ئه‌نجوومه‌نا ئه‌وله‌هیێ دێ ل دۆر ره‌وشا ئیراقێ بجڤیت

ئه‌نجوومه‌نا ئه‌وله‌هیێ دێ ل دۆر ره‌وشا ئیراقێ بجڤیت

ئه‌نجوومه‌نا ئه‌وله‌هیێ یا ناڤنه‌ته‌وه‌یی، ئیرۆ دێ ل دۆر ره‌وشا ئیراقێ بجڤیت، ئه‌ڤ جڤین پشتی ده‌ستبه‌ردانا سه‌رۆك وه‌زیر عادل عه‌بدولمه‌هدی تێ ل دارخستن.

تی چاڤه‌رێ كرن، ئیرۆ رۆژا سێشه‌می 3/12/2019ان، ئه‌نجوومه‌نا ئه‌وله‌هیێ یا ناڤنه‌ته‌وه‌یی جڤینه‌كێ ساز بكه‌ت و تێده‌ ره‌وشا هه‌ری داوی یا ئیراقا فه‌ده‌رال پشتی ده‌ستبه‌ردانا ئادل عه‌بدولمه‌هدی یێ سه‌رۆك وه‌زیر بهێت شۆپاندن.

د جڤینا ئیرۆ ده‌، خانما جینین هینیس پلاسخارت، نوونه‌را نه‌ته‌وه‌یێن یه‌كبوویی ل ئیراقێ، دێ راپۆره‌كێ ل دۆر ره‌وشا ئیراقێ پێش كێش بكه‌ت.

نه‌ته‌وه‌یێن یه‌كبوویی ژ ده‌ستپێكا خوه‌پێشاندانێن ئیراقێ كو ل 25 جۆتمه‌ها ئیسالێ ده‌ست پێ كربوون، دلگرانی ژ ره‌وشێ نیشان دا و ژ حكوومه‌تا فه‌ده‌رال خوه‌ست بوو، توندوتیژیا ل دژی خوه‌پێشانده‌ران بهێت راوه‌ستاندن.

ژ ده‌ستپێكا خوه‌پێشاندانان پێتر ژ 400 كه‌سان هاتنه‌ كوشتن و پێتر ژ 19 هزار كه‌سێن دن بریندار كه‌تنه‌، ل ئینیا رابووری ژی عادل عه‌بدولمه‌هدی سه‌رۆك وه‌زیرێ ئیراقێ، ده‌ستبه‌رادانا خوه‌ ژ پۆستا سه‌رۆك وه‌زیریێ راگهاند و گۆت كو وی كارینا به‌رده‌وامبوونێ ل گه‌ل دز و گه‌نده‌لان نینه‌.

ئالیێن سیاسی یین ئیراقێ نها ل رێچاره‌یه‌كێ ژ بۆ ده‌رباسكرنا ره‌وشا ئالۆز دگه‌رن و نیقاش ژ بۆ ده‌ست نیشان كرنا شوونگره‌كی بۆ عه‌بدولمه‌هدی تێن كرن، لێ به‌لێ چ ئاماژه‌ ب یه‌كلاكرنا وێ پۆستێ د رۆژه‌ڤێ ده‌ نینه‌.