شاندا په‌رله‌مانا كوردستانێ كو ده‌ما دو رۆژانه ل به‌غدا ئا پایته‌ختا ئیراقێ یه، ئیرۆ دگه‌ل سه‌رۆك په‌رله‌مانا ئیراقێ جڤییا و پرسا هلبژارتنێن ئه‌نجوومه‌نێن پارێزگه‌هییان گۆتوبێژ كرن.
شاندا په‌رله‌مانا كوردستانی ب سه‌رۆكتیا هێمن هه‌ورامی جێگرێ سه‌رۆك په‌رله‌مانا كوردستانێ، ئیرۆ ژ ئالیێ محه‌مه‌د حه‌لبووسی، سه‌رۆك په‌رله‌مانا ئیراقێ ڤه هات پێشوازی كرن، د جڤینێ ده، مادده‌یا 16 مین ئا یاسایا هلبژارتنێن ئه‌نجوومه‌نێن پارێزگه‌هییان هات گۆتوبێژ كرن كو ب سه‌ده‌ما وێ هه‌ژماره‌كه ئێكجار مه‌زن ئا كوردان، وێ ژ مافێ ده‌نگدانێ بێ به‌ش بكه، نه‌خاسمه روونشتڤانێن كه‌ركووك و شنگالێ.
شاندا په‌رله‌مانا كوردستانێ ژ حه‌لبووسی خوه‌ست، نه‌رینا هه‌رێما كوردستانێ ل به‌رچاڤ وه‌ره وه‌رگرتن و ژبه‌ری په‌ژراندنێ ئه‌و نه‌رین ته‌ڤلی پرۆژه یاسایێ ببه.
د وێ ده‌ربارێ ده، سه‌رۆك په‌رله‌مانا ئیراقێ، پێشوازی ل شاندا په‌رله‌مانا كوردستانێ كر و هه‌ولێن وی ئێن ژبۆی چاره‌سه‌ركرنا پرسگرێكێن هه‌ولێر و به‌غدایێ نرخاندن.
شاندا كوردستانێ دوهـ رۆژا چارشه‌می داخوازییا راستڤه‌كرنا پرۆژه یاساییا هلبژارتنێن ئه‌نجوومه‌نێن پارێزگه‌هییان كر، نه‌خاسمه خالا ده‌نگدانا ئاواره‌یان.
په‌رله‌مانا كوردستانێ ب رێیا شاندا خوه ئا به‌غدایێ، سكالایه‌كه فه‌رمی ل دادگه‌ها فه‌ده‌رال ل سه‌ر یاسایا هلبژارتنێن پارێزگه‌هییان تۆمار كر كو ب سه‌ده‌ما وێ، وێ هه‌ژماره‌كه ئێكجار مه‌زن ئا ئاواره‌ییان ژ مافێ ده‌نگدانێ بێ به‌ش بن.
