ئه‌لمانیا به‌هسا شاندنا ئه‌سكه‌ران بۆ رۆژئاڤا كوردستانێ دكه‌

وه‌زیرا به‌ره‌ڤانیا ئالمانیایێ ل دۆر مه‌له‌فا باكوورا رۆژهلاتا سووریێ داخویانی دا و گۆت: نه‌دووره‌ ده‌وله‌تا وان ئه‌سكه‌ران بشینه‌.

وه‌زیرا به‌ره‌ڤانیا ئالمانیایێ، ئانگرێت كرامپ كارێنپاور، دوهـ شه‌ڤێ ل ده‌ربارا ئاڤاكرنا هه‌رێما ئه‌وله‌هیێ ل باكوورا رۆژهلاتا سووریێ ئاخڤی و گۆ كو پێویسته‌، هه‌رێمه‌ك ل باكوورێ سووریێ ژ بۆ پاراستنا په‌نابه‌ران و گارانتی كرنا ته‌كۆشینا ل دژی دائیشێ وه‌ره‌ ئاڤاكرن.

هه‌ر وها گۆت: ده‌وله‌تا ئالمانیایێ وێ ڤێ پێشنیازێ ب هه‌ڤپه‌یمانێن خوه‌ ئێن ناتۆیێ ره‌ نیقاش بكه‌.

كارێنپاور ده‌ست نیشان كر كو ده‌رفه‌ته‌ك هه‌یه‌ ده‌وله‌تا وان ئه‌سكه‌رێن خوه‌ بشینه‌ باكوورا رۆژهلاتا سووریێ و ته‌كه‌ز كر كو ئه‌ڤ بریار د ده‌ست پارله‌مه‌نێ ده‌یه‌.

ل ده‌ربارا ئێریشا داگیركاری ئا ئارته‌شا تركیێ و چه‌ته‌یێن وان ل باكوورا رۆژهلاتا سووریێ، وه‌زیرا ئالمانیایێ دبێژه‌: نكارین ل ڤێ ده‌ربارێ ده‌ ده‌ست ڤالا بمینن.

كارێنپاورێ پێشنیاز كر كو هه‌رێمه‌كا ئه‌وله‌هیێ ل باكوورا رۆژهلاتا سووریێ ئاڤا بكن، ب مه‌رجێ كو جڤاكا ناڤنه‌ته‌وه‌ئی ب هه‌ماهه‌نگی ئا تركیێ و سووریێ چاڤدێریێ لێ بكه‌.