په‌كه‌كه‌ هه‌موو ته‌ڤگه‌رێن كوردی ب كرێگرتیێن داگیركه‌ران دبینیت

پەکەکێ وەھا رەفتار دگەل باشوور کر، ھەر وەک وان باکور سەردەست کرییە و گەرا باشوور ھاتییە

ژ دەستپێکا په‌كه‌كێ، دامەزراندن و وەرارا ڤێ رێخستنێ دکەڤیته‌ بن گەلەک گۆمانان، ژ بەر کو بەرا کو ئۆجالان رێخستنێ بکەت، هەڤژینا وی «کەسیرە یلدرم» كو کچا کەسەکی بوو نێزیکاتییەکا بێ سنۆر دگەل هه‌والگیرییا تركیێ «میتێ» دا هه‌بوو، هەروه‌ها پەیوەندییەکا ب گۆمان دگەل هەڤالەکێ نێزیکی ئۆجالان ب ناڤێ «پیلۆت/نەجاتی کایار» هه‌بوو، گەر ئەڤ پرس بابه‌تا ڤێ نڤیسینێ ژی نه‌بیت، لێ فەرە جودا لێکۆلین ل سەر بهێته‌ كرن.

پاش سالێن حەفتێیان ژ سەدەیا رابووری، ئانکو د دەستپێکا دامەزراندنا پەکەکێ دا، نێزیکاتییەکا بێ سنۆر ژ ئالیێ هەست و سۆزان ڤه‌ د ناڤبەرا گەلێ کورد هەبوو، تایبەت بەرانبەر ته‌ڤگه‌رێن رزگاریخواز یێن کوردستانا باشوور ب سەرکردایەتییا جەنەرال «مەلا مستەفا بارزانی»، تایبه‌ت ل «بۆتان و هەکاریێ» و ل گور ئایدۆلۆژییا پەکەکی، ئه‌ڤ یه‌ك‌ بۆ پاشه‌رۆژا وێ تشته‌كێ خراب بوو.

یه‌كه‌م گوللـه‌ 

ل کوردستانا باکور گەلەک رێخستن و ته‌ڤگه‌رێن کوردی هەبوون وەک «DDKD» ئانکو ته‌ڤگه‌را شۆرشگێرێن باکورێ کوردستانێ، هەروه‌ها ته‌ڤگه‌رێن «کۆک، کاوە و ئالا رزگاری» و گەلەکێن دی، لێ په‌كه‌كێ د دیرۆکا خوه‌ دا ب چ ئاوایەکی دانپێدان ب ڤان ته‌ڤگه‌ر و رێخستنێن کوردی نەکر، به‌لكو جاران ئەو ب کەڤنەپەرێس و فیۆدال ب ناڤ دکرن، جاران ب کرێگرتی یێن داگیركه‌ران.

هه‌ر چه‌نده‌ په‌كه‌كێ ل ڤێ قۆناغا دیرۆکا خوه‌ ناڤێ کوردستانێ گه‌له‌ك بكارئینایه‌ لێ وێ یەکەم گوللـه‌یا تەقاندی ل هەمبەر کەسەک کورد ب ناڤێ «محەمەد جەلال بۆجاک» بوویە و ئەڤ کەس ب گرانی بریندار کر و هه‌ژمارەکا هەڤالێن وی کۆشتن، په‌كه‌كێ بۆجاك ل ده‌مه‌كی كوشت كو باكورێ كوردستانی پری داگیركه‌ر بوو.

چ ته‌ڤگه‌ر و پارتیێن کوردی نه‌ماینه‌ پەکەکێ شەر نەفرۆشتبیتێ

په‌كه‌كێ خه‌باتا خوه‌ ژ ڤێ ده‌ستپێكر، وێ باش فام دكر كو هێزێن رژێما داگیرکه‌ر ل هەر جهه‌كی و ل هەر پارچه‌یه‌كا کوردستانێ نه‌، لێ ته‌نێ وێ به‌هانه‌ ل باشوور گرتن و شەرێ خوە یێ چەکداری ده‌ربازی خاكا تاکە پارچەیا ئازاد كر، ب ڤێ سیاسەتێ جاران داخوازا گرتنا کونسلگەریا تركیێ ل هەولیرێ دكر، جاران ب بەهانەیا هەبوونا هنده‌ك بارەگەهێن سەربازی یێن تركیێ ل باشوور چالاكیێن پارتیزانی ئه‌نجام ددان، په‌كه‌كێ وه‌ها ره‌فتار دگه‌ل باشوور كر، هه‌ر وه‌ك وان باكور سه‌رده‌ست كرییه‌ و گه‌را باشوور هاتییه‌.

