هه‌ڤسه‌نگیا هێزێ ل ناڤ یه‌كیتیێ وێ وه‌ره‌ گوهه‌رین جه‌نگا ل دژی مالباتێ دژوار بوویه‌

هەر کو دچە ئالۆزی و دوبەرەکی ئا د ناڤا بالێن جودا ئێن یەکیتیا نشتیمانی ئا کوردستانێ ده‌، باشتر و زەلال تر خوەیا دکن، هه‌موه‌ختا كو فره‌جه‌مسه‌ری ئا پشتی نه‌خوه‌شكه‌تنا مام جه‌لال تاله‌بانی ده‌ركه‌تیه‌ هۆلێ هنه‌كێ به‌ر ب ئارامیی چووی و ب ده‌ستنیشانكرنا وه‌ختا سازكرنا كۆنگره‌یا چاره‌مین هنه‌كێ دلره‌حتی چێبووی، لێ به‌لێ ئه‌ڤ یه‌ك دژی پێشبینیێ ده‌ركه‌ت، دژبه‌رێن بالێ هێرۆ خانێ ده‌ست له‌یستنه‌كه‌ نوو كرنه‌، جائیزه‌ ناڤێ “كش پاشا” لێ وه‌ره كرن.

ل گۆری زانیاریێن هه‌ری تایبه‌ت كو رایه‌داره‌كێ یه‌كیتیا نشتیمانی ژبۆ پێگه‌ها داركا مازیێ شاندنه‌، نها بالێ دژبه‌رێ هێرۆ ئیبراهیم ئا خانما مام جه‌لال تاله‌بانی ب ره‌همه‌ت به‌، ده‌ست ب جه‌نگا خوه‌ كرنه‌، ئه‌و دخوازن یه‌كیتیا پشتی كۆنگره‌یا چاره‌مین ژ خانم هێرۆ و مالباتا تاله‌بانی ڤالا به‌، ره‌وش وه‌ها خوه‌یا دكه‌، وه‌كه‌ گه‌لێ باشوور دبێژه‌: “رائێخ وێ ژبن پیێن خانما هێرۆ وه‌ره‌ كشاندن”.

ل گۆری زانیاریێن پێگەها دارکا مازی كو ل چاڤکانیەکە تایبەت د ناڤا یه‌كیتیێ دە بده‌ستخستنه‌ و نەخوه‌ست ناڤێ وی وەرە ئەشکەرە کرن، یه‌كیتی نها د ره‌وشه‌كه‌ هه‌ری خراب ده‌ ده‌رباس دبه‌، ئۆرگان و سازیێن وێ پارتێ وێ ژنووڤه‌ وه‌رن ئاڤاكرن، سه‌روه‌ت و سامانێن یه‌كیتیێ وێ ژنوو وه‌ره‌ پارڤه‌كرن، نه‌خشێ ده‌ستهه‌لاتا یه‌كیتیێ وێ مالباتا مامه‌ نه‌به‌، ئه‌ڤ له‌یستن بالێ دژبه‌ر ب “كش پاشا” ناڤ كرنه‌.

رایه‌دارێ یه‌كیتیێ كو زانیاری ب داركا مازیێ دایینه‌ وها ئاخڤی: “له‌یستنا دژبه‌رێن هێرۆ ئیبراهیمێ ب كریار ده‌ستپێكرنه‌، ئەڤ یەک ب زه‌لالی تێ دیتن كو نها و پشتی داخستنا هه‌ژماره‌كه‌ سازیێن ل بن سه‌رپه‌رشتیا راسته‌ راست ئا هێرۆ ئیبراهیمێ تێن ئیداره‌ كرن، وه‌كه‌ سازیێن مەدیایی و رۆشەنبیری، هه‌موو سازیێن ل بن سیبه‌را مالباتێ ژی، وێ وه‌رن ئیمها كرن”.

