ترامپ: «مه‌ به‌غدادی كوشت، جیهان سه‌لامه‌ت بوو»

ترامپ: «مه‌ به‌غدادی كوشت»

سه‌رۆكێ ویلایه‌تێن یه‌كبووی ئێن ئه‌مه‌ریكا ئێڤارا ئیرۆ رۆژا یه‌كشه‌می، كوشتنا خه‌ته‌رترین ته‌رۆریستێ جیهانێ ئه‌بو به‌كر به‌غدادی یێ رێبه‌رێ رێخستنا ته‌رۆریستیا دائیشێ راگهاند.

سه‌رۆكێ ئه‌مه‌ریكایێ ئێڤارا ئیرۆ رۆژا یه‌كشه‌می 27/10/2019ان، جڤینه‌كه‌ چاپه‌مه‌نیێ ل دارخست و تێده‌ ئه‌شكه‌ر كر، ئارته‌شا ئه‌مه‌ریكایێ ئیرۆ ل سائه‌ت 5:00 سه‌رێ سبێ، سه‌ركردێ ته‌رۆریستان یێ ب ناڤێ «ئه‌بو به‌كر به‌غدادی» رێبه‌رێ رێخستنا ته‌رۆریستیا دائێشی كوشت.

ترامپ وها ئاخڤی: به‌غدادی ل ده‌ما كو زانی وێ ب دیل وه‌ره‌ گرتن، خوه‌ ته‌قاند و سێ خۆرتێن خوه‌ ل گه‌ل خوه‌ كوشتن، وی ب رێیا كه‌مه‌ره‌كه‌ مین كری خوه‌ ته‌قاند.

سه‌رۆكێ ئه‌مه‌ریكایێ ته‌سبیت كر ژ به‌ر خوه‌ ته‌قاندنێ، جه‌سه‌دا به‌غدادی ژناڤچوویه‌، لێ به‌لێ تێستێن DNA سه‌راست كرنه‌ كو كه‌سێ هاتیه‌ كوشتن، ئه‌بو به‌كرێ به‌غدادی ب خوه ‌یه.

سه‌رۆكێ ئه‌مه‌ریكایێ دبێژه‌: ته‌ڤی كو ل سێ سالێن رابووری ئه‌مه‌ریكا ب دووڤ جیێ به‌غدادی د گه‌ریا، لێ به‌لێ ل 2 هه‌فتیێن رابووری وان ته‌ئقیبه‌كه‌ هه‌ری زێده‌ كر و كارین سه‌ركه‌تیانه‌ ئۆپه‌راسیۆنا كوشتنا وی بجی بكن.

ل ده‌ره‌با جیێ كو رێبه‌رێ دائیشێ لێ هاتیه‌ كوشتن، دۆنالد ترامپ دبێژه‌: وه‌ختا كو به‌غدادی هاتیه‌ حه‌سار دان وی خوه‌ ل ناڤ تۆنێله‌كێ ده‌ ته‌قاند، سێ خۆرتێن خوه‌ ژی ل گه‌ل خوه‌ كوشتن، ئۆپه‌راسیۆنێ دو سائه‌تان ده‌وام كر.

ترامپ د به‌شه‌كا گۆتنێن خوه‌ دا گۆت: مه‌ به‌غدادی وه‌كه‌ كوچكه‌كی كوشت و جیهان سه‌لامه‌ت بوو.

سه‌رۆكێ ئه‌مه‌ریكایێ سپاسیا وه‌لاتێن كو به‌شداری ئۆپه‌راسیۆنا كوشتنا به‌غدادی بوونه‌ وه‌كه‌ رووسیا فه‌ده‌رال و ئیراقێ، هه‌موه‌خت گۆت: ئه‌م سپاسیا كوردێن سووریێ دكن كو ئالیكاریا وان د كوشتنا به‌غدادی ده‌ هه‌بوو.