ئۆجالان هه‌ر ل ده‌ستپێكێ PKK ژێر ب ژێر ل دژی PDK ئاراسته‌ كر

ئۆجالان هه‌ر ل ده‌ستپێكێ PKK ژێر ب ژێر ل دژی PDK ئاراسته‌ كر

په‌یوه‌ندیێن پارتیا كاركه‌رێن كوردستانێ و پارتیا ده‌مۆكرات ئا كوردستانێ ڤه‌دگه‌ره سالێن هه‌شتێیان، ل ده‌ستپێكا ئاڤابوونێ په‌كه‌كێ‌ په‌روه‌رده‌یا سیاسی و له‌شكری ژ په‌ده‌كێ‌‌ فێر وه‌رگرت، پشتره‌ د نامه‌یێن ئۆجالان ده‌ ئه‌شكه‌ره‌ دبه كو‌ په‌كه‌كه‌ ب چ مه‌به‌سته‌كێ په‌یوه‌ندی ب په‌ده‌كێ‌‌ ره‌ ئاڤاكرنه‌.

گەر به‌هسا پەیوەندیێن په‌ده‌كێ و په‌كه‌كێ‌ بکین کو ڤەدگەرە دەستپێکا سالێن هەشتیان، ئه‌شكه‌ره‌ دبه‌ کو په‌كه‌كێ‌ ب دەستوورا په‌ده‌كێ ل ناڤچەیێن «لۆلان، خواکورک، و حەفتەنینێ» جی گرتبوو، په‌ده‌كێ‌‌ ئالیکاریەکە مەزن ئا په‌كه‌كێ‌ كر ژ ئالیێ پەروەرده‌یا سیاسی و له‌شكری، هەر وها چەک و خوارن ژی ب په‌كه‌كێ‌ دابوو،  بۆ میناک دەما یەکەم جار ل سالا 1981-1982 پەکەکێ خواستی ل سووریێ ب رێیا گەریلایان چەکان ژ خوە رە بینن باشوورێ ولات، په‌ده‌كێ ب رێیا 4 پێشمەرگەهان رێ ل بەر وان خوەش کر و ئالیکاریا وان 8 گەریلایان کر کو بەرپرس بوون ژ ئینانا چەکان، لێ بەلێ حەیف کو هەر 12 کەس واتە هەر 4 پێشمەرگە و 8 گەریلا ل سەر سینۆرێ د ناڤبەرا باشوور و رۆژئاڤا دە خەندقیان، هەر وها ل سالا 1983ان دە په‌ده‌كێ چەکێ سمینۆف ب گەریلایێن پەکەکێ د دە وەکە ئالیکاریێن سەربازی، هەر وها وه‌ختا ل سالا 1983ان دە پەڤچوون د ناڤبەرا پەکەکێ و حیزبا شیۆعی یا کوردستانێ دە درست دبن، 2 گەریلایێن پەکەکێ بریندار دبن لێ بەلێ په‌ده‌كه‌ ڤان گەریلایان دبە د ناڤا باره‌گه‌هێن خوە و وان دپارێزە و تەداویا برینێن وان دکە، لێ دیسان پەکەکە د نامیلکەیێن خوە ده‌ زوور ب خەرابی به‌هسا په‌ده‌كێ دکە، سەرەرای ڤێ یەکێ دیسان په‌ده‌كه‌ دەست ژ ئالیکاریا پەکەکێ بەرنادە و رێزەکە هەری مەزن ل گەریلایێن پەکەکێ دگرە، ھەلبەت رێز گرتنا ل په‌كه‌كێ و گەریلایێن وێ ژ ئالیێ په‌ده‌كێ و پێشمەرگەیێن وێ، ڤەدگەرە ژ بوو وێ بریارا سەرۆکێ پارتییا دەمۆکراتا کوردستانێ کو ب ھەموو پێشمەرگە و قادرۆیێن خوە دای و پێرە گۆتی ئالیکاریا ھەر پارتەکە کوردی بکن، گەر میناکەکە هەری بچووک ژ ڤێ یەکێ ژی باس بکین دبە ئەو پێداویستی یێن لەقا یه‌ك ئا په‌ده‌كێ ب پەرە ب پێشمەرگەهێن خوە د ده‌ و بێ بەرانبەر ئانکو ب هەروە ب گەریلایێن پەکەکێ د دا باشترین میناک بە، یێن مە باس لێ کری هنەک میناكێن زوور بچووک بوون ژ وان ئالیکاریێن مەزن ئێن په‌ده‌كێ ب پەکەکێ کری، لێ بەلێ د هنه‌ك نامەیێن ئۆجالان دە، ئه‌شكه‌ره‌ دبە کو په‌كه‌كه‌ تەنێ ژ بۆ مفا وەرگرتنێ ژ په‌ده‌كێ‌‌ پەیوەندی پێره‌ ئاڤاكرنه‌، گەر نا ژێر ب ژێر ئۆجالان په‌كه‌كه‌ ل دژی په‌ده‌كێ‌‌ ئاراستە کریە.

