سه‌رۆك كۆمارێ تركیێ ئیرۆ ژ ئاستا گه‌فێن خوه ژ بۆ چوونا ناڤچه‌یا رۆژهلاتێ فراتێ به‌رز كرن و وها گۆت: “ئاخفتن خه‌لاس بوو ئه‌مێ لڤینێ بۆ ناڤچه‌یا رۆژهلاتێ فراتێ ده‌ست پێ بكه‌ن”.
سه‌رۆكێ تركیێ ره‌جه‌ب ته‌یب ئه‌ردۆگان ئیرۆ رۆژا شه‌مبی 5/10/2019 ئه‌شكه‌ره كر، سپایێ ولاتێ وان دێ ئۆپه‌راسیۆنێن ئاسمانی و به‌ژاهیێ ل رۆژهلاتێ فراتێ یا باكوورێ سووریێ ده‌ست پێ بكه‌ت، پلانا ئێریشێ ب داوی بوویه و ته‌نێ بجیكرنا وێ مایه.
ئه‌ردۆگان دبێژه: “ئه‌مێ بچن رۆژهلاتێ فراتێ ژ بۆ كو ئاشێتیێ ل ور به‌رقرار بكن، ئاخفتن خه‌لاس بوویه ئه‌مێ خوه ل هێڤیا چ ژڤانه‌كێ دن نەگرن، رێنما ژ بۆ له‌شكه‌ران هاتنه شاندن و ته‌نێ هه‌ره‌كه‌ت مایه ده‌ست پێ بكه”.
ئه‌ڤ هۆشدار و گه‌فا ئه‌ردۆگان ژ بۆ ئه‌مه‌ریكایێ تێ ئاراسته كرن، ژ به‌ر كو ل حه‌فتیا بووری مۆله‌تا كو تركیێ ب ئه‌مه‌ریكایێ دای ب داوی بوویه، ل وێ ده‌مێ ئه‌ردۆگان گۆتبوو: “ئه‌گه‌ر واشنتۆنێ هه‌نگاڤێن جددی د پرسا ئاڤاكرنا هه‌رێما ئارام ده نه‌بن، تركی وێ ته‌كئالی هه‌ره‌كه‌تێ به‌ر ب رۆژهلاتێ فراتێ بكه.
هه‌رێما ئارام ل گور رێككه‌تنا ئه‌مه‌ریكا و تركیێ، دێ ل رۆژهلاتێ فراتێ بهێت ئاڤاكرن، تركی دبێژه: “پلانا وان بجیكرنا 3 ملیۆن ئاواره و په‌نابه‌رێن سووریێ یه ل وێ ناڤچه‌یێ، لێ به‌لێ ترسا گوهه‌رینه‌كه ده‌مۆگرافی ل وێ ناڤچه‌یێ هه‌یه.
