وەزارەتا ناڤخوەیا حکوومەتا ھەرێما کوردستانێ ب داخویانیەکە نڤیسکی، نیگەرانيیا خوە یا کوور ل ھەمبەر گاڤ و لھەڤکرنێن داوی یێن حكوومه‌تا فەدەرالا ئیراقێ یێن دەربارێ شنگالێ دە نیشان دا و راگھاند، فەرزکرنا ھەر شێوە رەوشەکە نەخوەستی ل ھەرێمێ، بنپێکرنا پەیمانێن فەرمی یە.
د داخویانیێ دە ھات دیارکرن، ئەو ب نیگەرانی چاڤدێرییا وان لھەڤکرنان دکن یێن کو حكوومه‌تا فەدەرالا بەغدایێ ب ئاوایەکی یەکئالی و بێیی شێورا ب حكوومه‌تا ھەرێما کوردستانێ رە ل سەر رەوشا شنگالێ پێک تینە. ھات تەکەزکرن کو ئەڤ گاڤ ب تەمامی ل دژی “پەیمانا شنگالێ” نە، یا کو د جۆتمەھا 2020ان دە ب سەرپەرشتییا نەتەوەیێن یەکگرتی ھاتبوو ئیمزەکرن.
وەزارەتا ناڤخوە د داخویانیا خوە دە ئاماژە ب فەداکارییا ھێزێن پێشمەرگە کر و گۆت: “شنگال و چیایێ شنگالێ ب خوینا سۆرا 500 شەھید و 3 ھەزار بریندارێن پێشمەرگەیێن قەھرەمان ھاتنە رزگارکرن؛ لەوما پێویستە رێز ل ڤێ قوربانیدان و تێکۆشینێ بێ گرتن.”
د دەواما داخویانیێ دە ھات دەستنیشانکرن کو فەرزکرنا رەوشەکە ئەولەھی و ئیدارییا نەخوەستی یا ل دەرڤەیی سازیێن رەوا، ئالۆزییان زێدەتر دکە و پرۆسەیا ئاساییکرنا ژیانێ تێک دبە. ھەر وھا ھات گۆتن: “تەکانە رێچارەسەرییا راست، جیبجیکرنا تەڤاھیا پەیمانا شنگالێ یە. چمکی ئەڤ پەیمان تەکانە گارانتییا ئاڤاکرنا ئیدارەیەکە رەوا ژ ئالیێ نوونەرێن راستەقینه یێن ھەرێمێ ڤەیە، ھەر وھا میسۆگەریا دەستپێکرنا ژنووڤەئاڤاکرنێ و دابینکرنا ئاساییشێ یە دا کو ب سەدھەزاران خوشک و برایێن مەیێن ئێزدی ب سەربلندی ڤەگەرن سەر جھ و وارێن خوە.”
وەزارەتا ناڤخوەیا ھەرێمێ بانگ ل حكوومه‌تا فەدەرال کر کو پابەندی پەیمانا شنگالێ و ھەموو وان لھەڤکرنێن سیاسی بە یێن کو د وارێن ئیداری، ئەولەھی و ئاڤادانکرنێ دە ھاتنە ئیمزەکرن.
وەزارەتێ د بەشا داوی یا داخویانیێ دە بژاردەیەکە دن ژی خست رۆژەڤێ و راگھاند: “ئەگەر پێکئانینا ڤان پەیمانان زەحمەت بە، بلا ڤەگەرن سەر نێرین و ئیرادەیا خەلکێ شنگالێ، ب تایبەتی جڤاکا ئێزدی؛ کیژان ئالی و چ ژ بۆ خوە باش ببینن بلا ب خوە بریارێ ل سەر بدن و دڤێ ھەموو ئالی ژی پابەند و پشتگرێ ھلبژارتنا وان بن. ژ بەر کو ئارامیا ھەرێم و خەلکێ وێ، د سەر ھەموو بەرژەوەندی و ئارمانجێن دن رەیە.”
