پاسه‌وانێن پاراستنا ده‌ریایێ یێن توركیا ب سه‌دان كۆچبه‌رێن بێ ده‌ستوور ل ده‌ریایا ئیجه ده‌سته‌سه‌ركرن، وان هه‌ولا ده‌ربازبوونێ بۆ یۆنانێ دكر.
فه‌رمانداریا پاسه‌وانێن پاراستنا ده‌ریایێ یێن ولاتێ توركیا د به‌یانه‌كا نڤیسكی دا به‌لاڤكر، تیما وان شڤێدی پێتر ژ 720 كۆچبه‌رێن بێ ده‌ستوور د ده‌ریایا ئیجه دا ده‌سته‌سه‌ر كرن كو هه‌ولا ده‌ربازبوونێ بۆ ئالیێ ئورۆپا دكر، ئه‌و كۆچبه‌ر د چه‌ند به‌له‌مان دا بوون.
هات راگهاندن كۆچبه‌رێن كو هاتنه ده‌سته‌سه‌ر كرن یێن 3 رۆژێن بووری نه و ژ ولاتێن سووریا، ئیراق، لیبیا و باكوورێ ئه‌فریكایێ نه.
پاسه‌وانێن ده‌ریایێ ئه‌و چه‌نده ژی خوه‌یا كر كو هنه‌ك كۆچبه‌رێن دی یێن بێ ده‌ستوور هاتنه ده‌سته‌سه‌ر كرن، ده‌مێ هه‌ولا چوونا ئورۆپا ب مه‌له‌كرنێ كرین.
سه‌رۆكێ توركیا دوهی ئێڤاری د مژارا هه‌رێما ئارام یا رۆژهلاتێ فراتێ دا هشیاری دانه ئورۆپا كو ئه‌گه‌ر هاریكاری بۆ په‌نابه‌رێن سووری یێن ل توركیا نه‌هێن شاندن، ئه‌و دێ ده‌ریێ چوونا ئۆرۆپایێ ل وان په‌نابه‌ران ڤه‌كه‌ن.
