پشتی 10 سالان ژ کارکرن لسەر وەرگێرانا ئنجیلێ ژ بۆ زمانێ کوردی، نهو ئەڤ پرتۆکا ئاسیمانی دکەڤیتە بەر دەستێن خویندەواران، ئێک ژ وان مۆسلمانێن کو ل باشوورێ کوردستانێ دینێ خوە گۆهارتی و بوویە مەسیحی دبێژیت ل باشوورێ کوردستانێ نێزی 400 کەسان ئۆلا خوە گۆهەرتیە.
ل رۆژا دۆشەمبی 25ێ تشرینا ددویان ل باژارێ دهۆکێ مەراسیمەک ب بەشداریا هەژمارەک ژ کەساتیان هات ئەنجام دان کو 80 ژ ڤان کەساتیان ل ولاتێن بیانی هاتبوون، مەراسیمەک ژ بۆ دانە ناسین و بەلاڤکرنا ئنجیلەکێ ب زمانێ کوردی.
د.مایکل مالیچ، بەرپرسێ رێکخراوا بیلبیلکا ئای بی سی ل باژارێ دهۆکێ بۆ تۆرا میدیایی یا رووداوێ راگهاند کو: ژ سالێن نەوەدان وەرە هزرەک هەبوو ژ بۆ کو ئنجیلێ ب زمانێ کوردی “بادینی” چاپ بکەین، لێ بەلێ ل سالا 2010 مە دەست ب ڤێ یەکێ کر، نها ئەڤ پرۆژە ب دۆماهی هاتیە و دخازین ل دهۆکێ مەراسیمەکێ ژ بۆ بەلاڤکرنا ڤێ ئنجیلێ ساز بکەین. لگۆرەی ئاخفتنا د.مایک 5000 ئنجیل هاتینە چاپکرن و پشتی ڤێ مەراسیمێ دێ هێنە بەلاڤکرن.
د. مایکل کو ئەمریکیە و ئەڤ نێزیکی 15 سالانە ل کوردستانا باشوور دژیت، فێری زمانێ کوردی بویە و دبێژە: گەلێ کوردستانێ گەلەک حەز ژ ئۆلێ مەسیحی دکەن، ل دەسپێکێ هندەک کەس خەلەت ل کارێ مە گەهشتن لێ بەلێ هندەک کەسێن دی هەبوون کو هاریکارێ مەبوون ب تایبەتی ل باژارێ دهۆکێ.
رێکخراوا بیلبیلکا ئای بی سی ل پرانیا ولاتێن جیهانێ ئۆفیسا خۆ هەیە، ل باشوورێ کوردستانێ ژی ل باژارێن هەولێر، سلێمانی و دهۆکێ ئۆفیسا خۆ هەیە، لگۆر ئامارێن ڤێ رێکخراوێ تا نۆکە ئینجیل ژ بۆ 1500 زمانێن جیهانی هاتیە وەرگێران.