دژبه‌رێن هیرۆ یه‌كیتیه‌كه‌ نوو دخوازن، یه‌كیتیه‌ك به‌ وه‌كه‌ وی “مارێ كه‌ڤلێ خوه‌ گوهه‌ری”، ب كنجه‌كه‌ نوو، هه‌ڤسه‌نگیه‌كه‌ نوو، لێ به‌لێ تو باندۆره‌كا هێرۆ ل سه‌ر نه‌به”‌.

 پشتی وه‌فاتا مام جەلال سکەره‌تەرێ گشتی ئێ یەکیتیا نشتیمانی ئا کوردستانێ، بالەکە ده‌ستنیشان كری د ناڤا یه‌كیتیێ دە، هەرتم رێگری و ئاستەنگان ژ بۆ هێرۆ و بالێ وێ کو ب “بالێ کەمینە” تێ ناسکرن ده‌ردخه‌ هۆلێ، لێ به‌لێ هێرۆ كاری تەڤ ئاستەنگیان ده‌رباس بكه‌ و ب سەر بالێن دن ده‌ زال ببە، ب ئاوایه‌كی وها کو گه‌له‌ك جاران هیرۆ وەکە سه‌کره‌تەرا گشتی ئا یه‌كیتیێ دهات مه‌یزه‌ كرن.

رایه‌دارێ یه‌كیتیێ دبیژه‌: “هێرۆ ل وه‌ختا كو ب هێز دكاری ئه‌ڤێ جه‌نگێ د به‌رژه‌وه‌ندیا خوه‌ ده‌ یه‌كلا بكه‌، لێ به‌لێ نها ئه‌و د رەوشەکە ساخلەمی ئا نه‌باش دەیه‌ و كارینا وێ ژبۆ سه‌ركه‌تنێ د جه‌نگا بالێ دژبه‌ر ده‌، تونه‌یه‌”.

هه‌ر وها به‌رده‌وام كر: “پشتی نەخوه‌ش کەتنا هێرویێ، هەر تشت هات گوهه‌رین و بالێ دژبه‌ر دەست ب تولهلدانێ کرنه، د گاڤا وان ئا یه‌كه‌مین ده‌ ‌چەندین سازیێن مه‌دیایی و رۆشەنبیری ئێن سەر ب بالێ هێرویی ڤە‌ مینا:

• کورد سات

• بادینان سات

• کەرکووک تی ڤی

• خاک

• گەلێری ئا ب ناڤێ ئەمنە سۆرەکە

• گەلەری ئا زاموا

• زانینگەها کۆبانێ

• دبستانا شەهید جەبار

• سەنتەرێ رۆشەنبیری ئێ کەرکووکێ

• مالا ئێزدیان

• رۆژنامەیا کوردستانی نوێ

• رۆژنامەیا الاتحاد

هه‌ر وها تەڤ کەنال و سازی و پرۆژەیێن کو مام جەلال و هێرۆیێ ئاڤا کربوون کەتنە بن رەهما بالێ دژبەر و پێتریا وان هاتن داخستن و ئێن مایی ل به‌ر خه‌ته‌را داخستنێ نه‌.

زانیاری ئه‌شكه‌ره‌ دكن كو ژبلی داخستنا سازیێن سه‌ر ب بالا هێرۆ ڤه‌، هه‌ڤركی گهایه‌ ئاسته‌كا وها كو بالێ دژبه‌ر هینا ده‌ست ب قوتكرنا مووچه‌یێ مام جه‌لال ل سه‌ر مالباتا وی كرنه‌.

ل گوری وان زانیاریێن تایبەت ب پێگەها دارکا مازی ڤە، ڤێ یەکێ پەیوەندیەکه‌ راستە راست ب کۆنگرەیا چاره‌مین ئا یه‌كیتیێ هەیە و بالێ دژبەرێ هێرویێ دخوازە بەریا کۆنگرەی هەر تشتی د بەرژەوەندی ئا خوە دە یه‌كلا بکە و چه‌پكه‌ گولا مامێ ب ره‌همه‌ت ژ ده‌ست خانما هێرۆ ده‌ربخه‌.