شێوه‌رمه‌نده‌كێ سه‌دام حسێنی ژبۆ سه‌رۆكایه‌تیێ كاندیده‌

شێوه‌رمه‌نده‌كێ سه‌دام حسێنی ژبۆ سه‌رۆكایه‌تیێ كاندیده‌

هلبژارتنا سه‌رۆكایه‌تیێ ل ولاتێ جه‌زایرێ ئیسال دێ بهێن كرن، یه‌ك ژ كاندیدێن ڤێ هلبژارتنێ، ئه‌حمه‌د شوتری یه‌، شێوه‌رمه‌ندێ تایبه‌ت یێ سه‌دام حسێنه‌ دیكتاتۆرێ ئیراقێ.

پشتی ئالۆزیا مه‌هێن رابووری ل جه‌زایرێ و دووركرنا سه‌رۆكێ ولات عه‌بدولعه‌زیز بوته‌فلیقه‌، كۆمیتا بلند یا سه‌ربخوه‌ یا هلبژارتنان ل 19 سێپتامبه‌رێ، بریار دا كو هلبژارتنا سه‌رۆكاتیێ ل 12 دیسامبه‌را ئیسالێ بهێنه‌ كرن.

كۆمیتا هلبژارتنێ هه‌روه‌ها فۆرمێن كۆمكرنا پشتیڤانیێ لسه‌ر كاندیدێن سه‌رۆكایه‌تیێ دابه‌شكرن، یه‌ك ژ وان ئه‌حمه‌د شوتری یه‌ كو خوه‌ وه‌كه‌ كاندیده‌كێ سه‌ربخوه‌ دده‌ته‌ ناسین.

ئه‌حمه‌د شوتری ل سه‌ر ده‌ما ده‌ستهلاتداریا رژێما به‌عس یا رۆخیایی، وه‌كه‌ شێوه‌رمه‌ندێ سه‌دام حسێن بۆ چه‌ند سالان كار كریه‌، دیسان جهێ باوه‌ریێ بوو ل جه‌م سه‌دام.

پشتی كو خوه‌ كاندید كری، ئه‌حمه‌د شوتری داخۆیانی دا و گۆتی: ژ بۆ به‌لاڤكرنا بیرۆك و پره‌نسیپێن حزبا به‌عس وی خوه‌ بۆ سه‌رۆكایه‌تیا جه‌زایرێ كاندید كریه‌.

هه‌رچه‌ند رژێما عه‌بدولعه‌زیز بۆته‌فلیقه‌ چالاكیێن حزبا به‌عس ل جه‌زایرێ قه‌ده‌غه‌ كربوو، ئه‌حمه‌د شوتری ئاماژه‌ دا كو ئه‌ڤ هلبژارتنه‌ ده‌رفه‌ته‌ ژبۆ ڤه‌گه‌رینا به‌عسیاتیێ كو وه‌كه‌ ئه‌و دبێژیت: حزبا به‌عس نها ژ سه‌رجه‌ما 48 پارێزگه‌هان، ل 30 پارێزگه‌هین جه‌زایرێ چالاكه‌ و پێگه‌ها خوه‌ هه‌یه‌.