ئه‌میندارێ گشتی ئێ هزبوللا ئا لبنانی دبێژه، گه‌ر جه‌نگا ل نێڤبه‌را كۆمارا ئیسلامی ئا ئیرانێ و ئه‌ره‌بستانا سئوودیێ ده ده‌ركه‌ڤه هۆلێ، ئیران وێ سئوودیێ بشه‌وتینه.
هه‌سه‌ن نه‌سروللا كو د ته‌ڤی ده‌ركه‌تێن خوه ئێن مه‌دیایی ده، زمانه‌كێ زڤر و توند بكارتینه، د ده‌ركه‌تنا خوه ئا داویێ ژی ده، هشیاری ژ هه‌ر جه‌نگه‌كه موهته‌مه‌ل ل ناڤچه‌یێ دا و دبێژه: گه‌ر كۆمارا ئیسلامی ئا ئیرانێ و ئه‌ره‌بستانا سئوودیێ ل هه‌ڤ خستن، ئیران وێ سئوودیێ بشه‌وتینه، ئه‌ڤ یه‌ك راستیه‌كه نایێ ڤه‌شارتن.
نه‌سروللا هه‌روها ئه‌شكه‌ره كر، ل شوونا ریاز فكرێ ل جه‌نگا ل گه‌ل ته‌هرانێ بكه و سیسته‌مێن به‌ره‌ڤانی ئا ئاسیمانی بكره، باشتره ئه‌و نیقاشێ ب ئیماراتا ئه‌ره‌بی ره بكه ژ بۆ كو جه‌نگا ل دژی یه‌مه‌نێ ب داوی بینه.
ب نه‌رینا نه‌سروللا، كرینا سیسته‌مێن به‌ره‌ڤانی ئا ئاسیمانی ئێن نوو، ئه‌ره‌بستا سئوودیێ نا پارێزه، تایبه‌ت پاراستنا وێ ژ باله‌فرێن بێ پیلۆت دێ تونه به، وه‌كه وان بێ پیلۆتێن ل 14 ئیلۆنا ئیسال ئێریشی شركه‌تا په‌ترۆلا نه‌ته‌وه‌ئی ئا سئوودیێ ئارامكۆیێ كرین.
نه‌سروللا گۆتنێن خوه دۆماندن، پێتر هشیاریێ دده ئه‌ره‌بستا سئوودیێ و دبێژه: مالا وه ژ شووشه یه، ئابوورا وه شووشه یه، وه‌كه هه‌وه باژارێن ئیماراتێ ژی شووشه نه، گه‌ر وه جه‌نگ ده‌ستپێكر، هوونێ بشه‌وتن و قه‌ت نكارن فكرێ ل وێ زرارێ بكن كو وێ ب ده‌وله‌تێن وه كه‌ڤه.
نه‌سروللا به‌هسا ئێریشا سه‌ر شركه‌تا ئارامكۆ كر و ب نموونه ژبۆ ریازێ ئانی زمان ده‌ما كو دبێژه: ئێریشه‌كه بچووك ئا كو 2 باله‌فرێن بێ پیلۆت كری، ئاستا هنارتنا نه‌فتا وه ب قاسی 50% ده تونه كر، له‌وما جه‌نگه‌كا مه‌زن وێ شه‌واتێ ل سه‌ر سه‌رێ وه ببارینه.
ئه‌میندارێ گشتی ئێ هزبوللا ئا لبنانی ل داویا گۆتنا خوه جار دن هشیاری دده ریاز و ئیماراتێ و ب وان ره دبێژه: ل شوونا هوون سیسته‌مێن به‌ره‌ڤانی ئا ئاسیمانی ب دراڤێ هه‌ری مه‌زن بكرن كو ئه‌منا ئاسیمانێ خوه پێ ب پارێزن، باشتره هوون گاڤا یه‌كه‌مین، شه‌رێ ل دژی یه‌مه‌نێ راوه‌ستینن.
