ئیرۆ 7 سال ل سەر شاندنا پێشمەرگەهان ژ بۆ کۆبانێ دەرباس دبن، د رۆژەکا وەک ئیرۆ دا ل سالا 2014ێ، مەسعوود بارزانی سەرۆکێ هەرێما کوردستانێ و فه‌رماندارێ هێزێن وێ یێن چەکدار، فه‌رمان كر هێزێن پێشمه‌رگه د هاوارا كۆبانێ دا بچن ژ بۆ كۆ نه‌كه‌ڤیته ده‌ست ته‌كفیریێن داعشێ، په‌رله‌مانێ كوردستانێ هه‌ر د زوو دا و ل سه‌ر فه‌رمانا سه‌رۆك جڤینه‌كا بله‌ز چێكر و پرۆژه بریارا هه‌ژمار 28 ل 22یێ چریا یەکەمین ئا سالا 2014ێ پەژراند، پشتره ل 28 هه‌مان مه‌هێ، یه‌كه‌مین هێزا پێشمەرگەهان ب چه‌كێن خوه یێن گران ڤه، سنۆرێ تركیێ به‌زاند و ده‌رباسی رۆژئاڤا كوردستانێ بوو، ئه‌ڤ هێز ژ 150 پێشمه‌رگه‌هان پێك دهات، وان هه‌ڤسه‌نگییا هێزێ گوهه‌راند و رێ نه‌دا كۆبان بێ رومه‌ت ببیت، به‌لكو د ده‌مه‌كا هه‌ری زوو دا، سه‌ركه‌تنا وان وه‌ك چیرۆكه‌ك ئه‌فسانه‌یی ل ته‌ڤ جیهانێ به‌لاڤ بوو.
ئەڤ یەکەمین جار بوو کو ب ئاوایه‌كێ فەرمی هێزەکا له‌شكه‌ری یا کوردی ل سەر خاكا کۆمارا ترکیێ دا دەرباس دبیت، ب مه‌به‌ستا هاریكارییا پارچەیەک دی ژ کوردستانێ، ئەڤ یەک ب بوویەرەکا دیرۆکی یا هه‌ره گرنگ هاته هه‌ژمار كرن.
چوونا پێشمه‌رگه‌ی بۆ كۆبانێ گاڤه‌ك گرنگ بوو ژ بۆ نه‌ته‌وه‌سازییا گه‌ل
ل باشوورێ کوردستانێ گه‌لێ کورد ل هەولێر و دهۆکێ هه‌یا زاخۆ، ل سەر جادەیان رێز بوون ژ بۆ پێشوازیكرنێ ل كاروانێ رومه‌تێ وان ب گول و مۆراله‌كا به‌رز یا نه‌ته‌وه‌یی پێشمه‌رگه پێشوازیكرن، کوردێن رۆژهلاتا کوردستانێ سەرەرای وێ یەکێ کو رژێما ئیرانێ رێکارێن توند گرتن بەر ژ بوو کو کوردێن وێ دەرێ پشتەڤانیێ نەکه‌ن، لێ بەلێ ل پرانییا باژاران کورد هاتن ناڤ جادەیان و ب خوەنیشاندانێن ئاشتییانە پشتەڤانییا چوونا پێشمەرگەهان ژ بۆ کۆبانێ کر، ل باکورێ کوردستانێ ژی کورد ل هەموو باژاران كه‌تن سەر جادەیان ژ بۆ كو پێشوازیكرنێ ل پێشمەرگەهان، ب کورتی ئەڤ یەک بوو سەدەما دروست بوونا هەنگاڤەکا گرنگ و هەستیار ژ بۆ «نەتەوەسازییا» کوردان.
دبیت ژ ئالیێ له‌شكه‌ری ڤه چوونا 150 پێشمەرگەهان كاره‌كێ پر گرنگ نەبیت و ئەڤ هەژمار نه‌بیته ئەگەرا گوهەرینەکا بنگەهین د ئاراستا شەر دا، لێ بەلێ ئەڤ یەک ب تەمامی ب عه‌كس ده‌ركه‌ت، ژ بەر کو ل دەما گه‌هشتنا کاروانێ پێشمەرگەهان ژ بۆ کۆبانێ، ل وێ ده‌مێ ته‌نێ 20٪ یا باژاری د دەست شەرڤانان دا مابوو 80% داعشێ داگیر كربوو.
پێشمه‌رگه‌هان هه‌ر د گه‌ل گه‌هشتنا خوه ته‌ڤلی به‌ره‌یێن شه‌ر بوون و هه‌ر د زوو دا هه‌ڤسه‌نگییا هێزێ گوهه‌راند و گۆرزێن هه‌ری گران ل ته‌رۆریستان دان.