PKK هەول ددە PDK وەکه‌ دژمنێ یه‌كه‌مێ گه‌ل بده‌ ناساندن و ترک، فارس و ئه‌ره‌بان وه‌كه‌ برایێن گه‌ل

په‌كه‌كه‌ د دیرۆكا ته‌كۆشینا خوه‌ دا، ئالیگرێن خوە وها پەروەردە كرن كو ته‌نێ تشتا ئه‌و دبێژن راسته‌، ئانکو ژ دەرڤەی ئایدۆلۆژیا په‌كه‌كه‌ تو هزر و نەرین و ئایدۆلۆژیەکە دن راست نیە و دڤێ ب هەموو ئاوایەکێ دژاتیا وان بهێت کرن وه‌كه‌ چاوا پەکەکە هەرتم دبێژه‌: «ته‌كۆشینا كوردا‌تیێ ژ دیرۆكا چێبوونا وێ ده‌ستپێدكه»، ئانکو پێش پەیدابوونا په‌كه‌كێ‌ تو کەس و رێخستن و پارتیەکە دن کار ژ بۆ کورداتیێ نەکریە ئەڤجا ژ شۆڕشێن «شێخ سەعیدێ پیران» کو پەکەکە شێخێ کال ب کرێگرتیێ ئیمپریالیزمێ د دە ناساندن تا دگەهە شۆڕشێن «مەلا مستەفایێ بارزانی» کو ئەڤ کەس بۆ سەدەما ناساندنا کوردان ب هەموو جیهانێ.

ل هه‌موو قۆناخێن ته‌كۆشینا خوه داه‌ په‌كه‌كه‌‌ هەرتم ئێریشی پارتێن کوردستانێ كریه‌، تایبەت په‌ده‌كێ‌‌ و تو گرنگی ب ته‌كۆشین، دیرۆک و زه‌همه‌تیا پێشمەرگە و سەرکردێن وێ ناده‌، به‌لكو هەرتم ژی هەول دایە شاشێتیێن قادا كوردستانێ بكه‌ته‌ کراسەک ل به‌ر په‌ده‌كێ‌‌، ئه‌ڤ ره‌فتار و هه‌ولێن په‌كه‌كێ‌ گهان ئاسته‌كه‌ وها كو هەول دا په‌ده‌كێ وەکه‌ دژمنێ یه‌كه‌مێ گه‌ل و ترکان و ولاتێن دن ئێن داگیرکار وەکە دژمنێ دویه‌مین و برایێن كوردان بده‌ ناساندن، یا ب ئێش د ڤێ یەکێ دە ئەڤە کو پەکەکە د ڤێ سیاسەتا خوە دە کاریە تا رادەیەک سەرکەفتنێ ب دەست بینە و مەژیێ پر کوردان خه‌راب بکە و ڤێ پارتیا کوردستانێ ل بەر چاڤێن وان رەش بکە هەلبەت د ناڤا ئالیگر و هەڤسۆزێن خوە ده‌، ئەڤ یەک هەر ئەڤە یاکو دەولەتێن دژمن دخوازن ل هەمبەر پارتێن ناسیۆنالیزمێن کوردی دە بکن لێ نەکارینە، لێ بەلێ پەکەکە ب ڤی کارێ وان رادبە و هەموو پارتیێن ناسیۆنالیزم ئێن کوردستانێ ب فیۆدال و کەڤنەپەرێس و ئالیگرێن ئیمپریالیزمێ د دە ناساندن و ل بەر چاڤێ گەل کێم دکە.

