ئیرۆ رۆژا سێشەمی پارلەمەنێ کەنەدا دەنگ لسەر ب تەروریست ناساندنا سوپایێ پاسدارێن ئیرانێ دا و ژ حکوومەتا ولاتێ خوە خواست کو هەری زوو هەموو گوتوبێژان ب ئیرانێ رە قەدەخە بکەت.
ئەڤ چه‌نده ژ ئالیێ گارنت جینیسون، نوینەرێ پارێزگار هاتبوو پێشنیاز کرن و دەولەتا لیبرال يا كه‌نه‌دا د ڤێ دەنگدانێ دا دگه‌ل ڤێ پارتێ بوو.
ئەڤ یەک د دەمەکی دا یه کو ئاندریۆ شیر سەرۆکێ پارتا پارێزگارێن کەنەدا دیاركربوو كو گەر د هلبژارتنێن 21 ئەکتۆبەرێ دا سه‌ركه‌ت، دێ سپایێ پاسداران وەک گرۆپەکێ تەرۆریستی راگهینیت.
ئەندریۆ شیر ب راگهاندنکاران را گۆت: مە رژێما ئیرانێ کو هه‌رده‌م مافێن مرۆڤان پێشێل دکەت و ولاتیێن کەنەدا دەستەسەر دکەت و بەرەڤانی و پشتەڤانیێ ژ تەرۆرێ دکەت و پەیمانێن ناڤۆکی پشت گوه تێخە، وێ ب ئامانج وەرگرین.
ناڤهاتی هەروها راگهاند، ئەڤ بریارە د ئاراستا فشار دانانا لسەر ئیرانێ یە، مە ئیران ب ئارمانج وەرگرت ژبەر کو هه‌رده‌م مافێن مرۆڤان پێشێل دکەت، ژبەر ڤێ یەکێ ئەمێ سوپایێ پاسداران کو بەرەڤانیێ ژ ڤێ رژێمێ دکەت وەک گروپەکێ تەرۆریستی ب ناڤ كه‌ین.
هێژایی گۆتنێ یە کو د مه‌ها رابووری دا دەولەتا کەنەدا ب 10 ملیۆن دۆلاران سامانێ رژێما ئیرانێ ل کەنەدا دەستبسەردا گرت، چاڤکانیێن کەنەدایێ ئاشكرا كرن كو پشتی فرۆتنا سامانێ ده‌ستبسه‌ردا گرتی، داهاتێ وێ، وەک قەرەبوو ب قوربانیێن تەرۆرێ ل سەرتاسەری جیهانێ هاته دان.
پاش ڤێ یەکێ، ئیبراهیم رەئیسی سەرۆکێ دەستهەلاتا دادوەری ئا ئیرانێ، 16ێ سێپتامبه‌رێ به‌رسڤا كه‌نه‌دایێ دا و راگهاند ب هەڤکاری دگەل وەزارەتا کاروبارێن دەرڤە و بەشا ناڤدەولەتی یا دەسهەلاتا دادوەری یێن ئیرانی، ملک و مالێ دەولەتا کەنەدا ل ئیرانێ دێ هێته ئاشكرا كرن و پاش دێ ئیران دەست دانیته سەر ڤان ملک و مالێن کەنەدا.
بەری نها ئەمەریکا ژی ل دەسپێکا هەیڤا نیسانا 2019ێ سپایێ پاسدارێن رژێما ئیسلامی یا ئیرانێ د لیستا گرۆپێن تەرۆرێ دا دانابوو.
