سه‌رۆكێ ئه‌نجوومه‌نا ئه‌ورۆپایێ ئیرۆ ئه‌شكه‌ره كر، ولاتێن ئه‌ندام د یه‌كیتیا ئه‌ورۆپایێ ده رازیبوونه كو جودابوونا به‌ریتانیایێ بۆ سالا 2020ان وه‌ره پاشخستن.
سه‌رۆكێ ئه‌نجوومه‌نا یه‌كیتیا ئه‌ورۆپایێ دۆنالد توسك، ئیرۆ رۆژا دوشه‌می ل ده‌ربارا جودابوونا به‌ریتانیا ژ یه‌كیتیێ داخوه‌یانی دا و وها ئاخڤی: ولاتێن ئه‌ندام رازیبوونه ل 31/1/2020ان ژ یه‌كیتیا ئه‌ورۆپایێ جودا ببه.
جودابوونا به‌ریتانیا ژ یه‌كیتیا ئه‌ورۆپا كو ب برێكزت تێ ناس كرن، د هه‌یاما ده‌ستهلاتداریا خوه ده ترێزا مه‌یێ ئا سه‌رۆك وه‌زیرێن به‌ریتانیایێ، ته‌كۆشینه‌كه هه‌ری زیده ژ بۆ كر ب مه‌به‌ستا سه‌رخستنا پرۆژه‌یا جودابوونێ، لێ به‌لێ تو لهه‌ڤهاتن نه ده‌ركه‌تن هۆلێ، په‌رله‌مانا به‌ریتانیا ژی رازینه‌بوو جودابوو بێی لهه‌ڤهاتن وه‌ره كرن و ئه‌و یه‌ك بۆ سه‌ده‌ما ده‌ستبه‌ردانا ترێزا مه‌ی ژ سه‌رۆك وه‌زیریا به‌ریتانیایێ.
دۆنالد توسك ئیرۆ رۆژا دوشه‌می ل ئه‌كاونتا خوه ئا تویته‌رێ وها نڤیساند: 27 ولاتێن ئه‌ندام یێن یه‌كیتیا ئه‌ورۆپایێ ل سه‌ر داخوازا به‌ریتانیا رازیبوونه كو برێكزت ل 31/1/2020ان وه‌ره ئه‌نجام دایین.
ل سالا 2016ان ره‌فه‌راندووما ده‌ركه‌تنا به‌ریتانیا ژ یه‌كیتیا ئه‌ورۆپایێ هات پێك ئانین، تێده 51.9% یا گه‌لێ به‌ریتانیا ده‌نگ ژ بۆ جودابوونێ دا، ب وێ سه‌ده‌مێ ده‌یڤد كامیرۆن سه‌رۆك وه‌زیرێ به‌ریتانیا ده‌ست ژ كار كێشا، ژبه‌ر كو ئه‌و د ئه‌نیا دژه برێكزتێ ده بوو.
