پارلمه‌نا ئیراقێ، ئیرۆ جڤیا و نامه‌یا ده‌ستبه‌ردانا عادل عه‌بدولمه‌هدی سه‌رۆك وه‌زیرێ ئیراقێ په‌ژراند.
پارله‌مه‌نا ئیراقێ ئیرۆ رۆژا یه‌كشه‌می 1/12/2019ێ جڤینا خوه یا ئاوارته ل دارخست و تێده پشتی گۆتوبێژان، نامه‌یا ده‌ستبه‌ردانا عادل عه‌بدولمه‌هدی سه‌رۆك وه‌زیرێ ئیراقێ، ب ته‌ڤایا ده‌نگان په‌ژراند.
ته‌ڤایا پارلمه‌نته‌رێن به‌رهه‌ڤی جڤینا ئاوارته یا پارله‌مه‌نێ بووی كو هه‌ژمارا وان 241 پارلمه‌نته‌ر بوون، ده‌نگ ل سه‌ر ده‌ستبه‌ردانا عه‌بدولمه‌هدی ژ پۆستا سه‌رۆكتیا حكوومه‌تا فه‌ده‌رال دا.
عادل عه‌بدولمه‌هدی رۆژا ئینی 28/11/2019ێ ل سه‌ر بانگا لێڤه‌گه‌ریا بلند یا شیعی و هه‌ر وها خوه‌پێشانده‌ران، ده‌ستبه‌ردانا خوه ژ پۆستا سه‌رۆكتیا حكوومه‌تێ راگهاند.
عه‌بدولمه‌هدی د نامه‌یا ده‌ستبه‌ردانا خوه دا ئاماژه كر كو وی كارینا به‌رده‌وامبوونێ و كاركرنێ ل گه‌ل هه‌ژماره‌كه دز و گه‌نده‌لان نینه، دوهـ رۆژا شه‌می ژی نامه‌یا ده‌ستبه‌ردانا خوه دا سه‌رۆكتیا پارله‌مه‌نا ئیراقێ و ژێ خوه‌ستبوو ده‌نگی ل سه‌ر بدن و وه‌ره په‌ژراندن.
ژ ده‌ستپێكا خوه‌پێشاندانێن ئیراقێ كو ل 25 ئۆكتۆبه‌را ئیسالێ ل دژی گه‌نده‌لی و هه‌ژاریێ ده‌ست پێ كرن، خوه‌پێشانده‌ر و گه‌لێ مافخواری هه‌ر زوو داخوازا هلوه‌شانا حكوومه‌تا فه‌ده‌رال كر و عه‌بدولمه‌هدی ب ته‌ڤایا كێشه و قه‌یرانێن ل ئیراقێ سووچبار كر.
حكوومه‌تا باشوورێ كوردستانێ و سه‌رۆكتیا هه‌رێمێ هه‌ر د زوو ده هه‌لوه‌ستا خوه ل ڤێ مژارێ ئانی زمان و وان ب زه‌لالی گۆ كو ئه‌ڤ ره‌وشا ئیراق تێده، سه‌به‌با وێ عه‌بدولمه‌هدی نینه، لێ به‌لێ ژ ئه‌نجاما ئیداره‌یا خراب یا 16 سالێ رابووری و پشتگوهـ ئاڤێتنا ده‌ستوورا ولاته.
عه‌بدولمه‌هدی ژ ده‌ستپێكا ده‌ستبكاربوونا خوه وه‌كه سه‌رۆك وه‌زیر، چه‌ندین جاران گه‌فا ده‌ستبه‌ردانا ژ پۆستا خوه كریه، تێ گۆتن ژی كو نامه‌یا ده‌ستبه‌ردانا وی هه‌موو ده‌ما دگه‌ل ده بوویه، ژ بۆ كو هه‌ر وه‌ختا پێویست كر، ئیمزه بكه.
