حکوومەتا ترکیەیێ ئیرۆ دوشەمێ (9ێ مژدارا 2026ێ)، ب سەرۆکاتیا سەرۆککۆمار رەجەب تەییب ئەردۆگان دجڤە. د ڤێ جڤینا گرینگ دە دێ نەخشەرێیا چەکدانینا پەکەکێ د چارچۆڤەیا پرۆسەیا ئاشتیێ دە، بلندکرنا مووچەیێن خانەنشینان و گەشەدانێن ھەرێمی یێن د ناڤبەرا ئامەریکا و ئیرانێ دە ل سەر مێزە بن.
د پشکا ئەولەھی و ناڤخوەیی دە، حکوومەت دێ پێنگاڤێن داوی یێن پرۆسەیا کو ب “ترکیەیا بێ تەرۆر” تێ ناسین ھەلسەنگینە. د ڤێ چارچۆڤەیێ دە، ئەنجامێن کارێن “دەستەیا تایبەت یا سەرۆککۆماریێ بۆ چەکدانینا پەکەکێ”، چالاکیێن “لژنەیا چاڤدێریێ ل پارلامەنتۆیا ترکیەیێ” و قۆناغا کو خشتەیا دەمکی یا چەکدانینا کۆمێن چەکدار گھیشتیێ، ب ھوورگلی دێ هێن گۆتووبێژکرن.
د وارێ ئابۆری دە ژی، رەوشا ژیانا نێزیکی 18 ملیۆن خانەنشینان کو دۆرا 5 ملیۆنان ژ وان کێمترین مووچەیێ وەردگرن، دێ مژارا سەرەکە بە. تیما ئابۆری یا حکوومەتێ دێ بژاردەیێن وەکی زێدەکرنا وەکھەڤ، دانا پشکا بەرفرەھیێ و بلندکرنا مووچەیان ل گۆری سالێن خزمەتێ بینە زمان داکو پشتی دانوستاندنێن بودجەیێ پێشکێشی پارلامەنتۆیێ بکە؛ ھەروسا لێکۆلینێن گەندەلیا سندۆقێن دارایی و قەرەبووکرنا وەبەرھێنەران ژی دێ هێن گۆتوبێژکرن.
د سیاسەتا دەرڤە دە، ئالۆزیێن د ناڤبەرا ئامەریکا و ئیرانێ دە و ھەولدانێن دیپلۆماسی یێن ل گۆری پەیوەندیا تەلەفۆنی یا داوی یا د ناڤبەرا ئەردۆگان و سەرۆکێ ئامەریکایێ دۆنالد ترامپ دە دێ بێن نرخاندن. ھەر لگەل وێ، ئەنجامێن سەردانا ئەردۆگان یا بۆ ئازەربایجانێ و ئامادەکاریێن بۆ مێڤانداریا لووتکەیا کەشووھەوایێ یا جیھانی (COP31) ل ئانتالیایێ بەشەک دن یا رۆژەڤا جڤینێ پێک تینن.
