عه‌لاوی پێشده‌ستیه‌ك ژ بۆ چاره‌سه‌ركرنا ره‌وشێ هه‌یه‌

عه‌لاوی پێشده‌ستیه‌ك ژ بۆ چاره‌سه‌ركرنا ره‌وشێ هه‌یه‌

رێبه‌رێ هه‌ڤپه‌یمانه‌تیا نشتیمانیا ئیراقی، ژ بۆ كو ره‌وشا پر ئالۆز چاره‌سه‌ر ببه‌، ئیرۆ پێشده‌ستیه‌ك همبه‌ری ده‌ستهلاتدارێن ولات كر كو 10 خالێن چاره‌سه‌ریێ ل خوه‌ دگره‌.

ئه‌یاد عه‌لاوی رێبه‌رێ هه‌ڤپه‌یمانه‌تیا نشتیمانی كو ب وه‌ته‌نیه‌ تێ ناس كرن، پێشده‌ستیه‌ك بۆ هێمنكرنا ره‌وشا پر ئالۆز یا ئیراقێ راگهاند كو ژ 10 خالان پێك تێ.

ئه‌ڤ ژی گرنگترین خالێن پێشده‌ستیا عه‌لاوی نه‌:

  • كارێن و ده‌ستهلاتێن ئه‌نجوومه‌نێن پارێزگه‌هێن ولات بهێن راگرتن.

  • حه‌سابكرنا قوربانیێن خوه‌نیشاندانان وه‌كه‌ شه‌هید.

  • حكوومه‌ت به‌رپرسیارا چاره‌سه‌ركرنا بریندارێن خوه‌نیشاندانێ ب ستۆیێ خوه‌ ڤه‌ بگریت.

  • خوه‌نیشانده‌رێن ده‌ست ب سه‌ر كری، سه‌ربه‌ست بهێن ئازادكرن.

  • په‌رله‌مان ده‌ستهه‌لاتێ بده‌ سه‌رۆكوه‌زیران ژبۆ چاكسازیان.

  • چاكسازی دووری حزباتیێ بهێنه‌ كرن.

  • دادگه‌هكرنا گه‌نده‌لان ل پێش چاڤێن گه‌ل.

  • لژنه‌ بۆ گۆتوبێژێن دگه‌ل خوه‌نیشانده‌ران بهێن پێكئانین.

  • قه‌ره‌بووكرنا زرار به‌ركه‌تیێن خوه‌نیشاندانان.

  • دابینكرنا مووچه‌یه‌كا گونجای ژبۆ بێكاران.

رێبه‌رێ هه‌ڤپه‌یمانه‌تیا نشتیمانی یا ئیراقێ دبێژیت: “ئه‌ڤ پێشده‌ستی چاره‌سه‌ریه‌كه‌ گونجایه‌ ژبۆ وێ ره‌وشا پر ئالۆز و خه‌ته‌ر كو ئیراق تێده‌ ده‌رباز دبه‌”.

پێله‌كه‌ هه‌ری دژوار یا نه‌رازیبوونێ ل سێشه‌مبیا بووری ل به‌غدا پایته‌ختا ئیراقێ ده‌ستپێكر، پشتره‌ خوه‌نیشاندان بۆ پارێزگه‌هێن باشوور هاتن ڤه‌گوهاستن، ئه‌و دخوازن حكوومه‌ت وه‌ره‌ هه‌لوه‌شاندن، هه‌ر وها ره‌وشا ئابوورا ولات بهێت باشكرن.

ژ ئه‌نجاما په‌ڤچوون و ئالۆزیا ل ناڤبه‌را خوه‌نیشانده‌ر و هێزێن ئه‌وله‌هیێ ژی، د چار رۆژێن خوه‌نیشاندانان ده‌، نێزی 100 كه‌سان هاتنه‌ كوشتن و هه‌ر وها 3 هزار بریندار ژی كه‌تنه‌.