په‌كه‌كه ژ دۆلا بیقاع به‌ر ب خزمه‌تا داگیركه‌ران و وێرانكرنا كوردستانێ
پارتییا كاركه‌رێن كوردستانێ، ئانكو رێخستنا په‌كه‌كێ، د پێتری 40 سالێن خه‌بات و ته‌كۆشینا خوه دا، گه‌له‌ك قۆناغ ده‌رباس كرینه، د هیچ یه‌ك ژ ڤان قۆناخان دا، نكاری یه وه‌ك پارتییه‌كا ناسیۆنالیست یا كوردی ده‌ركه‌ڤیته مه‌یدانێ، رێخستنا په‌كه‌كێ چه‌ندین جاران شه‌رێن چه‌كداری دگه‌ل پارتێن ناسیۆنالیستێن كورد ئه‌نجام داینه، لێ به‌لێ نكاری یه یه‌ك ناڤچه‌یا بچووك یا كوردستانا مه‌زن ژ ده‌ست ده‌وله‌تێن (تركیێ، سووریێ، ئیرانێ و ئیراقێ) رزگار بكه‌ت.
پێگه‌ها داركا مازی دێ ل رۆژێن بهێت، زنجیره‌كا تایبه‌ت یا مژارێن گرێدایی دیرۆك و نهێنیێن قرێژ یێن ڤێ رێخستنێ ب وورده‌كاری و زانیاریێن هه‌ری تایبه‌ت به‌لاڤ كه‌ت، زانیاریێن وه‌ها كو یه‌كه‌مین جاره دهێنه دیتن و بهیستن، هنده‌ك ژ ئه‌ڤان نهێنییان ژ دانپیدانێن سه‌رانێن په‌كه‌كێ یێن پشتی پتری 40 سالێن خه‌باتێ هاتینه.
پێگه‌ها مه ل ده‌ستپێكا وه‌شانا خوه ئه‌ڤ مژار به‌لاڤ كربوون، لێ به‌لێ ل سه‌ر داخوازییا خوه‌نده‌ڤانێن مه و پێویستییا رۆژه‌ڤێ، ئه‌مێ جاره‌كا دی ڤان مژاران ئێخین به‌رچاڤێن هه‌وه‌یێن ب رومه‌ت.
مژارێن كو دێ هێنه به‌لاڤ كرن، ئه‌ڤان ته‌وه‌ران ب خوه‌ڤه دگرن:
د 41 سالێن ته‌كۆشینا خوه دا په‌كه‌كێ ب چ ئاوایه‌كی نێزیكی رێخستنێن وه‌لاتپارێزێن كوردان بوو و كیژان رێخستن و كه‌س ته‌سفییه كرن؟.
بۆچی په‌كه‌كێ ل ده‌ستپێكا دامه‌زراندنا خوه، گوللـه‌یا یه‌كه‌مین ل كوردان ته‌قاند، نه ل دژمنێ گه‌لێ كورد؟.
كه‌سیره یلدرم كی بوو و چ په‌یوه‌ندییا وێ ب عه‌بدوللا ئۆجا‌لان و ئیستخباراتا تركیێ «میت»ێ ڤه هه‌بوو؟.
په‌یوه‌ندییا په‌كه‌كێ ب ده‌وله‌تێن داگیركه‌ر ڤه چی یه، ل شنگالێ چ كر؟.
بۆچی ل رۆژئاڤا كوردستانێ په‌كه‌كه دژایه‌تییا پارتیێن نێزی په‌ده‌كێ كر، به‌ره‌ڤاژی رێ ژ بۆ رێخستنێن چه‌پ یێن نێزیكی تركیێ ڤه‌كر؟.
ل باكورێ وه‌لات په‌كه‌كه رێناده‌ت یه‌ك پارتییا كوردی مه‌زن ببیت، لێ به‌لێ ته‌ڤگه‌رێن چه‌پ ب مۆله‌تا ڤێ رێخستنێ خه‌باتا خوه د مه‌شینن.
ئه‌رێ په‌كه‌كه ته‌ڤگه‌ره‌كا رزگاریخوازییا كوردستانێ یه، یان كار ژ بۆ ئه‌جێندایێن چه‌پێن تركیێ دكه‌ت؟.
ئۆجه‌لان چاوا هه‌ڤالێن خوه ته‌سفییه كرن و چه‌وا هات پێش؟
دامه‌زرێنه‌رێ په‌كه‌كێ «سه‌میر/ چه‌تین گۆنگۆر» بۆچی هات كوشتن؟.
كوشتنا «محه‌مه‌د شه‌نه‌ر» ل سه‌ر چ پرسه‌كێ بوو، ده‌ما ژ زیندانێ ره‌ڤیای و چوویه دۆلا بیقاع كو ل وێرێ ئۆجه‌لان ره‌خنه كر، پاش ره‌ڤیایه سووریێ و ئیستخباراتا سووریێ ب ده‌ستێ په‌كه‌كێ د ده‌ته كوشتن.
سیاسه‌تا په‌كه‌كێ یا تركیه‌بوونێ ل چ ده‌مه‌كێ و چاوا ده‌ست پێ كر؟.
په‌كه‌كێ ل چ ده‌مه‌كێ و بۆچی پێش تركیێ و ئیرانێ ڤه شه‌رێ ب وه‌كاله‌ت ل دژی پارتیێن وه‌لاتپارێزێن كوردستانێ ده‌ست پێ كر؟.
گه‌ریلا و عه‌شقا كوردستانێ، ئه‌ڤ عه‌شق چاوا كه‌تییه د به‌رژه‌وندییا ئایدۆلۆژییا په‌كه‌كێ دا؟.
بالێ چه‌پگه‌رێن په‌كه‌كێ چاوا ب سه‌ر بالێ ناسیۆنالیست دا زال بوویه؟.
ئه‌ڤ مژار و ب ده‌هان مژارێن دی یێن زێده گرنگ دێ هێنه به‌لاڤ كرن، لێ به‌لێ ب زانیاری و ئاگاهیێن كو جارا یه‌كه‌مینه دهێنه ئه‌شكه‌ره كرن.
ل به‌ندا مه بن
