گره‌نتی بۆ خۆرتێن رۆژئاڤا د لهه‌ڤهاتنا هه‌سه‌دێ و رژیمێ ده‌ تونه‌یه‌

گره‌نتی بۆ خۆرتێن رۆژئاڤا د لهه‌ڤهاتنا هه‌سه‌دێ و رژیمێ ده‌ تونه‌یه‌

هێزێن سووریایا ده‌مۆكراتیك ل گه‌ل رژیما سووریێ لهاڤاتنه‌، لێ به‌لێ هینا نها گه‌لێ رۆژئاڤا تایبه‌ت چینا خۆرت و لاوان، هایا وان ژ مه‌رجێن لهه‌ڤهاتنا ل گه‌ل رژیمی تونه‌یه‌.

پشتی ده‌رباسبوونا 5 رۆژان ژ ئێریشا داگیركاری ئا تركیێ ل سه‌ر رۆژئاڤا كوردستانێ، هێزێن سووریایا ده‌مۆكراتیك په‌نایێ ژ بۆ هكوومه‌تا سووریێ دبه‌، رۆژا 13/10/2019ان ل هه‌ڤهاتنا هه‌سه‌دێ و رژیمی ژ بۆ پاراستنا رۆژئاڤا كوردستانێ ئیمزه‌ بوو، رووسیا فه‌ده‌رال ناڤگینی ژ بۆ وێ لهه‌ڤهاتنێ كربوو.

ل گور زانیاری ئێن هه‌ری تایبه‌ت ئێن پێگه‌ها داركا مازیێ كو ژ چاڤكانیێن خوه‌ ئێن رۆژئاڤا وه‌رگرتنه‌، ته‌ڤی كو رژیما سووریێ هینا حه‌فتیا بووری ئاماده‌نه‌بوو تو نیقاشه‌كێ ب هه‌سه‌دێ ره‌ بكه‌، لێ به‌لێ د شه‌ڤ و رۆژه‌كێ ده‌ وێ ئه‌ڤ هه‌لوه‌ست گوهه‌راند و لهه‌ڤهاتن ب هه‌سه‌دێ ره‌ كر.

چاڤكانی ئێن داركا مازیێ سه‌ده‌مێ رازیبوونا رژیما سووریێ ژ بۆ لهه‌ڤهاتنا ب هه‌سه‌دێ ره‌ ئه‌شكه‌ره‌ كر كو رژیمێ زه‌لال و ئه‌شكه‌ره‌ ب هه‌سه‌دێ ره‌ ئاخڤیه‌ و پێره‌ گۆتیه‌: پاراستنا هه‌وه‌ به‌رانبه‌ر خاكێ یه‌، هه‌سه‌ده‌ دبێژه‌: وان ئه‌ڤ مه‌رج ژ نه‌چاری قه‌بوول كرنه‌.

هه‌سه‌دێ خۆرتێن رۆژئاڤا ب مه‌رجێن رژیما ئه‌سه‌د هایدار نه‌كرنه‌

تشتا كو هینا نها زه‌لالی تێده‌ تونه‌یه‌، رژیما سووریێ هه‌ژماره‌كه‌ به‌رچاڤ ئا مه‌رجان دانانه‌ به‌ر سینگا هه‌سه‌دێ، نه‌ تنێ د مژارێن له‌شكری و سیاسی ده‌، به‌لكو هنه‌ك گرێدای ئالیێ مرۆڤاتی، جڤاكی و لێبوورینا ئامه‌.

چاڤكانی ئێن داركا مازی ل رۆژئاڤا كوردستانێ ده‌ستنیشان كرنه‌ كو هه‌سه‌دێ ئه‌و مه‌رج نخافتنه‌ و رێنه‌دانه‌ گه‌لێ رۆژئاڤا بزانبه‌، تایبه‌ت چینا خۆرت و لاوێن كورد كو ل سالێن بووری ده‌ ته‌ڤلی شه‌ر بوونه‌، ئایا وێ (ئه‌فو ئام) وان بگره‌، یان ئارته‌شا سووریێ وێ ره‌فتاره‌كه‌ دن ب وان ره‌ هه‌به‌.

ئه‌ڤێ بابه‌تێ ترسه‌كه‌ هه‌ری زێده‌ ل جه‌م رۆژئاڤا چێكریه‌، گه‌لێ رۆژئاڤا دخوازه‌ چاره‌نڤیسا وان زه‌لال به‌ و هه‌سه‌ده‌ راستیێ ژ وان نه‌ ڤه‌شێره‌.

خۆرتان ترس ژ له‌شكركرنا ب زۆری هه‌نه‌

چاڤكانی ئێن داركا مازیێ ل رۆژئاڤا ئه‌شكه‌ره‌ كرنه‌، تشتا كو خۆرتێن رۆژئاڤا پر ژێ دلگران بوونه‌، پرسا (له‌شكری ئا ب زووریه‌) كو وێ نه‌چار بن ب زووری ژ بۆ خزمه‌تا ئارته‌شا سووریێ وه‌رن برن.

هه‌ژماره‌كه‌ هه‌ری زۆر ئا خۆرت و لاوێن رۆژئاڤا دخوازن گه‌ر رێیه‌ك ژ بۆ وان هه‌به‌، ئه‌وێ ده‌رباسی باشوورێ كوردستانێ ببن.

ل ئالیێ دن، پشتی لهاڤهاتنا هه‌سه‌دێ و رژیما سووریێ، چاڤكانی ئێن داركا مازیێ ئه‌شكه‌ره‌ كرن كو دوهـ رۆژا دوشه‌می 14/10/2019 رژیما سووریێ ده‌ست ب به‌رزكرنا ئالا ده‌وله‌تێ ل دبستانێن رۆژئاڤا كرنه‌.

ل ئاستا مه‌یدانێ، هه‌سه‌دێ ژ وه‌ختا لهه‌ڤهاتنێ هینا ئیرۆ، هه‌ر یه‌ك ژ باژارێن كۆبانێ و منبجێ دانه‌ ده‌ست ئارته‌شا سووریێ و بجیكرنا خالێن دن ئێن لهه‌ڤهاتنێ ده‌وام دكه‌.

هنه‌ك خالێن لهه‌ڤهاتنا هه‌سه‌دێ و رژیما سووریێ

  • ئارته‌شا سووریێ ل سینۆری تركیێ و سووریێ دا بجی دبه‌.

  • ئارته‌شا سووریێ وێ بچه‌ ناڤا باژارێن كۆبانێ و منبجێ.

  • ئارته‌شا سووریێ وێ بچه‌ ناڤا ته‌بقه‌، به‌نداڤێن فراتێ، مه‌نسووره‌ ئێن سه‌ر چه‌مێ فراتێ.

  • راده‌ستكرنا پالاوگه‌هێن دێرازوورێ.

  • برێڤه‌برنا باژارێن رۆژئاڤا ب هه‌ڤبه‌شی دگه‌ل رژیمێ.