ئه‌وله‌هیا سلێمانیێ: بوویه‌ر خوه‌كوشتن بوو و مه‌له‌ف هات داخستن

مژارا مه‌دیاكار (ئامانج بابانی) و هه‌ڤژینا وی (لانه‌ مهه‌مه‌د)ێ و كوڕێ وان (هامۆ) ئێ 3 سال، بابه‌تا هه‌ری گه‌رما‌ هه‌رێما باشوورێ كوردستانێ یه‌.

ته‌ڤی كو هێزێن ئه‌وله‌هیێ و پشكنین ئه‌دلیا ته‌ندروستیێ پشتراست كرنه‌ كو ئه‌و بوویه‌ر خوه‌ كوشتنه‌، لێ به‌لێ راستی نه‌ ئه‌ڤه‌، ئامانج بابانی د پیلانه‌كه‌ هه‌ر چه‌پل و قرێژ ئا ئیسخباراتی ده‌ (ده‌زگای زانیاری) ئێ سه‌ر ب یه‌كێتیا نشتیمانی ئا كوردستانێ ڤه‌، هاتیه‌ ته‌رۆر كرن.

ل شه‌ڤا چارشه‌می 16 ئۆكتۆبه‌را 2019ان، مه‌دیاكار ئامانج بابانی ل گه‌ل كوڕ و هه‌ڤژینا خوه‌ ل ته‌رمینالا شاره‌زۆرا ناڤچه‌یا سلێمانیێ د ناڤا ئه‌ره‌به‌یا خوه‌ دا تێ گولله‌باران كرن، هه‌ر زوو هكوومه‌تا باشوور، هه‌ژماره‌كه‌ هه‌ری زێده‌ ئا رایه‌داران، ئه‌و بوویه‌ر ب ته‌رۆركرن دانه‌ ناساندن و خوه‌ستن هه‌ر د زوو ده‌ له‌كۆلین بێ كرن و ئه‌نجام ئه‌شكه‌ره‌ ببن.

ل سه‌رێ سبێ یا رۆژا پێنجشه‌می 17/10/2019ان، د كۆنفه‌ره‌نسه‌كه‌ چاپه‌مه‌نیێ ده‌، برێڤه‌به‌ریا پۆلیسێن باژارێ سلێمانیێ ل گه‌ل تیمێن تایبه‌ت ئێن ئه‌دلیا ته‌ندروستیێ، داخویانی دا كو ئه‌و بوویه‌ره‌ خوه‌ كوشتن بوو.

برێڤه‌برێ پۆلیسان گۆت كو گولله‌ ژ ناڤا ئه‌ره‌بێ هاتنه‌ ئاڤێتن، 2 گولله‌ ب به‌ر سه‌رێ لانه‌ مهه‌مه‌د كه‌تنه‌، 3 گولله‌ ب هامۆ ئێ كۆرێ ئامانج كه‌تنه‌، پشتره‌ ئامانج داوی ب ژیانا خوه‌ ئانیه‌، مه‌له‌ف هات داخستن.

مالباتا لانه‌: كه‌چا مه‌ ئا رند نكاری سه‌رساغ ته‌لاقێ ب داوی بكه‌

پشتره‌ و ل ئێڤارا دوهـ رۆژا ئه‌ینی مالباتا لانه‌ مهه‌مه‌دێ به‌یانه‌كه‌ نڤیسكی ژ بۆ جادا كوردستانێ وه‌شاند و تێده‌ ب زه‌لالی به‌هسا كریزه‌كێ كرنه‌ كو ل نێڤبه‌را ئامانج و كه‌چا وان ئا رند ده‌ هه‌بوو. وان وها د به‌یانا خوه‌ نڤیساندبوو: كه‌چا ما ئا جوانه‌ مه‌رگ نه‌ یه‌كه‌مین ژنه‌ هه‌ولا ته‌لاقێ ژ زلامێ خوه‌ دكر، پرسگرێكێن وێ هه‌بوون، لێ به‌لێ قه‌ده‌رێ نه‌هشت ئه‌و سه‌رساغ وێ ته‌لاقێ ب داوی بكه‌.

