سه‌رۆك وه‌زیرێ هه‌رێما باشوورێ كوردستانێ ئێڤارا ئیرۆ ته‌ڤلی فۆرما ئاشتی و ئه‌وله‌هیا رۆژهلاتا ناڤین بوو و هنه‌ك مه‌له‌فێن گرینگ شیرۆڤە كرن و نرخاندن ژ بۆی ره‌وشا ئیراقێ و ناڤچه‌یێ كر.
مه‌سروور بارزانی ئیرۆ د چارچووڤه‌یا رۆژا دویه‌م ئا فۆرما ئاشتی و ئه‌وله‌هیا رۆژهلاتا ناڤین ده كو زانینگه‌ها ئه‌مه‌ریكی ل پارێزگه‌هیا دهۆكێ ساز دكه، به‌شداری دیبه‌ته‌كه تایبه‌ت كر و لدۆر رۆژه‌ڤا هه‌رێما باشوور، ئیراقا فه‌ده‌رال، هه‌ر وها رۆژهلاتا ناڤین نه‌رینێن خوه ئه‌شكه‌ره كرن.
مه‌سروور بارزانی ل ده‌ربارا مه‌له‌فا هوندر گۆ كو هكوومه‌تێ ده‌ست ئاڤێتیه به‌رنامه‌یا خوه ئا چاكسازیێ و ده‌ست نیشان كر كو ئه‌نجاما وێ چاكسازیێ هنه‌كی خوه‌یا بوونه.
ل ده‌ربارا ئیراقا فه‌ده‌رال و ره‌وشا وێ ئا نها كو خوه‌پێشاندانێن دژوار لێ تێن مه‌شاندن، سه‌رۆكێ هكوومه‌تا باشوور گۆت: ره‌وشا نها ئا ئیراقێ ژ بجی نه‌كرنا ده‌ستوورا ولاتی یه، ده‌ستوورا ئیراقێ ئا باشه، لێ پرسگرێك ژ بجی نه‌كرن و پشتگوهـ ئاڤێتنا به‌ند و خالێن ده‌ستوورێ نه.
هه‌ر وها دبێژه: ره‌وشا ئیراقێ ئالۆزه هه‌ر ئالی دزانه كو گرفت هه‌نه، لێ به‌لێ ئالییان چاره‌سه‌ری ژ بۆ ره‌وشێ نینه.
مه‌سروور بارزانی هه‌ر ل ڤێ مژارێ به‌هسا ڤه‌كشاندا ئارته‌شا ئه‌مه‌ریكایێ ژ ئیراقێ كر و گۆت: ڤه‌كشاندنا ئه‌مه‌ریكایێ ڤالاتی چێكر و ئیراقێ نكاری وێ ڤالاتیێ پڕ بكه، له‌وما ولاتێن ده‌ڤه‌رێ جیێ ئه‌مه‌ریكایێ گرتن.
سه‌رۆكێ هكوومه‌تێ دبێژه: مافێ گه‌لێ ئیراقێ یه مافێن خوه ئێن ره‌وا ژ هكوومه‌تێ بخوازه، ژ به‌ر كو ئه‌و هه‌ژی ژیانه‌كه باشترن.
ل ده‌ربارا مه‌له‌فا ته‌رۆرێ و ئه‌وله‌هیا رۆژهلاتا ناڤین، دیار كر، رێخستنا ته‌رۆری ئا دایشێ هینا نها ب خه‌ته‌ره‌كه جددی ل سه‌ر ناڤچه‌یێ و جیهانێ تێ هه‌ژمارتن، سه‌ده‌ما وێ یه‌كێ ژی فكرا دائیشێ نه‌هات ژناڤبرن و ژ بۆ وێ، وێ پێویستی ب چالاكیێن له‌شكری ئێن زێده هه‌به.
سه‌رۆك وه‌زیرێ هه‌رێما باشوور ل ده‌ربارا ئاواره و په‌نابه‌ربوونا گه‌لێن ده‌ڤه‌رێ گۆت: پێویسته سه‌ده‌مێن ئاواره‌بوونا گه‌ل وه‌رن چاره‌سه‌ركرن، ل ڤێ داویێ پێتر ژ 16 هزار كه‌سان پشتی ئێریشا سه‌ر رۆژئاڤا كوردستانێ به‌رێ خوه دانه هه‌رێما باشوور.
مه‌سروور بارزانی دبێژه: ئالیكاریا جڤاكا ناڤنه‌ته‌وه‌ئی ژ بۆ ئاواره‌یێن ل هه‌رێما كوردستانێ جی گرتنه گه‌له‌ك كێمه و ئه‌و یه‌ك ره‌خنه كر.
