ئارته‌شا به‌شار ئه‌سه‌دی ئیرۆ ده‌رباسی باژارێن ره‌قایێ و منبجێ ئێن باكوورا سووریێ بوونه و خالێن چاڤدێری لێ دانینه.
ل گور لهه‌ڤهاتنا هێزێن سووریایا ده‌مۆكراتیك (هه‌سه‌ده) و هكوومه‌تا سووریێ، ئیرۆ رۆژا چارشه‌می 16/10/2019ان، هنه‌ك له‌شكرێن رژیما به‌شار ئه‌سه‌دی ده‌رباس بوونه باژارێن ره‌قایێ و منبجێ ئێن باكوورا سووریێ و جیێ خوه گرتنه.
چاڤكانی ئێن سووریێ ئه‌شكه‌ره كرنه، ئارته‌شا سووریێ ئالایا فه‌رمی ئا رژیمێ ل منبجێ هلدانه و هه‌موه‌خت خالێن خوه ئێن چاڤدێریێ ل ره‌قایێ بجی كرنه.
هێزێن سووریایا ده‌مۆكراتیك ل 13/ئۆكتۆبه‌را 2019ان ب ناڤگینی ئا رووسیا فه‌ده‌رال، ل هه‌ڤهاتن ژ بۆ به‌لاڤه‌بوونا ئارته‌شا سووریێ ل رۆژهلاتا فراتێ و باكوورا سووریێ كرن.
ل 14ێ ئۆكتۆبه‌رێ واته ب رۆژه‌كێ پشتی ئیمزه بوونا لهه‌ڤهاتنێ، له‌شكرێن رژیمی گهانه باكوورا ولات و ئه‌ڤ لهه‌ڤهاتن ب مه‌ترسی ل سه‌ر ژناڤچوونا ستاتۆیا رۆژئاڤا كوردستانێ تێ ب ناڤ كرن.
ته‌ڤی كو خال و به‌ندێن ل هه‌ڤهاتنا هه‌سه‌دێ و رژیمێ د به‌رژه‌وه‌ندی ئا دیمه‌شقێ ده‌نه، لێ به‌لێ هه‌سه‌ده دبێژه: وان ئه‌ڤ لهه‌ڤهاتن ژ نه‌چاری ئیمزه كر ژ بۆ كو گه‌ل نه‌یێ قڕكرن.
ئارته‌شا تركیێ ل 9 ئۆكتۆبه‌را 2019ان، ئێریشا داگیركاری ئا سه‌ر رۆژئاڤا كوردستانی ده‌ستپێكر، زرارێن جانی ئێن مه‌زن ب خه‌لكێ سڤیل ره خستنه.