ل ڤر گه‌لێ باشوور ب تایبه‌ت چالاكێن كو ل سۆشیال مه‌دیایێ ئه‌ڤ بابه‌ت د شۆپاندن، ب دۆكیۆمه‌نتێن پۆلیسان و به‌یانا مالباتا لانه‌ رازی نه‌بوون، شكباریا وان ل پیلانه‌كێ بوو و وان باوه‌ر ژ گۆتنێن پۆلیسان نه‌ ئانین.

چاڤكانیێن داركا مازیێ ده‌ست نیشان كرن كو ئامانج بابانی هه‌ڤژینا خوه‌ و كۆرێ خوه‌ هامۆ ئێ 3 سال نه‌ كوشتنه‌، لێ به‌لێ پیلانه‌كه‌ پڕ چه‌پل و هه‌ری قرێژ ژبۆ ته‌رۆر كرنا وان هاتبوو دانین.

لانه‌ تێكلیه‌كه‌ ئه‌ڤینی ب پۆلات شێخ جه‌نگی هه‌بوو

((راسته‌ ئامانج و لانه‌ پرسگرێن پڕ زه‌همه‌ت د نێڤبه‌را وان ده‌ هه‌بوون، لێ ئیخانه‌ت بابه‌تا سه‌ره‌كه‌ بوو، وه‌ختا ئامانج نهێنیا هه‌ڤژینا خوه‌ و كه‌سه‌كێ دیار ئێ ناڤ پارتیا یه‌كیتیا نشتیمانی ئا كوردستانێ ئه‌شكه‌ره‌ كری، بابه‌تا ته‌لاقێ هه‌ر راست ده‌ركه‌ت هۆلێ، لانه‌ ته‌لاق خوه‌ست)).

((لانه‌ تێكلیه‌كه‌ سۆزدتر ب پۆلات شێخ جه‌نگی هه‌بوو كو ب پۆلات تاله‌بانی ژی تێ ناسكرن، ئه‌و برایێ لاهۆر شێخ جه‌نگی ئێ سه‌رۆكێ ئیستخباراتا یه‌كێتی (ده‌زگای زانیاری) یه)). چاڤكانیێن داركا مازی ئه‌ڤ پێزانین وها ڤه‌گوهاستنه‌.

DNA  ته‌سبیت كربوو هامۆ ژ ئامانج چێنه‌بوویه‌

((ئامانج بابانی، ل مه‌ها 5/2019ان تێكلیا نه‌ مه‌شرووع ئا هه‌ڤژینا خوه‌ ئه‌شكه‌ره‌ كربوو، لانه‌ هه‌ر د زوو ده‌ ته‌لاق ژ ئامانج خوه‌ست، لێ به‌لێ ئامانج ده‌ڤ ژێ به‌رنه‌دا، وی شك و گومان ژ كۆرێ خوه‌ هامۆ ژی هه‌بوو، ژبه‌ركو هه‌موه‌ختا ئه‌شكره‌ كرنا وێ تێكلیێ، ئامانج تێ هایدار كرن كو بلا شكا وی ل كوڕێ وی هامۆ ژی هه‌به‌، دبه‌ ئه‌و نه‌كۆڕێ وی به‌)).

ل ڤر ئامانج ب شاسوار ئه‌بدولواهد ره‌ جڤیا و هه‌ڤدیتن پێك ئانی، وی چیرۆكا لانه‌ ئا هه‌ڤژینا خوه‌ و پۆلاتێ شێخ جه‌نگی ب شاسوار ره‌ گۆ، ل ڤر شاسوار رێ ژ بۆ ئامانج خوه‌ش كر كو پشكنینا DNA ژ بۆ هامۆ وه‌ره‌ ئه‌نجام دایین، شاسوار ئه‌بدولواهد ب رێیا نۆشداره‌كه دۆست ئه‌ڤ رێخوه‌ش كرن ژ بۆ ئامانج كربوو، نۆشدارێ پشكنین كر و ئه‌نجام دانه‌ ئامانج و تیدا ب زه‌لالی هاتبوو نڤیساندن كو (هامۆ نه‌ ژ ئامانج چێبوویه‌).

