ل گۆری ئاگاھیێن کو مالپەرا “دارکا مازی” ژ چاڤکانیێن ئاگاھدار یێن ھەرێمی وەرگرتنە، د ڤان مەھێن داوی دە تەڤگەر و گەشەدانێن گرینگ دەربارێ گەندەلی، دەرباسکرنا مادەیێن قاچاخ و ئالۆزیێن د ناڤ رێزێن لیوایا 30 یا حەشدا شەعبی دە ل سینۆرێ دەشتا نەینەوایێ ھاتنە تۆمارکرن.

رێدانا ب بارهەلگرێن مادەیێن ھۆشبەر

ل گۆری ئاگاھیان، ل مەھا گولانا 2026ێ، بەرپرسێ ئەولەھیا لیوایا 30 «عەلی ئەل-تەویل» ھاتبوو ئاگاھدارکرن کو ترومبێلەکا باری یا تژی حەبێن بێهۆشکەر د خالا کۆنترۆلێ یا «گوێر» را بەر ب باژارێ مووسلێ ڤە برێ کەتیە. ھات دیارکرن کو ب فەرمانا راستەراست و ب رێیا تەلەفۆنێ ژ ئالیێ راوێژکارێ فەرماندارێ لیوایا 30 «بشار بەکتاش تورکۆمانی» ڤە، رێ ژ بۆ ڤێ ترومبێلێ ھاتبوو ڤەکرن.

پشتی دەرباسبوونا ترومبێلێ، فەرماندارێ ئۆپەراسیۆنێن حەشدا شەعبی ل نەینەوایێ «سەیید خزیر ئەل-مەترووحی» دەربارێ مژارێ دە لێکۆلین دا دەستپێکرن. د ھەمان پێڤاژۆیێ دە، بەرپرسێ ئەولەھیێ «عەلی ئەل-تەویل» ژ ئالیێ بەرپرسێ ھەوالگیریا حەشدا شەعبی ل نەینەوایێ «شوعەیب عەبدولکەریم خدر» بەرنیاس ب «ئەبۆ یاسین ئەل-شەبەکی» ڤە بۆ چەند رۆژان ھاتە گرتن. زانیاریێن نەفەرمی دیار دکن کو «عەلی ئەل-تەویل»، لگەل بەرپرسێ یەکەیا K9 «سەفوان فەیسەل زەیدان و بشار بکتاش»، ل بەرامبەری دەرباسکرنا وێ ترومبێلێ 70 ملیۆن دینارێن ئیراقی ژ خودانێ باری وەرگرتنە.

پێلا سزادان و گوھەرینێن ئیداری د سەرێ مەھا خزیرانێ دە

ل دەستپێکا مەھا خزیرانا 2026ێ، «سەیید خزیر ئەل-مەترووحی» ب ئاگاھداریا دەستەیا گشتی یا حەشدا شەعبی ل بەغدایێ گەلەک بریارێن گرێدایی گوھەرین و ڤەگوھاستنا بەرپرسێن لیوایا 30 یا حەشدا شەعبی ئیمزا کرنە:

• ڤەگوھاستنا بۆ یەکەیێن دن (وەک چەکدار): بەرپرسێ بەرێ یێ ئەولەھیێ موشتەبا بەکتاش، بەرپرسێ K9 سەفوان فەیسەل زەیدان، جیگرێ ھەوالگیریێ عەبدوللاھ وەحش، بەرپرسێ جەردەڤانان عەلی حەیدەر مستەفا (عەلا ئەبۆ ئەل-وروود) و بشار بەکتاش تورکۆمانی بۆ فەرمانداریا ئۆپەراسیۆنێن دیالایێ ھاتن ڤەگوھاستن. ھەر وھا بەرپرسێ نڤیسگەھا فەرمانداریێ زەین ئەل-عابدین سالم ژ کارێ وی ھاتە دوورخستن.

• دامەزراندن و دانانێن نوو: عەلی ئەیووب خدر ئەل-شەبەکی وەکی بەرپرسێ نوویێ ئەولەھیێ و محەمەد عەمەش ئەل-شەبەکی وەکی بەرپرسێ ھەوالگیریا لیوایا 30 ھاتن دانان. ھەر وھا ئیسماعیل بوو مەھدی ئەل-شەبەکی، بوویە جیگرێ بەرپرسێ ئەولەھیا (لیوایا 30)، کو دبیتە خوارزایێ وەعەد مەحموود ئەل-قەدوو، دامەزرێنەر و فەرماندارێ بەرێ یێ (لیوایا 30) و ئەندامێ پارلامەنتۆیا نھا یا عیراقێ ل سەر (کۆتایا شەبەکان).

