لهه‌ڤهاتنا ئه‌مه‌ریكا و تركیێ كوردێن رۆژئاڤا بێ ده‌ستهلات هشتن
ویلایه‌تێن یه‌كبوويی یێن ئه‌مه‌ریكا و تركیێ، لهه‌ڤهاتنا سه‌كناندنا ئێریشا سه‌ر رۆژئاڤا كوردستانێ پێك ئانین، ئه‌ڤێ لهه‌ڤهاتنێ ستاتۆیا رۆژئاڤا ژناڤبر، گه‌لێ كورد ل وێ په‌رچه‌یا كوردستانێ 7 سالان پاشده برن، ئه‌و سالێن 11 هزار خۆرتێن كورد جانێ خوه ژ بۆ گۆری كرین.
داركا مازی ل هه‌فتیا رابووری مژارا (راده‌ستكرنا ئێمانه‌تێ ژ ئالیێ هه‌سه‌دێ ب رژیما سووریێ) باس كربوو، د وێ بابه‌تێ ده، هه‌موو هوورگلیێن سیاسه‌تا پارتیا یه‌كیتیا ده‌مۆكراتیك PYD ژ سالا 2012ان هه‌یا ب داوی بوونا شه‌رێ ته‌رۆریستێن دائیشێ و هه‌ر وها پشتبه‌ستنا PYD ب قه‌ندیلێ و كانێ وێ سیاسه‌تێ چ ب سه‌رێ رۆژئاڤا كر، ئیرۆ ئه‌نجاما وێ سیاسه‌تێ بێهتر روهن و زه‌لال بوو، وه‌ختا ئه‌مه‌ریكایێ و تركیێ لهه‌ڤهاتنا ئه‌نقه‌رێ پێك ئانی.
ئه‌نجاما سیاسه‌تا PYD و باندۆرا قه‌ندیلێ ل سه‌ر رۆژئاڤا زه‌لال بوون
پشتی 9 رۆژان ژ ئێریشا داگیركاری ئا تركیێ ل سه‌ر رۆژئاڤا كوردستانێ، ئێڤارا رۆژا پێنجشه‌می 17/10/2019ان، ئه‌مه‌ریكایێ و تركیێ لهه‌ڤهاتنا سه‌كناندنا ئێریشا ل باكوورا سووریێ پێك ئانین، ئه‌ڤ لهڤهاتن ب هه‌ری خراب د دیرۆكا گه‌لێ رۆژئاڤا ده تێ هه‌ژمارتن، ژ به‌ر كو تو ده‌ستهلاته‌ك د ده‌ست كوردان ده نه‌هشت، هه‌موه‌خت ستاتۆيا رۆژئاڤا كوردستانێ هه‌ری زێده لاواز و بێ رومه‌ت كر، سیاسه‌تا شاش ئا ده‌ستهلاتا رۆژئاڤا PYD، باندۆرا قه‌ندیلێ ل سه‌ر وێ ده‌ستهلاتێ، ئه‌نجاما وێ ل 13 ئۆكتۆبه‌رێ هنه‌كی زه‌لال بوو، ل 17 ئۆكتۆبه‌رێ ب ئاوایه‌كه هه‌ری دیار و به‌رچاڤ ده‌ركه‌ت هۆلێ.
جهگرێ سه‌رۆكێ ئه‌مه‌ریكایێ مایك پێنس، ئیرۆ دگه‌ل سه‌رۆكێ تركیێ ره‌جه‌ب ته‌یب ئه‌ردۆگان جڤیا و نیقاشا سه‌كناندنا ئێریشێ كرن، ئه‌نجام ب ئیمزه كرنا لهه‌ڤهاتنه‌كه هه‌ری باش ژ بۆ زلهێزێن جیهانێ و هه‌ری خراب ژ بۆ كوردان ژ وێ نیقاشێ ده‌ركه‌ت هۆلێ.
