خوه‌پێشاندانێن ئیراقێ به‌رده‌وامن ئیرۆ ژی و هه‌ر چه‌ند كو عادل عه‌بدولمه‌هدی ده‌ست ژ كار كێشایه، لێ به‌لێ ئاستا خوه‌پێشاندانان هه‌ر دژوار بوو، كوشتنا 400 خوه‌پێشانده‌ران ژ ده‌ستپێكێ تا نها ب مه‌زنترین قه‌یران تێ هه‌ژمارتن كو ئیراق راستی وێ بووی، ژ هێرشا داعشێ یا سالا 2014ێ.
خوه‌پێشاندانێن ئیراقێ ئیرۆ رۆژا شه‌مبی ده‌ربازی رۆژا خوه یا 36ێ بوون و خه‌لكێ نه‌رازی هێشتا ل سه‌ر بانگا خوه یا چوونا حكوومه‌تێ به‌رده‌وامه، ل به‌غدا، نه‌جه‌ف و هه‌ژماره‌كه باژارێن دن خه‌لك وه‌كه گرۆپان ل جاده‌یان تێن دیتن، لێ ل ناسریێ ئاستا خوه‌پێشاندانێ دژوار كه‌تیه.
كۆمسیۆنا مافێن مرۆڤان یا ئیراقێ ل ڤێ ده‌ربارێ ده ئه‌شكه‌ره كر، ژ ده‌ستپێكا خوه‌پێشاندانێ، پێتر ژ 400 كه‌سان هاتنه كوشتن، هه‌موه‌خت هه‌ژمارا برینداران زێده‌تر ژ 16 هزار كه‌سان تێن ته‌خمین كرن.
خوه‌پێشاندانێن ئیراقێ ل 25 جۆتمه‌ها ئیسالێ ل دژی گه‌نده‌لیێ، هه‌ژاری و بێكاریێ ده‌ست پێ كرن، هه‌ر د زوو ده ئالۆزی كه‌تن تێده و ئێدی ژ كارلادانا سه‌رۆكێ وه‌زیران بوو داخوازیا گه‌لێ نه‌رازی.
دوهـ رۆژا ئینی 28/11/2019ێ عادل عه‌بدولمه‌هدی ده‌ست ژ كار كێشا و گۆت ل سه‌ر داخوازیا لێڤه‌گه‌ریا شیعه و گه‌لێ نه‌رازی ئه‌وی ده‌ست ژ پۆستا سه‌رۆك وه‌زیریێ به‌ردا.
عه‌بدولمه‌هدی د نامه‌یا ده‌ست ژ كار كێشانا خوه دا ب زه‌لالی ده‌ست نیشان كر كو ئێدی وی شیانا كاركرنێ دگه‌ل دز و گه‌نده‌لان نینه.
ژ ده‌ستپێكا خوه‌پێشاندانێن ئیراقێ زێده‌تر ژ 400 كه‌سان هاتنه كوشتن، ئه‌ڤ یه‌ك ژی ب مه‌زنترین قه‌یرانا پشتی هێرشا داعشێ تێ هه‌ژمارتن كو ئیراق راستی وێ بووی.