ل یه‌كه‌مین مه‌جلیسا دادگه‌ها ده‌ستپێكرنا مه‌له‌فا ته‌لاقا ئامانج و لانه‌، ئامانج پشكنینا هامۆ دانا به‌ر سینگا دادوه‌ر.

دژه‌ ته‌رۆرا ده‌زگای زانیاری نۆشدارا كو پشكنینا DNA بۆ هامۆ كری بنچاڤكر

((پشتره‌ هێزه‌كه‌ سه‌ر ب دژه‌ ته‌رۆرا (ده‌زگای زانیاری) ب سه‌ر مالا نۆشدارێ ده‌ دگرن و بنچاڤ دكن، نۆشدار نه‌چار كر كو ل دادگه‌هێ گۆتنه‌كه‌ دن بكه‌، وێ ب دادوه‌ران ره‌ گۆ كو وێ ژبۆ خاترا شاسوار ئه‌نجاما پشكنێنی وها نڤیساندیه‌. لێ د راستی ده‌، پشكنین ل ده‌رڤه‌ ولات هاتبوو ئه‌نجام دایین، شاسوار ئه‌بدولواهد ب رێیا وی نۆشدار رێ خوه‌ش كر و په‌ره‌ ژی ژ بۆ دابوو)).

ئامانج نه‌چار بوو ژ دادگه‌هێ بخواز كو پشكنینا هامۆ جاره‌كه‌ دن وه‌ره‌ ئه‌نجام دایین، ل هه‌ولێرێ یان به‌خدایێ یان ل ده‌رڤه‌ی ولات، دادوه‌ر ژی ئه‌ڤ پێشنیاز په‌ژراندبوو.

((رۆژا 17/10/2019ان مه‌جلسا دادگه‌ها سلێمانیێ ب نیاز بوو بریارا داویێ ل سه‌ر مه‌له‌فا ته‌لاقێ بده‌، لێ به‌لێ ئامانج بابانی موكر بوو، به‌را ده‌ستپێكرنا دادگه‌هێ، ئه‌و كۆنفه‌ره‌نسه‌كه‌ چاپه‌مه‌نیێ ل به‌ر ده‌ریێ دادگه‌هێ ل دار بخه‌ و راستیا ده‌ربخه)).

ل ڤر مالباتا لانا هه‌موه‌خت پۆلات شێخ جه‌نگی باش فام دكرن كو ئامانج وێ راستیان ب ده‌رخینه‌، خوشكا لانا په‌یوه‌ندی ب ئامانج كر ژبۆ كو ژ وێ بریارا خوه‌ یا ل دارخستنا كۆنفه‌ره‌نسا چاپه‌مه‌ندیێ پاشده‌ بچه‌، لێ ئامانج موكر بوو ده‌ڤ ژ گۆتنا راستیێ به‌رنه‌ده‌ و هه‌ر كه‌س ب ئیخانه‌تا لانه‌ هایدار ببه‌.

پۆلات شێخ جه‌نگی پیلانا ته‌رۆركرنا ئامانج و لانه‌ ئاماده‌كر

پشتره‌ و ب فه‌رمانا پۆلات شێخ جه‌نگی پیلانا ته‌رۆر كرنا ئامانج تێ به‌رهه‌ڤ كرن، ل 16/10/2019ان لانه‌ په‌یوه‌ندیێ ب ئامانج دكه‌ وپێره‌ دبێژه‌ كو به‌را كو تو سبه‌ راستیان د كۆنفه‌ره‌سنه‌ك چاپه‌مه‌نیێ ده‌ ئه‌شكره‌ بكی، نوونه‌ره‌كێ پۆلات شێخ جه‌نگی هه‌یه‌ دخواز ئیشه‌ڤ نیقاشه‌كێ ب هه‌ڤره‌ پێك بینن. ئامانج رازی دبه‌ و ل سه‌ر بانگا لانه‌ دچه‌، هایا لانه‌ ژ پیلانێ هه‌بوو، لێ وێ فام نه‌دكر وێ چ چێببه‌.

