ههمولاتیهكێ ناڤچه‌یا چه‌مانكێ د ئێریشا سه‌ر په‌كه‌كێ ده شه‌هید كه‌ت
ئه‌ره‌به‌یه‌كا گه‌ریلایێن په‌كه‌كێ ل سینۆرێ ناڤچه‌یا چه‌مانكێ ئا باشوورێ كوردستانێ، كه‌ته به‌ر ئێریشا باله‌فرێن جه‌نگی ئێن تركیێ و زرارێن مه‌زن ب گه‌ریلایان كه‌تنه، هه‌ر وها ههمولاتیهكێ وێ ناڤچه‌یێ ژی شه‌هید كه‌ت.
باله‌فرێن جه‌نگی ئێن تركیێ، ئێڤارا رۆژا چارشه‌می ئه‌ره‌به‌یه‌كا گه‌ریلایێن په‌كه‌كێ، ل گه‌لیێ گوندێ (كانی مازێ) ئێ ناڤچه‌یا چه‌مانكێ ل ده‌ڤه‌را گاره ئا ل سینۆرێ پارێزگه‌هیا دهۆكێ بۆردۆمان كرن و زرارێن هه‌ری مه‌زن گهاندن په‌كه‌كێ، لێ به‌لێ ههمولاتیهكێ سڤیل ناڤچه‌یێ ژی شه‌هید كه‌تیه.
ل گۆر زانیاریێن تایبه‌ت كو ب ده‌ست داركا مازیێ كه‌تنه، ئێڤارا رۆژا چارشه‌می 25/9/2019 پشتی كو ئه‌ره‌به‌یه‌كا گه‌ریلایێن پارتا كاركه‌رێن كوردستانێ په‌كه‌كێ، چوویه د سینۆرێ گوندێ (كانی مازێ) ل هاڤینگه‌ها گه‌لیێ كانی مازێ ل نێزی دكانا هه‌مو‌لاتیێ ب ناڤێ (یووسف جه‌مال ئومه‌ر)، كه‌ته به‌ر ئێریشا باله‌فرێن جه‌نگی ئێن تركیێ و ب ته‌مامه‌تی هات شه‌وتاندن و ژناڤبرن.
زانیاری ئێن هه‌ری داوی ئاماژه دكن كو ته‌ڤ گه‌ریلایێن د وێ ئه‌ره‌به‌یێ ده هاتنه كوشتن و تو كه‌سه‌ك ژێ قورتال نه‌بوو، لێ هه‌موه‌خت، هه‌مولاتی ئێ ب ناڤی (یووسف جه‌مال ئومه‌ر) كو ل ده‌ستپێكێ بریندار كه‌تبوو، پشتره ژ به‌ر دژواریا برینا وی، شه‌هید كه‌ت.
گه‌ریلایێن په‌كه‌كێ ل ڤێ داویێ ژبۆ كو زرار بگه‌هه خه‌لكێ سڤیلێ ناڤچه‌یێن سینۆرێ پارێزگه‌هیا دهۆكێ، هه‌ر وها ژ بۆ كو خوه ژ ئێریشێن ئارته‌شا تركیێ قورتال بكن، به‌رده‌وام و ب ئه‌نقه‌ست هاتوچوو هه‌ره‌كه‌تێن خوه و ئه‌ره‌به‌یێن خوه خستنه سه‌ر رێێن گوندان و وان ناڤچه‌یێن كو سڤیل تێده ژیانێ دكن.
خه‌لكێ ناڤچه‌یێ ژی تۆره‌ییه‌كا هه‌ری زێده ل جه‌م وان چێبوویه و دخوازن په‌كه‌كه ناڤچه‌یێن وان چوول بكه ژبۆ كو ناڤچه‌یێن وان نه‌بنه مه‌یدانا شه‌ر.
ل گۆر ئامارێن فه‌رمی ئێن هكوومه‌تا هه‌رێما كوردستانێ، ته‌نێ د ئیسال ده، نێزی 10 هه‌مولاتیێن سڤیل ئێن هه‌رێمێ د ئێریشێن تركیێ ده ل سینۆرێ پارێزگه‌هیا دهۆكێ و هه‌ر وها ناڤچه‌یێن بنارا قه‌ندیلی و خواكوركی، شه‌هید كه‌تنه، لێ به‌لێ خه‌لكێ ناڤچه‌یێ په‌كه‌كێ ب سه‌ده‌ما سه‌ره‌كه دبینه، ژ بۆ كو ئه‌و دبینن، گه‌ر په‌كه‌ك ژ ناڤچه‌یێن وان دوور بن، ئارته‌شا تركیێ وێ ئێریشێ ناڤچه‌یێن وان نه‌كه.