ل گور لهه‌ڤهاتنێ، تركیێ ئاگربه‌ست ئیلان كر و د وه‌ختا 120 ده‌مژمێرێن بهێن ده، ئۆپه‌راسیۆنا (كانیا ئاشێتیێ) وێ وه‌ره سه‌كناندن، د ڤێ ده‌مێ ده یه‌كینه‌یێن پاراستنا گه‌ل YPG و هێزێن سووریایا ده‌مۆكراتیك HSD وێ ژ ناڤچه‌یا ب ناڤێ (هه‌رێما ئه‌وله‌هیێ) ڤه‌كشن.
ئه‌مه‌ریكا و تركیێ ب ڤێ لهه‌ڤهاتنێ وێ پابه‌ندی ئاڤاكرنا هه‌رێما ئه‌وله‌هیێ ل گور رێسایێن ناڤنه‌ته‌وه‌ئی بن، ئه‌ڤ ژی خالێن لهه‌ڤهاتنێ نه:
– سه‌كناندنا ئۆپه‌راسیۆنا تركیێ د ده‌ما 120 ده‌مژمێران ده.
– ب كووراهیا 32 كیلۆمه‌تران YPG و HSD وێ ژ سینۆرێ تركیێ پاشده زڤرن.
– پشتی ڤه‌كشاندنا YPG و HSD تركی وێ ئاگربه‌ستا ته‌مام ئیلان بكه.
– ئه‌مه‌ریكا و تركیێ وێ ب هه‌ڤبه‌شی ئیداره‌یا زیندانێن دائیشێ بكن.
– ئه‌مه‌ریكا و تركیێ وێ ب هه‌ڤبه‌شی دژی دوباره ده‌ركه‌تنا دائیشێ راوه‌ستن.
– دڤێ هه‌موو پێكهاتێن باكوورا سووریێ پاراستی بن
– تركیێ وێ هه‌رێما ئه‌وله‌هیێ ل رۆژهلاتا فراتێ تا سینۆرێن ئیراقێ ئاڤا بكه
تركیێ روویێن خوه ئێن ره‌ش سپی كرن، ئه‌مه‌ریكا و رووسیا مفادارێن سه‌ره‌كه‌نه
ب ڤێ لهه‌ڤهاتنێ تركیێ پشتی 9 رۆژێن ئێریشا هۆڤانه ئا ل سه‌ر رۆژئاڤا كوردستانێ، روویێن خوه ئێن ره‌وش ل به‌رانبه‌ر جڤاكا ناڤنه‌ته‌وه‌ئی ب ئیلان كرنا ئاگربه‌ستی سپی كرن، پیلانا سه‌ر كوردان جهـ گرت، ئه‌مه‌ریكا و رووسیا فه‌ده‌رال مفادارێن سه‌ره‌كه ئێن لهه‌ڤهاتنا ئه‌نقه‌رێ نه، ژ به‌ر كو رووسیا كاری ل پێكهاتنا HSD و رژیما سووریێ ئا 13 ئۆكتۆبه‌رێ، ئارته‌شا سووریێ ڤه‌گه‌رینه رۆژئاڤا، ئه‌مه‌ریكا ژی سه‌رساغ ده‌ركه‌ت، چونكه ب زه‌برا وێ ئێریشا سه‌ر رۆژئاڤا هات سه‌كناندن، ل هه‌ڤهاتنێ ته‌نێ كوردێن رۆژئاڤا تونه كرن و بێ تو ده‌ستهلاته‌ك نه‌هشتن.
نها و پشتی لهه‌ڤهاتنێن ئه‌نقه‌رێ، هه‌موه‌خت لهه‌ڤهاتنا HSD و رژیمێ، ئارته‌شا سووریێ كه‌تیه د رۆژئاڤا كوردستانێ ده، خۆرتێن رۆژئاڤا ژی هایا وان ژ چاره‌نڤیسا وان تونه‌یه، ژبه‌ر كو (گره‌نتی ژ بۆ وان د لهه‌ڤاتنێ ده تونه‌یه).