لانه‌ ب ئامانج ره‌ گۆتبوو: پێویسته‌ ده‌مانجه‌ ب ته‌ره‌ به‌، ژ بۆ كو كه‌سێن كو وێ ل گه‌ل بجڤین چه‌كێن وان هه‌نه‌، ژ بۆ كو تو تشته‌كا خراب روونه‌ده‌. زێره‌ڤانێن پۆلات شێخ جه‌نگی ئه‌ڤ ب لانه‌ گۆتبوو.

((پیلان ئه‌و بوو كو تیما دژه‌ ته‌رۆرێ ئا ده‌زگای زانیاری خاله‌كێ ل سه‌ر رێیا ئامانج ل نێزی ته‌رمینالا شاره‌زۆرێ پێك بینن، ئه‌ره‌به‌یا ئامانج وێ وه‌ره‌ پشكنین كرن، پشتره‌ وێ ب ئامانج ره‌ ببێژن: ئه‌مێ ته‌ ده‌سته‌سه‌ر بكن، ده‌مانجا بێ ده‌ستوور ب ته‌ره‌یه‌، د وێ ده‌مێ ده‌، پێویسته‌ لانه‌ ب ئامانج ره‌ ببێژه‌ ئه‌ڤ چ چه‌كه ب ته‌ره‌‌، پرسگرێكێن مه‌ هه‌نه‌، ژ خوه‌ دێ من بكوژی)).

هایا لانه‌ ژ پیلانێ هه‌بوو، لێ به‌لێ وێ هایا وێ نه‌بوو كو ئه‌و ژی وێ وه‌ره‌ كوشتن

زێرڤانێن پۆلات وها لانه‌ ب پیلانێ هایدار كربوو، لێ به‌لێ هایا وێ نه‌بوو كو ئه‌و وێ وه‌ره‌ كوشتن، ئه‌ره‌به‌یا ئامانج گها جیێ كو ژ بۆ هاتیه‌ ده‌ست نیشان كرن، تیما دژه‌ ته‌رۆرێ ب وێ ده‌مانجێ ئامانج كوشتن، هه‌موه‌خت لانا و كۆرێ وان هامۆ، ژ بۆ كو بۆ رایا گشتی وه‌ره‌ ته‌سبیت كرن كو ئامانج تۆلا خوه‌ ژ لانه‌ ل سه‌ر پرسه‌كه‌ ئیخانه‌تێ كرنه‌، هه‌موه‌خت وه‌ره‌ ته‌سبیت كرن كانێ چما ئامانج 3 گولله‌ ل هامۆ دانه‌.

ئيستخباراتا زانياری گه‌فا خه‌ساندنێ ل شاسوار ئه‌بدولواهد كربوو

داركا مازی ئه‌ڤ زانیاری ژ هنه‌ك چاڤكانی ئێن تایبه‌ت وه‌رگرتنه‌ و وه‌كه‌ خوه‌ وه‌شاندن، نه‌ ته‌نێ ل سه‌ر ته‌رۆركرنێ، لێ به‌لێ ل سه‌ر هنه‌ك كارمه‌ندێن NRT و هه‌یا سه‌رۆكێ سازیا نالیا و ته‌ڤگه‌را نه‌وه‌ی نوێ شاسوار ئه‌بدولواهد كو پرانی ئا وان ل بن ته‌هدیدێن ده‌زگای زانیاری هاتنه‌ گه‌ف كرن كو گه‌ر هه‌ر هۆرگلیه‌كه‌ ڤێ بابه‌تێ وه‌ره‌ ده‌رخستن، ئه‌نجاما وێ دێ كاره‌ساتباری به‌ ژ بۆ وان، مینا گه‌فا سۆتنا باره‌گه‌ها تۆرا NRT كو ل شاسوار كرنه.