سه‌كره‌ته‌رێ كۆمكارا ئه‌ره‌بی، ئیرۆ ل ده‌ربارا ئێریشا ل سه‌ر رۆژئاڤا كوردستانێ ئاخڤی و راگهاند، ده‌وله‌تا تركیێ ئا سووریێ داگیر دكه.
سه‌كره‌ته‌رێ كۆمكارا ئه‌ره‌بی ئیرۆ رۆژا شه‌می 12/10/2019ان پشتی جڤینا كۆمكارێ د پرێسكۆنفرانسه‌كێ ده گۆت: “ده‌وله‌تا تركیێ ب ئێریشا خوه ئا ل رۆژا چارشه‌می 9/10/2019ان ده‌ستپێكری، سووریێ داگیر دكه و سه‌روه‌ری ئا وێ پێشێل دكه”.
ئیرۆ گه‌را 155ان ئا جڤینا كۆمكارا ولاتێن ئه‌ره‌بی ل سه‌ر ئاستا وه‌زیرێ كارێن ده‌رڤه ل مسرێ برێڤه‌چوو، مهه‌مه‌د هه‌كیم وه‌زیرێ كارێن ده‌رڤه ئێ ئیراقێ سه‌رۆكتیا جڤینێ كر.
مهه‌مه‌د هه‌كیم ل جڤینێ ده، ئێریشا تركیێ ل سه‌ر باكوورێ سووریێ شه‌رمه‌زار كر و وها ئاخڤی: “ئه‌ڤ ئێریش وێ قه‌یرانێن مرۆڤی ئالۆزتر بكه، هه‌موه‌خت ئازارێن گه‌لێ سووریێ و وێ كارینا ته‌رۆریستان ژبۆ دوباره خوه رێخستنێ بهێز بكه”.
وه‌زیرێ كارێن ده‌رڤه ئێ ئیراقێ و هه‌ڤتایێ خوه ئێ لبنانی جبران باسیل ژ كۆمكارێ خوه‌ستن، ئه‌ندامه‌تیا سووریێ د كۆمكارێ ده وه‌ره ئه‌كتیڤ كرن.
هه‌موه‌ختا ڤان هه‌لوه‌ستان، ئیماراتا ئه‌ره‌بی ب رێیا وه‌زیرێ خوه ئێ كارێن ده‌رڤه د جڤینا كۆمكارێ ده، ژ تركیێ خوه‌ست ئێریشا سه‌ر سووریێ راوه‌ستینه و هه‌روها هێزێن خوه ژ ور ڤه‌كشینه.
