک یا کو ژ هێلا رێبەر ئاپۆ ڤە هاتی پێشئێخستن.”
دووران كالكان بانگ ل دەولەتێ کر کو ئۆجالانی بپارێزیت
كالكان د ئاخافتنا خوە دا دیار کر کو زێدهباری رۆلا ئۆجالان د پاراستنا ترکیێ دا، هێژ ژی کەس د ناڤ ترکیێ دا هەنە کو رەخنێ ل وی دکهن و گۆت، “هن كهس هێژ ژی حەقارەتێ ل ئۆجالان دکهن، پێڤاژۆیێ رەخنە دکهن. ب راستی ژی ئەڤ یەک مە بێزار دکەت. مرۆڤ دشێت بێژێت ئەڤ کەسه، نزانن یان ژی فێم ناکهن.”
كالكان بانگ ل ئاكهپێ و مهههپێ کر و ژ وان خواست ل دژی کەسێن کو رەخنێ ل ئۆجالان دكهن شەری بکهن.
وی هەروهها دیار کر: “ل دژی ڤان کەسان تێکۆشینەکا كێم هەیە. میناک، هن دەردۆر، تایبهت یێن د دەستهلاتداریێ دا، دەما کو تشتەک كارتێكرنێ ل وان دکەت، قییامەتێ رادکهن. ئەو پرسگرێکان ئانالیز دکهن و چارەسەرییان پێشکێش دکهن. لێ ئەو ل هەمبەر حەقارەتێن ل دژی کەسەکی کو گاڤێن ئەوقاس گرنگ هاڤێتنە و پێڤاژۆیێن ژ بۆ پاشەرۆژ و ئەولەهییا ترکیێ پێشئێخستنە بێدەنگن. ئەڤ بێدەنگیه هێڤی و باوەریێ ددهته ڤان دەردۆرێن نهژادپەرەست، شۆڤینیست و فاشیست.”
كالكان: ژ بۆ پاراستنا ترکیێ دڤێت ئۆجالان بهێته ئازادکرن
كالكان گۆتنێن بالکێش د داخویانیا خوە دا دەربارێ پرسگرێکا کورد کرن . وی کریارێن دەولەتێ یێن ب سالان ل دژی کوردان نە وەکی کۆلۆنیالیزم ئان بنپێکرنا مافان، لێ تەنێ وەکی “شاشی” ب ناڤ کرن.
كالكان بەشەکێ گرنگ ژ ئاخافتنا خوە ژ بۆ داخوازا ئازادکرنا ئۆجالان تەرخان کر و گۆت، “دڤێت گاڤێن ب راستی بریاردار بهێنه هاڤێتن دا کو رێبەر ئاپۆ بشێت ب ئازادی بژیت و كار بكهت. پاشەرۆژا ترکیێ، ئەولەهییا وێ، هەر تشت ب پێڤاژۆیا ئاشتی و جڤاکا دەمۆکراتیک یا کو ژ هێلا رێبەر ئاپۆ ڤە هاتیه پێشئێخستن ڤە گرێدایی یە. گەر شەرتێن ئۆجالان باشتر بکهن، ئەو دشێت هێژ چێتر خزمەتا دەولەتا ترکیێ بکەت».
كالكان: دڤێت شەرت و مەرجێن ڤەگەرا مالێ بهێنه ئافراندن
كالكان ل سەر مەرجێن داکەتنا گەریلا ژ چیایان ژی شرۆڤە کرن. وی دیار نەکر کو ئەو چ دخوازن، لێ ب گشتی بەحسا “قانوونێن ئازادیێ” کر و گۆت: “دڤێت قانوونێن ئازادیێ بهێنه دانان. پێدڤییه چارچۆڤەیەکێ یاسایی بهێته دامەزراندن؛ ئەم ئامادەینە. لێ ئەم نەئامادەینە بێیی کو چارچۆڤەیەکێ یاسایی هەبیت بێژین وەرن خوە ئینتحار بکهن”.
كالكان: پێدڤییه ل ئیرانێ، ترکیە بەردەڤکا کوردان بیت
بەشەکێ دی یێ ئاخفتنا كالكان ل سەر ئۆپەراسیۆنێن ل ئیرانێ بوو. كالكان دیار کر کو ئەو ل دژی شەرێ ل ئیرانێ نە و گۆت: ئۆپەراسیۆن ئارمانج دکەن سەروەرییا ئیرانێ و ترکیێ تێک ببەن. وی هەروهها پرسی، “گەر ئیسرائیل و ئەمەریکا ب سەر بکەڤن دێ چ ب دەست ئێخن؟”
كالكان هەروهها ئیدیعا کر کو ل ئیرانێ د ناڤبەرا ئازەری و کوردان دا پرسگرێک نینن و گۆت، “دڤێت هێزێن دەمۆکراتیک یێن ئیرانێ و هێزێن وەلاتپارێزێن ئازادیخوازێن کوردستانێ د پهیوهندی و هەڤپەیمانیێ دا بن. ب رایا مە، ئەڤه تشتێ راستە. ژ بەر کو دڤێت ب رێیا دەمۆکراتیککرنا ئیرانێ بهێته چارەسەر کرن. ژ بۆ ڤێ یەکێ، هێزێن دەمۆکراتیک یێن ئازادیخواز و هێزێن سیاسی یێن ل ئیران و کوردستانێ ب هەڤ را كار دكهن، د هەڤپەیمانیێ دا نە. ئەڤ شیرەتا مەیه بۆ وان. پێدڤییە کو ئەو ژ نێزیکاتیێن نەتەوەپەرەست، دەولەت-نەتەو دوور براوهستن. دڤێت ئەو ل ئالیێ خهلكی بن. دڤێت ئەو ل ئالیێ یەکێیتی و دەمۆکراسیێ بن.”
كالكان هەروهها گۆت کو دڤێت ترکیە ل ئیرانێ پارێزڤان و بەردەڤکا کوردان بیت. وی هەروهها دیار کر کو کوردان چ لێگەرینێن دن نینن و گۆت، “کورد ل ئیرانێ خرابیان ناکهن.”
