سه‌رۆكێ ته‌ڤگه‌را كه‌سك یا ئیرانێ كو ب ئۆپۆزسیۆن تێ هه‌ژمارتن، هشدارییا ژ ناڤچوونا رژیما ئیرانێ و ویلایه‌تا ئه‌ل فه‌قیهـ دا رێبه‌رێ شۆرشا ئیسلام ئایته‌وللاهێ عه‌لیێ خامنه‌یی.
پشتی كه‌رۆبی، میر حسێن موسەوی هەرچەنده كو دەما 10 سالانە ئه‌و د مالا خوە دە ژ ئالیێ رژیما ئێرانێ ڤە بنچاڤکرن، لێ ئه‌و د پەیامەکێ دا رادگه‌هینیت: «دگەل دەربرینا هەڤخەمیا خوە دگەل مالباتێن کوشتیان و بوویەرێن ڤێ داویێ، بلندکرنا بهایێ بەنزینێ ب کارەکە نە بەر عاقل و بازرگانی کرن دبینین و شێوازێ سەرەدەری کرنا دگەل خوەپێشاندەران وەکە کوشتارا مەیدانا “ژالە” یا سالا 1979ێ دزانین و هۆشداریێ ل دەرەنجامێن ڤێ یەکێ ددین».
ل گۆرەی پێگەها “کلمە”، میر حسێن موسەوی د پەیامەکێ دە گۆتیە: «توند و تیژی یا ب خوین دگەل گەلێ تۆرە و نەرازی ژ بریارا شاش و دژ ب بەرژەوەندیێن تەخا هەژار و ماف خواری و بریندار ژ سیاسەتا شاش هاتیە سەر جادەیان، و بەرفرەهبوونا نەرازی بوونا ل تەهرانێ و ناڤچەیێن دن یێن ئیرانێ، ئاماژەیەکە ب وێ چەندێ کو ماندیبوونەکا گشتگیر د ناڤا تەخێن هەژار و ستەم لێ کری د وەلاتی دا، وەکهەڤیەکە تەمام دگەل “کوشتارا بی رەحمانە” یا خەلکێ ل 17/9/1978 هەیە».
موسەوی هەروها راگهاند، مرۆڤ کۆژێن سالا 1978ێ نوونەرێن رژێمەکا نە ئۆلی بوون، و مەئمۆر و نیشانەشکێنێن 2019ێ نوینەرێن رژێمەکا ئۆلی نه.
«ل وێ ده‌مێ فەرماندارێ گشتی یێ هێزێن سەربازی شاهـ بوو، ئیرۆ وەلیێ فەقیهە ب دەستهلاتێن بێ سینۆر. ئەز سەرەخوشیێ ل تەڤایا مالباتێن شەهیدان دکم، و دبێژم ئەو برینا ل جان و جەسەدێ گەل هاتی کرن نایێ تەداوی کرن، ئه‌گه‌ر ب ئەشکەرە کرنا بریاردەر و ئەنجامدەرێن ڤێ کوشتارێ و دادگەهکرنا ئەشکەرە یا وان کەسان و شیرۆڤەکرنا سەدەمێن ڤێ جینایەتا زەلال، گەر نا دەنگ بۆڕ کرن و گۆتنا ئەڤ شەرەکە جیهانی یە ل دژی ئیرانێ بەرسڤەکە رازیکەر و لۆژیکیانە نینە ژ بۆ گەلێ ئیرانێ و ئەڤ یەک نابە سەدەم کو ئەو برینا کوور و ب مەترسی یا ل سەر جەسەدا گەل هاتی چێکرن تەداوی ببە. ب تەنێ پێدڤی دکە رژیم هزر د ئەنجامێن “کوشتارا مەیدانا ژالە” دا بکەت».
هێژایی گۆتنێ یە کو مەهدی کەرۆبی ژی کو یەکە ژ سەرکردەیێن ئۆپۆزسیۆنا ئیرانێ “ته‌ڤگه‌را کەسک” کو 9 سالە ل ژێر بنچاڤکرنێ یە، ب بەلاڤکرنا پەیامەکی ب ناڤێ “ئالاڤێ سەرکۆتکرنێ” و “توندوتیژیا نەهێت خەیالکرن” حکوومەتا ئیرانێ رەخنە کر، و هشداری دا کو ب بەردەوامکرنا ڤێ سیاسەتێ، رەوشا ئیرانێ جارەکە دن وێ بەر ب شورەشەکە دن بچیت.
