وه‌لاتێن فرانسا، ئالمانیا و هه‌ر وها به‌ریتانیا، كۆمارا ئیسلامی ئا ئیرانێ، ب ئێریشا سه‌ر شركه‌تا ئارامكۆ ئا سئوودیێ سووجدار كرنه، وان گۆت: ئه‌شكه‌ره‌یه ئیران ژ ئێریشێ به‌رپرسیاره.
ئه‌نگێلا مه‌ركل شێوه‌رمه‌ندا ئالمانیایێ، ئه‌مناوه‌ل ماكرۆن سه‌رۆكێ فرانسایێ، هه‌ر وها بۆریس جۆنسۆن ئێ سه‌ر وه‌زیرێ به‌ریتانیا،د چارچووڤه‌یا جڤینا نه‌ته‌وێن یه‌كبووی ئا گه‌را 74ان ده ل نیۆیۆركێ، به‌یانه‌كه هه‌ڤپار وه‌شاندنه و تێده ب ئه‌شكه‌ره ئیران ب ئێریشا سه‌ر شركه‌تا نه‌ته‌وه‌ئی ئا په‌ترۆلا ئه‌ره‌بستانا سئوودیێ كو ب ئارامكۆ تێ ناسكرن، سووجدار كرنه.
د به‌یانێ ده ب توندترین ئاوا، ئێریشا سه‌ر شركه‌تا ئارامكۆیێ هات شه‌رمه‌زار كرن كو ل 14 ئیلۆنا ئیسال هاتبوو پێكئانین و پشتگری ژبۆ ئه‌ره‌بستانا سئوودیێ هات ته‌كه‌ز كرن.
وه‌لاتێن كو به‌یان وه‌شاندنه گۆتنه: “ئه‌شكه‌ره‌یه ئیران ل پشت ئێریشێ یه، زه‌لالیه‌كه دن تونه‌یه، ئه‌مێ ژبۆ له‌كۆلینان و ب ده‌ستخستنا هۆرگلیێن پێتر پشته‌ڤان بن”.
ئالمانیا، فرانسا و به‌ریتانیا كو د گرۆپا 5+1ان ده‌نه و لهه‌ڤهاتنا ناڤۆكی ل سالا 2015ان دگه‌ل ئیرانێ ده ئیمزه كرنه، د به‌یانا خوه ئا شه‌رمه‌زاركرنا ئیرانێ ده، به‌هسا خه‌ته‌را ده‌ركه‌تنا جه‌نگێ ل ناڤچه‌یێ كرنه، هه‌موه‌خت وان ئه‌شكه‌ره كر كو پابه‌ندبوونا وان ب لهه‌ڤاتنا ناڤۆكیێ هه‌یه و خوه‌ستن مه‌رجێن وێ وه‌ره‌ن بجیكرن.
ل دوایا به‌یانێ هه‌رسێ وه‌لاتان بانگا ئیرانێ ژبۆ دیالۆگێ و خوه‌دوورخستنێ ژ زێده‌كرنا ئالۆزیێ ل ناڤچه‌یێ كرنه.
