باله‌فرێن جه‌نگی PKK ل چیایێ خامتیری هه‌ده‌ف كر

باله‌فرێن جه‌نگی ئێن تركیێ ئیرۆ هه‌ره‌كه‌تێن پارتییا كاركه‌رێن كوردستانێ په‌كه‌كێ، ل چیایێ خامتیری هه‌ده‌ف كر و زرارێن جانی پێره‌ خستن.

ئیرۆ رۆژا چارشه‌می 6/11/2019ان باله‌فرێن جه‌نگی ئێن تركیێ هه‌ره‌كه‌تێن پارتیا كاركه‌رێن كوردستانێ په‌كه‌كێ ل بلندیا چیایێ خامتیری، ل سینۆرێ ناڤچه‌یا ده‌ركار ئا گرێدای باژارێ زاخۆ ل هه‌رێما باشوورێ كوردستانێ هه‌ده‌ف كر و زرارێن جانی پێره‌ خستن.

چاڤكانیێن داركا مازی ل ناڤچه‌یێ ئه‌شكه‌ره‌ كرنه‌ كو ژ ئه‌رد و ئاسیمان ئیرۆ رۆژا چارشه‌می ئارته‌شا تركیێ دو جاران بلندیا چیایێ خامتیر بۆردۆمان كرنه‌، زرارێن جانی د رێزێن گه‌ریلایان ده‌ هه‌نه‌ لێ هینا نها نه‌ زه‌لاله‌ زرار چ قاسن.

 جیێ كو ئیرۆ ب به‌ر بۆردۆمانا باله‌فرێن تركیێ كه‌تی، دكه‌ڤه‌ هنداڤا ناڤچه‌یا ده‌ركارێ و ب وێ سه‌ده‌مێ ترس ل جه‌م گه‌لێ ناڤچه‌یێ چێبوویه‌.

ئێریشێن ئارته‌شا تركیێ و باله‌فرێن وێ ئێن جه‌نگی ژ 4 مه‌هێن رابووری ڤه‌ ل سه‌ر هه‌ره‌كه‌تێن په‌كه‌كێ ل چیایێ خامتیری د دۆمن، ئه‌ڤ یه‌ك ژی ترس و نه‌ره‌هه‌تی ل جه‌م خه‌لكێ ناڤچه‌یێ ئاڤاكرنه‌.