مژارا گەندەلیا دارایی، ئەرد و پەیوەندیێن نەقانوونی

زانیاری دیار دکن کو ل ناڤەراستا مەھا خزیرانێ د ناڤبەرا فەرماندارێ نھا یێ لیوایا 30 محەمەد جەمیل خەدر ئەل-شەبەکی و دامەزرێنەرێ بەرێ یێ لیوایێ و پارلەمەنتەرێ عیراقێ وەعەد قەدوو دە ئالۆزیەکا کوور دەرکەتیە.

ل گۆری داخویانیێن ناڤا جڤینێن گرتی یێن وەعەد قەدوو ب دەست مالپەرا “دارکا مازی” کەتنە:

ل ناڤەراستا مەھا (6/2026) وەعەد قەدوو ل بارەگەھێ خوە ل (کۆمەلگەها تەیبە / بەرتلە) ل جەم محەمەد عارف یووسف قنبر، بەرنیاس ب ئەبۆ لەجین ئەل-شەبەکی، ئەندامێ جڤاتا پارێزگەھا نەینەوا و بەرپرسێ ھەوالگیریا بەرێ یێ (لیوایا 30)، دیار کریە کو نەسریەیا (لیوایا 30)، (210.000.000) دو سەد و دەھ ملیۆن دینارن، لێ محەمەد جەمیل ب ھەماھەنگیا دگەل سەیید خدیر مەترووحی مەھانە (60.000.000) شێست ملیۆن دیناران بۆ خوە دبە.

هەر وەها هات هینبوون کو فەرماندارێ لیوایێ “محەمەد جەمیل” د قاچاخچیتیا ئاژەلان دە بۆ باژارێ ھەولێرێ جھ دگرە. ھەر وھا ب ئالیکاریا فەرمانبەرەکی شارەداریا مووسلێ یێ ب ناڤێ عسمەت، 80 پارچەیێن ئەردی ل دەڤەرا گۆگجەلی وەرگرتنە و ل بەرامبەری 2.500.000  دو ملیۆن و پێنجسەد هەزار دیناران ژ بۆ ھەر کەسەکی، ل سەر ئالیگرێن خوە دابەش کرنە، لەوما وەعد قدۆ ھەموو ھەولێن خوە ددەت کو برازایێ خوە ب ناڤێ ئەحمەد حەسەن ئەل-قەدوو ل جیهێ محەمەد جەمیل دانیت، لێ مەترووحی رازی نینە و پشتگریا محەمەد جەمیل دکە.

تەڤی کو لژنەیا نەزاھێ (تێکۆشینا ل دژی گەندەلیێ) ل مووسلێ ژ ڤان بنپێکرنان ئاگاھدارە ژی، لێ بەلێ پشتگریا بەرپرسێن بلند یێن حەشدا شەعبی یێن مینا ئەمیندارێ گشتی یێ حەشدێ «ئەبۆ مونتەزەر تەحسین ئەل-عەبودی» و فەرماندارێ ئۆپەراسیۆنێن حەشدا شەعبی «عەدنان ئیبراھیم ئەل-بەسری» رێ ل بەر لێپرسینان دهێت گرتن.

قەرەبووکرنا زیانێن ئێرشێن ئەمریکا

ل ئالیێ دن، د 10ی خزیرانا 2026ێ دە، بەرپرسێ لۆجیستی یێ ئۆپەراسیۆنێن نەینەوایێ حوسام ئەل-سەحلانی سەردانا بارەگەھا سەرەکی یا لیوایا 30 کر. د جڤینا لگەل محەمەد جەمیل دە ھاتە خوەستن کو لیستەیا زیانێن ژ ئەنجاما ئێرشێن بالافرێن ئەمریکا یێن ل سەر بارەگەھێن لیوایێ، بارەگەھێن نوونەرێ عەلی خامەنەیی «شێخ حەسەن سولتان فەتاح» و سازیا سەیید ئەل-شوھەدا ل گوندێ «خەزنە تەپە» ھاتنە چێکرن، ئامادە بکن داکو بۆ دەستەیا حەشدا شەعبی بێنە بلندکرن ب مەبەستا قەرەبووکرنێ.

د ئەنجاما ڤان گەشەدانان دە ھات زانین کو جیگرێ فەرماندارێ سەرکردایەتیا ئۆپەراسیۆنێن حەشدا شەعبی ل نەینەوایێ و فەرماندارێ لیوایا 21 یا حەشدا شەعبی، «سەیید عەقیل» د مەھا گولانا 2026ێ دە ب تۆھمەتا وەرگرتنا بەرتیلان ژ گرتیان ھاتیە دەستبسەرکرن و نھا د زیندانا سەدر ئەل-قەنات (تاجی/بەغدا) دە د بن لێپرسینا دادوەریێ دەیە.