چوونا پێشمەرگەهان ژ ئالییەکێ بوو سەدەما به‌رزبوونا مۆرالا شەرڤانان و ژ ئالیەکێ دی ڤه ب گه‌هشتنا پێشمەرگەهان و چەکێن وان یێن گران هەر تشت هات گوهەرین، شه‌رڤان ژ به‌رگریێ كه‌تن د ئاستا هێرش برنێ دا، پێشمەرگەهان وه‌ك هێزه‌كا پشته‌ڤانیێ دەست ب تۆپباران کرنا ناڤه‌ندێن ته‌رۆریستان کر و د وه‌خته‌كا هه‌ری كێم دا، كارین چەتەیێن داعشێ پاشدە ببن و باژارێ كۆبانێ ژ کەتنێ بپارێزن.
پێشمەرگەهان د دەما 25 رۆژان دا شیان 65٪ ژ خاکا باژارێ كۆبانێ ڤه‌گه‌رینن کو داعشێ گرتبوو، د دەما 45 رۆژان ژی دا پتر ژ 85٪ ژ وێ رووبەرا د دەست چەتەیان دا رزگار كرن.
«ل گه‌ل ته‌مام بوونا ئه‌ركا پیرۆز، پێشمه‌رگه ڤه‌گه‌رین، وان وه‌ك په‌كه‌كێ نه‌كر وه‌ختا 2 گوللـه ل شه‌نگالێ و هنده‌ك ناڤچه‌یێن باشوور هاڤێتین و پشتره خوه ب خودانێ وان ناڤچه‌یان زانی»
هێزێن پێشمه‌رگه‌هان و شه‌رڤانان جه‌نگه‌كا بێ وێنه ل كۆبانێ كرن، پاش ته‌ڤلی بوونا پێشمه‌رگه‌هان د قادا شه‌ر دا و ل گه‌ل ده‌رباسبوونا 7 مه‌هان، وان كۆبان پڕ ب رومه‌ت كر، كۆبان نه‌كه‌ت و چه‌ته‌یێن ته‌كفیری یێن ده‌وله‌تا ئیسلامی بازدان، پشتره و ل گه‌ل ته‌مام بوونا ئه‌ركا پیرۆز، پێشمه‌رگه جاره‌كا دی ڤه‌گه‌رین باشوورێ كوردستانێ، پێشمه‌رگه‌هان وه‌كه په‌كه‌كێ نه‌كر وه‌ختا وان 2 گوللـه ل شه‌نگالێ و هنده‌ك ناڤچه‌یێن باشوور هاڤێتین و پشتره خوه ب خودانێ وان ناڤچه‌یان زانی، به‌ره‌ڤاژی په‌كه‌كێ، پێشمه‌رگه‌هان 7 مه‌هان شه‌ر ژ بۆ برایێن خوه ل كۆبانێ كر و شه‌هید ژ بۆ كۆبانێ دان، لێ به‌لێ دگه‌ل ته‌مام بوونا ئه‌ركێ وان نه‌گۆت ئه‌م دێ ل ڤێرێ مینین ژ به‌ر كو مه كۆبان رزگار كرییه، به‌لكو ئه‌و ڤه‌گه‌رین باشوور و ل به‌ره‌یێن وێ به‌رده‌وامی ب جه‌نگا خوه یا ل دژی تیرۆرێ كرن.
د بابەتا چوونا پێشمەرگەهان دا ژبۆ کۆبانێ و رزگارکرنا وێ باژارێ دبیت غەدرەک مەزن ل مەسعوود بارزانی سەرۆکێ پارتییا دەمۆکرات یا کوردستانێ هاتبیتە کرن، ژ بەر په‌رله‌مانێ کوردستانێ رۆل د رازیکرنا دەولەتا ترکیێ دا ژ بۆ ده‌رباسبوونا پێشمه‌رگه‌هان د خاكا وێ دا نه‌بوو، بەلکو ئەڤ یەک ب سەدەما دیپلۆماسیەتا ژیر یا بارزانی پێک هات، لێ د راگهاندنا باشوور دا زۆر گرنگی ب ڤێ یەکێ نەهات دان.
چاڤدێرێن سیاسی یێن ناڤدەولەتی دبێژن گەر دیپلۆماسیەتا بارزانی نەبا ب چ ئاوایه‌كی ترکیێ رێ ب دەرباسبوونا پێشمەرگەهان نه‌دا، ژ بەر کو ئەڤ کار وەک ئاماژە پێ هاتی كرن بوو سەدەما پێشداچوون و خورتبوونا هەستا ناسیۆنالیستی د ناڤا گه‌لێ كورد دا و ئەڤ یەک ب چ ئاوایەکێ د بەرژەوەندییا ترکیێ دا نەبوو.
