داركا مازی به‌لگه‌یێن جڤینێن «په‌یه‌دێ و ئیستخباراتا ره‌ژیما رووخیایی یا سووریێ» پارڤه‌دكه
تێكلیێن ژێر ب ژێر یێن په‌كه‌كێ و باسكێ وێ یێ رۆژئاڤا په‌یه‌دێ ب ره‌ژیما به‌شار ئه‌سه‌د د 10 سالێن پێش رووخیانا ڤێ ره‌ژیمێ هه‌ری خورت بووبوون، ئه‌ڤ پێوه‌ندی ب ته‌ڤاهی ژ بۆی پاراستنا ئه‌جێندایێن ئیرانێ و ده‌وله‌تا سووریێ دهاتن چێكرن، تایبه‌ت پشتی كو په‌كه‌كه ل سالا 2013ان ب فه‌رمی بوویه به‌شه‌ك ژ «ئه‌نیا به‌رخوه‌دانێ» یا ئیرانێ.
پاش كه‌تنا ره‌ژیما به‌شار ئه‌سه‌د ل 8 دیسامبه‌را 2024ێ، به‌لگه و دۆكیۆمه‌نتێن سازیێن ئیستخباراتا ڤێ ره‌ژیمێ ئاشكه‌ره بوون، د ناڤا وان به‌لگه‌یان ده كۆنووسێن جڤینێن په‌یه‌دێ و رێڤه‌به‌رییا خوه‌سه‌ر یێن ب ره‌ژیما سووریێ هه‌نه.
داركا مازی ژ چاڤكانیێن خوه یێن تایبه‌ت ل رۆژئاڤا كوردستانێ هن به‌لگه‌یێن گرێدای جڤینێن په‌یه‌دێ و ئیستخباراتا به‌شار ئه‌سه‌د ده‌ستخستنه، تێ ده هاتییه ئاشكه‌ره كرن كو، شانده‌كه ئاست به‌رز یا «په‌یه‌دێ، رێڤه‌به‌رییا خوه‌سه‌ر و هۆزێن عه‌ره‌ب» سه‌ردانا شامێ كرنه و ل ور ب ئیستخباراتا سووریه‌یێ ره جڤیانه.
د به‌لگه‌یێن ئیستخباراتا ره‌ژیما سووریێ ده، هاتیه پشتراستكرن كو په‌یه‌دێ خوه‌ستیه كو نوونه‌رێ ئیرانێ ژی ئاماده‌ی جڤینێ ببه و ئاماده‌بوونا نوونه‌رێ ئیرانێ وه‌كه مه‌رج دانایه.
په‌یه‌دێ ل ئاستا ژوور تێكلی ب ئیستخباراتا سووریه‌یێ ره هه‌بوو
یێك ژ وان به‌لگه‌یێن نهێنی كو د ده‌ستێ «داركا مازی» ده نه، ژ رێڤه‌به‌رییا ئیستخباراتا گشتی یا سووریێ تایێ 279 ب مێژوویا 20 چله‌یا 2022ێ ده‌ركه‌تیه.
د ڤێ به‌لگه‌یێ ده ئیستخباراتا سووریێ ئاشكه‌ره كریه كو ئاماده‌كاری بۆ ل دارخستنا جڤینه‌كێ ل باره‌گه‌ها ئه‌وله‌هییا نشتیمانی یا سووریه‌یێ ل نێڤبه‌را وان و په‌یه‌دێ و نوونه‌رێن رووسیا تێ كرن.
هه‌روه‌ها هاتییه گۆتن: په‌یه‌دێ ره‌دكریه ئاماده‌ی وێ جڤینێ ببه، ژ به‌ر كو نوونه‌رێ ئیرانێ نه‌هاتبوو ڤه‌خوه‌ندن، په‌یه‌ده موكر بوو كو نوونه‌رێ ئیرانێ ئاماده ببه.
په‌یمانێن تاری یێن په‌یه‌دێ و ئیستخبارتا ره‌ژیما رووخیایی یا سووریێ ل سه‌ر كیستێ گه‌لێ كورد
هه‌والگیریا سووریێ د وێ به‌لگه‌یێ ده كو ژ بۆی برێڤه‌به‌رێ هه‌والگیریێ ئاراسته كریه، دبێژه: ئه‌ڤ جڤین ژ بۆی نیقاشا ده‌ربارێ مه‌له‌فا كوردان تێن ل دارخستن.
به‌لگه‌یێن هه‌والگیرییا سووریێ یێن كو پاش رووخاندنا ره‌ژیما به‌شار هاتنه پارڤه‌كرن، ته‌ڤ تێكلیێن ژێر ب ژێر یێ په‌یه‌دێ باسكێ په‌كه‌كێ یێ رۆژئاڤا كوردستانێ ژ بۆی گه‌لێ كورد ئیفشا كرن و زه‌لال بوو كو ده‌ستێن ڤێ پارتییا گرێدای په‌كه‌كێ چ قاسی ب سازیێن قرێژ یێن هه‌والگیرییا سووریێ ره د ناڤا هه‌ولدان و په‌یمانێن تاری ده بوو.
ئه‌ڤ خه‌باتێن په‌یه‌دێ یێن ب ره‌ژیما به‌شار و ئیستخباراتا سووریێ، نه ژ بۆی به‌رژه‌وه‌ندییا كوردان دهاتن مه‌شاندن، به‌لكو ژ بۆی به‌رژه‌وه‌ندیێن ئیرانێ و چێكرنا په‌یمانێن تاری بوون ل سه‌ر كیستێ گه‌لێ كورد یێ ل رۆژئاڤا كوردستانێ.
