254 خوه‌پێشانده‌ر هاتنه كوشتن و نه‌ته‌وێن یه‌كبوویی دبێژه 11 هزار بریندارێن ئیراقێ هه‌نه
خوه‌پێشاندانێن ئیراقێ ده‌وام دكن و خوه‌پێشانده‌ران مالێن 3 پارله‌مه‌نته‌ران شه‌وتاند، د شه‌واتان ده كه‌س نه‌مر و بریندار نه‌بوو.
ئیرۆ رۆژا چارشه‌می 6/11/2019ان، خوه‌پێشاندانێن ئیراقێ بۆ رۆژا 12مین ده‌وام دكن، ل به‌خدا ل قادا ته‌حریر و ل 11پارێزگه‌هیێن دن ل باشوور و ناڤه‌راست، خوه‌پێشانده‌ر دخوازن هكوومه‌ت وه‌ره ئیستیفا كرن و په‌رگالا برێڤه‌برنا ولات وه‌ره گوهه‌راندن ژ بۆ كو ب نه‌رینا گه‌ل، ئه‌ڤ په‌رگال نه ل گۆر ڤی ولاتی یه.
ل باژارۆكێ شه‌ترا ئێ گرێدای پارێزگه‌هیا زیقارێ، خوه‌پێشانده‌ران ب سه‌ر مالێن هنه‌ك به‌رپرس و رایه‌دارێن ئیراقێ ده گرتن، وان مالێن 3 پارله‌مه‌نته‌ران ئاگر تێ خست و ب ته‌مام شه‌وتاندن، لێ به‌لێ د شه‌واتان ده تو كه‌سه‌ك نه‌مر و بریندار نه‌بوو.
چاڤكانیان ئه‌شكه‌ره كرنه مالێن كو هاتنه شه‌وتاندن، ئێن پارله‌مه‌نته‌رێن كوالیسیۆنا سایروونن ئا گرێدای كه‌ساتیێ ئۆلی یێ شیعه موقته‌دا سه‌در ئێ رێبه‌رێ ته‌ڤگه‌را سه‌دریان.
خوه‌پێشاندانێن ئیراقێ ژ 25 جۆتمه‌هێ ڤه ده‌وام دكن، خوه‌پێشاندن ژ بۆ پرۆته‌ستۆكرنا بێكاری، گه‌نده‌لی و كێماسیا خزمه‌تێ ل به‌خدایێ و 11 پارێزگه‌هیێن دن ده‌ست پێ كرن، ئه‌و د خوازن هكوومه‌ت وه‌ره ئیستیفا كرن و په‌رگالا برێڤه‌برنا ولات ژ پارله‌مه‌نتۆیێ ببه سه‌رۆكتی.
