ویلایه‌تێن یه‌كبووی ئێن ئه‌مریكایێ فه‌رمان ل ئارته‌شا خوه كر كو هێزێن ل سووریێ ڤه‌كشینن، هه‌موه‌خت ده‌ستوورا ده‌ستپێكرنا ئێریشا سه‌ر رۆژهلاتا فراتێ، د ده تركیێ.
كۆچكا سپی ئا ئه‌مه‌ریكایێ، ئیرۆ سه‌رێ سبێ د به‌یانه‌كه نڤیسكی ده، هوندرێ په‌یوه‌ندیا دۆنالد ترامپ ئێ سەرۆکێ ئەمه‌ریکایێ و رەجەب تەیب ئەردۆگان ئێ سەرۆککۆمارێ تركیێ ئه‌شكه‌ره كر و وها نڤیساندنه: ل وه‌خته‌كا نێزیك ولاتێ تركیێ وێ ئۆپەراسیۆنا له‌شكری ل باكوورێ سووریێ ده‌ستپێكه‌ت، وه‌كه ئاماژه ژ بۆ ناڤچه‌یا ب ناڤێ رۆژهلاتێ فراتێ كو ل بن كۆنترۆلا هێزێن سووریا ئا ده‌مۆكراتیك (هه‌سه‌دێ) ده‌یه.
كۆچكا سه‌رۆكتیا ئه‌مه‌ریكا هه‌ر وها ئه‌شكه‌ره كر، ئارته‌شا ئه‌مه‌ریكایێ وێ له‌شكرێن خوه ژ ناڤچه‌یا ئۆپه‌راسیۆنێ ڤه‌كشینه و ته‌ڤلی ئۆپه‌راسیۆنێ نابه، ئێدی ئه‌و ناڤچه‌یه وێ ببه ژ به‌رپرساتیا تركیێ و ئارته‌شا ئه‌مه‌ریكایێ تو چالاكیه‌كا وێ ل ور نابه.
ئه‌ڤ یه‌ك ب رامانا دایینا ده‌ستوورا ده‌ستپێبوونا شه‌ر ل رۆژهلاتێ فراتێ تێ كو ئه‌مه‌ریكا ب سه‌رۆكێ تركیێ ره‌جه‌ب ته‌یب ئه‌ردۆگان ره داییه.
هه‌موه‌ختا ئه‌ڤێ گوهه‌رینا مه‌زن ئا د هه‌لوه‌ستا ئه‌مه‌ریكایێ ده ده‌ركه‌تیه هۆلێ، ئارته‌شا تركیێ ئاماده‌كاری ژبۆ ده‌ستپێكرنا هه‌ره‌كه‌تێ ژ بۆ رۆژهلاتێ فراتێ كرنه.
ل ئاستا ناڤچه‌یا باكوورێ سووریێ، فه‌رماندارێتیا هێزێن سووریا ئا دیمۆکراتیك (هه‌سه‌دێ)، هه‌لوه‌ستا خوه راگهاند و وها دایه خوه‌یا كرن: “ئه‌مه‌ریكایێ سۆزا خوه بجینه‌كر، له‌وما ئه‌مێ بێ فكر به‌ره‌ڤانیێ ژ خوه بكن”.
فه‌رماندارێتیا (هه‌سه‌دێ) دبێژه: ئەمه‌ریکایێ ل باکوورێ سووریێ سۆزێن خوه شكاندن، ئه‌ركێن خوه بجینه‌كرنه و وێ له‌شكرێن خوه ژ ناڤچه‌یێن سینۆران ڤه‌كشینه.
ب نه‌رینا (هه‌سه‌دێ)، ئێریشا كو تێ چاڤه‌رێ كرن تركی ببه سه‌ر ناڤچه‌یا رۆژهلاتێ فراتێ، وێ ببه سه‌ده‌ما ژناڤبرنا وێ ئه‌وله‌هیا كو وان لێ بجیكری.
هێزێن سووریا یا ده‌مۆكراتیك ل داویا به‌یانا خوه وها گۆتیه: ئامانجا مه ئا سه‌ره‌كه ژناڤبرنا ته‌رۆرێ یه، لێ به‌لێ هه‌ر وه‌ختا ئه‌و راستی ئێریشا تركیێ بوون، وێ بێ فكر به‌ره‌ڤانیێ ژ خوه بكن”.
ئه‌مه‌ریكایێ و تركیێ د ده‌ستپێكا مه‌ها ئۆكتۆبه‌رێ ده لهه‌ڤهاتن ژبۆ ئاڤاكرنا هه‌رێما ئه‌وله‌هیێ ل باكوورێ سووریێ كربوو، بریار بوو ئه‌و هه‌رێم ب هه‌ڤبه‌شی ل ناڤبه‌را تركیێ و ئه‌مه‌ریكایێ وه‌ره ئاڤا كرن، لێ ئه‌مه‌ریكایێ خوه ژ وێ لهه‌ڤهاتنێ ڤه‌كشاند، ئیرۆ ژی ده‌ستوورا ده‌ستپێكرنا ئێریشێ ب ئه‌نقه‌رێ دایه.
هه‌رێما ئه‌وله‌هیێ وه‌كه تركیێ د ده خوه‌یا كرن وێ ببه ناڤه‌ندا بجیكرنا 3 ملیۆن ئاواره و په‌نابه‌رێن سووری كو ل تركیێ نه، ئه‌ڤ ژی ب رامانا گوهه‌رینه‌كه ده‌مۆگرافیه ژبۆ رۆژهلاتێ فراتێ.
