خۆپێشاندانا گه‌لێ ئیراقێ ده‌رباسی هه‌فتییا سێیه‌مین دبه، ئیرۆ هه‌موه‌ختا یادا مه‌ولوودا پێخه‌مبه‌ر مهه‌مه‌د سلاڤێن یه‌زدان لێبن، ل به‌خدایێ و هنه‌ك پارێزگه‌هیێن دن خوه‌پێشاندان تێن كرن، كۆمسیۆنا مافێن مرۆڤان ئه‌شكه‌ره كر، 283 ئینسان هاتنه كوشتن.
ئیرۆا رۆژا شه‌می 9/11/2019ان، گه‌لێ ئیراقێ ل به‌خدایێ و هنه‌ك پارێزگه‌هیێن دن ئێن ناڤه‌راست و باشوورا ولات خوه‌پێشاندانێن خوه د دۆمینه، ئه‌و ل سه‌ر بانگا هلوه‌شانا هكوومه‌تا فه‌ده‌رال و گوهه‌راندنا په‌رگالا برێڤبرنا ده‌وله‌تێ جددی نه.
ل به‌خدایێ خوه‌پێشانده‌ر دیسان ل مه‌یدانا ته‌هریرێ كۆمبوونه، ل پرێن سه‌ره‌كه و هه‌ر وها جاده‌یێن مه‌زن یێن پایته‌ختێ، ئه‌و وه‌كه گرۆپێن 100 هه‌یا 200 كه‌س ل كۆلانان د مه‌شن و سلۆگانێن دژی هكوومه‌تێ به‌رز دكن.
ل به‌سرا، ناسریێ، دیالایێ و هه‌ر وها نه‌جفێ، ب سه‌دان ولاتی ل جاده و جهێن گشتی كۆمبوونه، هێزێن ئه‌وله‌كاریێ ب به‌رفره‌هی ل جاده و كۆلانان به‌لاڤه‌نه.
د خوه‌نیشاندانێن دوهـ رۆژا ئینیێ ده، پێتری 12 خوه‌پێشانده‌ران هاتن كوشتن و ب ده‌هان بریندار كه‌تنه، تایبه‌ت ل به‌سرایێ، ل دانێ ئێڤارا هه‌ما رۆژی ئاستا توندوتیژیێ به‌رز بوو پشتی سیستانی په‌یام وه‌شاندی.
كۆمسیۆنا مافێن مرۆڤان یا ئیراقێ ئامارا زرارێن جانی یێن ژ ده‌ستپێكا خوه‌پێشاندانان ئه‌شكه‌ر كر و ل گۆر وێ، 283 كه‌س هاتنه كوشتن و 13 هزار كه‌س بریندار كه‌تنه.
