شه‌رێ سئوودیێ و ئیرانێ وێ كاره‌ساتبار به‌

شه‌رێ سئوودیێ و ئیرانێ وێ كاره‌ساتبار به‌

میرزادێ ئه‌ره‌بستانا سئوودیێ، به‌هسا پرسگرێكا كه‌نداڤی دكه‌ و دبێژه‌: گه‌ر جه‌نگا ل ناڤبه‌را ولاتێ وی و كۆمارا ئیسلامی ئا ئیرانێ ده‌ركه‌ت، وێ جه‌نگه‌كه‌ كاره‌ساتبار به‌.

میرزادێ سئوودیێ مهه‌مه‌دێ كۆرێ سه‌لمان، د هه‌ڤدیتنه‌كه‌ مه‌دیایی ده‌، ژبۆ تۆرا CBS ئا ئه‌مه‌ریكی داخۆیانی ل سه‌ر هنه‌ك پرسێن گرینگ دان، وه‌كه‌ شه‌رێ ئیرانێ و سئوودیێ، كوشتنا رۆژنامه‌ڤان جه‌مال خاشه‌قچی، شه‌رێ ل دژی یه‌كینه‌یێن هۆسیان و هه‌ر وها ئێریشا ل سه‌ر شركه‌تا ئارامكۆیێ.

میرزاده‌ مهه‌مه‌د د ده‌ربارا شه‌رێ ل گه‌ل كۆمارا ئیسلامی ئا ئیرانێ وها ئاخڤی: هه‌ر جه‌نگه‌كه‌ ل ناڤبه‌را سئوودیێ و ئیرانێ ده‌ركه‌ڤه‌ هۆلێ، وێ جه‌نگه‌كه‌ كاره‌سات بار به‌، ب ئاوایه‌كی وێ ئابووریا جیهانێ ژناڤببه‌، له‌وما ریاز چاره‌سه‌ریه‌كه‌ ئاشیتیانه‌ ژبۆ پرسگرێكا ناڤچه‌یێ و ئالۆزی ئا ل گه‌ل ئیرانێ دخوازه‌.

ب نه‌رینا میرزادێ سئوودیێ، گه‌ر جه‌نگا نه‌خوه‌ستی ده‌ركه‌ت هۆلێ، نرخا په‌ترۆلێ وێ بگه‌هه‌ ئاسته‌كی وها كو تو جاره‌كێ نه‌گهیشتبه‌ وێ ئاستێ و ژبه‌ر كو 30% ئا هه‌نارده‌یێن په‌ترۆلا جیهانێ د ناڤچه‌یێ ره‌ ده‌رباسی بازاران دبه‌، هه‌ر وها 20% ئا كوریدۆرێن بازرگانیا جیهانی ل ناڤچه‌یێ نه‌، زرارا جه‌نگا سئوودی و ئیرانێ وێ ب ئابووریا ته‌ڤ جیهانێ بكه‌ڤه‌.

د مژارا ئیرانێ ده‌، میرزادێ سئوودیێ دبێژه‌: گه‌ر ولاتێن جیهانێ رێیه‌كێ ژبۆ به‌رسینگرتنا هه‌ولێن خراب ئێن ئیرانێ نه‌بینن، وێ ئالۆزی ئێن ناڤچه‌یێ و رۆژهلاتا ناڤین ب ئاوایه‌كی مه‌زن به‌رفره‌هـ بن.

د ده‌ربارا ئێریشا سه‌ر شركه‌تا ئارامكۆیێ ژی، مهه‌مه‌د كۆرێ سه‌لمانێ میرزادێ سئوودیێ ئه‌شكه‌ره‌ كر كو ئیرانێ ب وێ ئێریشێ، ئه‌همه‌قی ئا خوه‌ نیشا ته‌ڤ جیهانێ دا.

ل داویا هه‌ڤدیتنا ل گه‌ل تۆرا CBS ێ، میرزادێ سئوودیێ به‌هسا كوشتنا جه‌مال خاشه‌قچی ئێ رۆژنامه‌ڤان ل ولاتێ تركیێ كر و گۆت: ئاگه‌هیا وان ژ پلانێن كوشتنا خاشه‌قچی تونه‌ بوون، لێ وه‌كه‌ سه‌ركرده‌یێ سئوودیێ ئه‌و خوه‌ به‌رپرسیار دبینه‌.

پوستێن ھەمان بەش

گەلۆ هەپەگە کەتیە قۆناغا دویەمینا شەرێ ل دژی پێشمەرگە؟

pkk-kani mase-peshmarga-hpg