چ رێخستن، ته‌ڤگه‌ر و پارتیێن کوردی نه‌ماینه‌ کو پەکەکێ شەر نەفرۆشتبیتێ، مەزنترین پارتییا کوردستانێ کو پەکەکێ هەڤپەیمانی دگەل كری ئێكه‌تی بوو، لێ سەرەرای هەڤپەیمانیێ، هه‌رده‌م هەول داینە ئێكه‌تیێ د مه‌یدانا سیاسی یا کوردستانێ دا به‌رزه‌ بکه‌ت، ژ بەر کو پەکەکە خوە ب تنێ ب پارتی و خودان راستی دبینیت.

په‌كه‌كێ ب چ رێ گه‌لێ كورد د خاپاند؟

به‌ری كوشتنا هه‌ر كورده‌كی په‌كه‌كێ ره‌وشا ئایدۆلۆژی یا گونجای بۆ وێ كوشتنێ دروست دكر

پەکەکێ چ جارەکێ کوشتنا کوردان ل سەر خوە نەکرییە مال، ژ بەر کو هەر دەما پیلانا کوشتنا کەسەکێ کورد دانای، پێشوه‌خت رەوشا ئایدۆلۆژی یا پێدڤی بۆ دروست كرییه‌، پاش تاوانا کوشتنێ دكه‌ت، ب ڤێ رێكێ وێ هه‌رده‌م‌ شیایە تا نها راستیێ ل گەلێ کورد ڤه‌شێریت و ب خاپینیت، بۆ سه‌لماندنا ڤێ ئاخفتنێ، دێ نموونه‌یه‌كا زیندی باس که‌ین ئەو ژی کوشتنا «فەرید ئۆزۆن»ێ سەرۆکێ ته‌ڤگه‌را «کاوە».

فەرید ئۆزۆن، ئەندامێ سەرکردایەتییا «DDKD»ێ و ژ مالباتا نڤیسكار «محەمەد ئۆزۆن» یه‌، فەرید ئۆزۆن 3 سالان دهێته‌ زیندان کرن، پشتی ئازادبوونێ ئه‌و ژ «DDKD» جودا دبیت و پارتییا «دەنگێ کاوە» دامه‌زراند، ئه‌و پارتی نێزیکی جەنەرال «مستەفا بارزانی» بوو، ناڤهاتی هۆزانڤان بوو و گەلەک هۆزان ب پێشمەرگەهێن کوردستانێ هه‌نه‌، هەروه‌ها دخواست ناڤچەیا «سیڤرەک» یا سەر ب رهایێ ڤه‌ وەک سەنتەر وه‌ربگریت.

 خەلک ل دەڤەرێ پر شەیدایی فەرید ئۆزۆنی دبن، ب تایبەتی پشتی کو پارت دامه‌زراندی، پەکەکێ هه‌ست كر کو هەبوونا کەسەکێ ب ڤی ئاوایی دێ خه‌ته‌ر بیت ل سەر پاشەرۆژا وێ، لەوما په‌كه‌كێ بریارا كوشتنا وی دا و ب رەنگەکێ گه‌له‌ك هۆڤانه‌ فەرید ئۆزۆن كوشت، لێ ب چ ئاوایەکێ ڤێ کوشتنی ل سەر خوە نا هه‌ژمێریت، بەلکو دایه‌ راگهاندن کو فەرید ئۆزۆن ژ ئالیێ عەشیرەتا بۆجاک ڤه‌ هاتییە کۆشتن.

 مەرەما پەکەکێ ژ ڤێ یەکی ئەو بوو کو به‌ره‌یه‌كێ شەری دگەل ڤێ عەشیرێ ڤه‌كه‌ت و ب ڤێ یەکێ بشێت گەلێ کورد یێ دەڤەرێ ل خوە کۆم بکەت، پشتی بۆرینا چەندین سالان ل سەر ڤێ تاوانێ چ کەسەکی راستییا کوشتنا فەرید ئۆزۆن ب دەستێ پەکەکێ نەزانی، لێ پشتی یه‌ك ژ سەرکرده‌یێن پەکەکێ یێن وێ دەمی دهێت دەستەسەر کرن ژ ئالیێ دەولەتێ ڤە، وی ب زەلالی د دانپێدانێن خوە دا هەر تشت ئەشکەرا كر و گۆتبوو: مە «پەکەکێ» ئەڤ چالاکییه‌! كربوو.

د مژارێن داهاتی دا، پێگه‌ها داركا مازی دێ به‌حس ل قۆناغ ب قۆناغ یا خه‌باتا تاری یا په‌كه‌كێ كه‌ت ژ دۆلا بیقاع تا هاتنا شنگالێ.

ل به‌ندا مه‌ بن

پوستێن ھەمان بەش