یەک ژ به‌هانه‌یێن په‌كه‌كه‌ێ ژبۆ دژاتی کرنا  په‌ده‌كێ هه‌بوونا هنه‌ك باره‌گه‌هێن تركیێ ل باشوور بوو، ئه‌و باره‌گه‌هێن كو ب لهه‌ڤهاتنێن ناڤنه‌ته‌وه‌یی د ناڤبەرا ئیراق و ئیرانێ ده‌ ل سالێن هەشتێیان ژ سەدەیا رابووری هاتی ئیمزە کرن کو ل گۆرەی ڤێ لهەڤهاتنێ هەر یەک ژ تورکیێ و ئیراقێ سینۆرێن خوە ب کوراتیا 30 کیلۆمەتران ل همبەر هەڤدو ڤالا کرن و رێ ب هەڤ دو دان کو دەرباسی سینۆرێن هەڤ ببن ژ بۆ دژایەتی کرنا بزاڤێن رزگاری خواز ئێن کوردستانی، ئانکو ئیراق بکارە ژ بۆ لێدانا پێشمەرگەهان دەرباسی تورکیێ ببە و تورکیێ ژی بکارە ژ بۆ لێدانا پەکەکێ دەرباسی ئیراقێ ببە. هەرچەند پەکەکە باش فام دکە کو د دەما بجی کرنا عەسکەرێن ترکیێ ل خاکا باشوورێ ولات دە په‌ده‌كێ تو دەسهلاتەکە وها ل سەر باشوور نەبوو کو بکارە رێگریێ ل ڤێ یەکێ بکە لێ دیسان ب رەنگەکە وەها سیستیماتیک کار ل سەر ڤێ یەکێ کریە کو باوەری ژ بۆ هەموو ئالیگرێن خوە دروست کریە کو ب ئیمزەیا په‌ده‌كێ ئەڤ عەسکەر ل باشوور بجی بوونە.

PKK وها ره‌فتارێ ب PDK‌‌ دكه‌ هه‌ر وه‌ك وان باكوور سه‌رده‌ست كریه‌ و گه‌را باشووره‌

په‌كه‌كه‌ خه‌باتا خوه‌ ده‌ستپێكر، وێ باش فام دكر كو هێزێن رژێما داگیرکار ل هەر جیه‌كی و ل هەر په‌رچه‌یه‌كا کوردستانێ نه‌، لێ به‌لێ ته‌نێ وێ بەهانە ل باشوور گرتن و شەرێ خوە یێ چەکداری ده‌رباسی تاکە په‌رچەیا ئازاد كر، ب ڤێ سیاسەتێ جاران داخوازا گرتنا کۆنسۆلگەریا ترکیێ ل هەولیرێ دكر، جاران ب بەهانەیا هەبوونا هن بارەگەهێن سەربازی یێن تركیێ ل باشوور چالاكیێن پارتیزانی ئه‌نجام ددان هەر وەک تو بارەگەهەکە سەربازی ئا دەولەتێن داگیرکارێن کوردستانێ د ناڤا خاکا باکوور و رۆژهەلات و رۆژئاڤایێ کوردستانێ دە نەبە.

PKK‌ ل شه‌نگالێ لهه‌ڤهاتن دگه‌ل داگیركاران ل دژی PDK ‌‌ كر

ئا روهن و ئەشکەرەیە کو د رەفتارێن په‌كه‌كه‌ دە داگیرکاری و تالانکرن هەیە، په‌كه‌كه‌ دخوازە ل هەر جیەکی بە، لێ بەلی یەکەم جار هەول د دە رێخستنێن کوردی ل وی دەرێ نەهێلە، پاشان دەست دانە سەر وێ دەرێ، ئەڤ یەک ب زەلالی ل شەنگالی خوەیا بوو، وه‌ختا هەولا دەرکرنا په‌ده‌كێ دای لێ ب تو ئاوایەکی ئەڤ هەول ل دژی دەولەتا داگیرکار ئا ئیراقێ نەدا وه‌ختا كو ئیراقێ له‌شكركێشیا میلیشیایێن ئیرانی و حیزبوللایێ ل 16 جۆتمه‌ها 2017ان ل سه‌ر باشوورێ كورستانێ كری، ئه‌ڤ ژ بلی كو هێژان په‌كه‌كه‌ مووچه‌ و چه‌كان ژ هكوومه‌تا ئیراقێ دستینه‌.

 په‌كه‌كه‌ ل رۆژئاڤا کوردستانێ پارت و رێخستنین نێزی په‌ده‌كێ‌‌ لاواز كرن و ژناڤبرن و ل شوونا وان ب دەهان رێخستنێن چەپ یێن ترکیا ده‌رباسی رۆژئاڤا كرن، ل رۆژهلاتا كوردستانێ ژی هه‌ر ل ده‌ستپێكێ په‌كه‌كه‌ كێشه‌ ژ بۆ په‌ده‌كه‌‌‌ ئا ئیرانێ چێكرن و ئه‌ڤ هه‌ساسیه‌تا وێ ل دژی وێ پارتێ ده‌وام كر، هه‌یا كو ده‌ستێ په‌كه‌كێ ب خوینا پێشمه‌رگه‌هێن وێ سۆر بووی، وه‌ختا كو ل سالا 2016ان دە ل ناڤچەیا کێلەشینێ 2 پێشمەرگەیێن وان شەهید کرن، پشترە ل شوونا كو داخوازا لێبورینێ ژ گەلێ کورد و مالباتێن پێشمەرگەهێن شەهید کەتی بکن، ئەڤ بوویەر وەکە پلانا دەولەتێن داگیرکار بناڤكر.

پوستێن ھەمان بەش