رێبه‌رێ ته‌ڤگه‌را سه‌در و سه‌رۆكێ هه‌ڤپه‌یمانێتیا فه‌تهـ كو پرانیا كورسیێن پارله‌مه‌نتۆیا ئیراقێ پێره‌نه، ب نیازن ته‌كۆشینه‌كه هه‌ڤپار ژ بۆ سته‌ندنا باوه‌ریێ ژ ئادل ئه‌بدولمه‌هدی و هلوه‌شانا هكوومه‌تا فه‌ده‌رال بدن مه‌شاندن.
رێبه‌رێ ته‌ڤگه‌را سه‌در، موقته‌دا سه‌در دوهـ ژ ئادل ئه‌بدولمه‌هدی خوه‌ست ل پارله‌مه‌نا ئیراقێ ئاماده‌به ژ بۆ كو ده‌ست ژ كار بكشینه و داخوازا هلبژارتنا به‌روه‌خت بكه.
پشتره ئادل ئه‌بدولمه‌هدی د به‌یانه‌كه نڤیسكی ده داخوازا سه‌دری به‌رسڤاند و گۆ كو ئه‌و تو كاره‌كی وها ناكه، ده‌ستبه‌ردان ژ سه‌ر وه‌زیریێ و هلبژارتنا به‌روه‌خت ئاوایێ وان د ده‌ستوورا ولات دا هاتنه ته‌سبیت كرن، ئه‌و وێ پابه‌ندا ده‌ستوور به.
ژ ئالیێ خوه رێبه‌رێ ته‌ڤگه‌را سه‌در ل ئه‌كاونتا خوه ئا تویته‌رێ بانگا هادی ئامری رێبه‌ر و سه‌رۆكێ هه‌ڤپه‌یمانێتیا فه‌تهێ كر كو كارێ هه‌ڤپار ژ بۆ لادانا ئه‌بدولمه‌هدی و هكوومه‌تا وی ده‌ست پێ بكن.
دوهـ شه‌ڤێ هادی ئامری ل دووڤ بانگا سه‌در هات و پێره گۆ كو ئه‌و ئاماده‌نه ته‌كۆشینا هه‌ڤپار ژ بۆ بجی كرنا به‌رژه‌وه‌ندیا گه‌ل ب مه‌شینن.
ده‌ما 6 رۆژانه خوه‌پێشاندان ل ئیراقێ ل پایته‌ختێ و 11 باژار و پارێزگه‌هیێن دن ده‌وام دكه‌ن، خوه‌پێشاندان ل دژی گه‌نده‌لی، هه‌ژاری و بێ كاریێ تێن كرن، لێ به‌لێ داخوازا سه‌ره‌كه نه‌مانا هكوومه‌تا فه‌ده‌راله.
