ل خانەقینێ پێشمەرگە دکەڤە ئامادەباشیێ

ل خانەقینێ پێشمەرگە دکەڤە ئامادەباشیێ

ژبەرکو ھکوومەتا ئراقێ نھا د رەوشەکە خراب دە دەرباس دبە، لڤ و تەڤگەرێن دائشێ ل سینۆرێ ناڤچەیێن جھێ ناکۆکیێ یێن د ناڤبەرا ھەرێما کوردستانێ و ئیراقێ دە، زێدە بوویە و ٦ گوندێن خانەقینێ ژ ترسا چەکدارێن دائشێ ھاتنە ڤالاکرن.

ژ بەر زێدەبوونا لڤ و تەڤگەرا چەکدارێن دائشێ، ل سینۆرێ قەزایا خانەقینێ ٦ گوندێن کوردان ھاتنە ڤالاکرن. خەلکێ وان گوندان دبێژن، دائش دیسان بھێز بوویە و تەڤگەرێن خوە ل ناڤچەیێ زێدە کرنە.

چاڤکانیێن دارکا مازی ئەشکەرە کرن کو پاش سەرهلدانا خوەپێشاندانان ل باژار و باژارۆکێن ئیراقێ لڤ و تەڤگەرێن دائشی زێدە بوونە و ب ڤێ سەدەمێ ل ناڤچەیێن ناکۆکی لسەر یێن کو دکەڤن دناڤبەرا هەرێما باشوورێ کوردستانێ و عیراقێ دە رەوش پر خەتەر بوویە و گەل نکارە ب کەیفا خوە تەڤ بگەرە و ب ئارامی ژیان بکە.

پشتی کو چەکدارێن دائشێ ل ناڤچەیا نەفتخانە و نەوجوول ئێریشی ھێزێن ئیراقێ کری، سەربازەکی ئارتێشێ و ٥ چەکدارێن ھەشدا شەبی کوشتن و ١٥ چەکدار ژی بریندار کرن، رەوشا وێ ناڤچەیێ خرابتر بوویە.

ھەر ل گۆر زانیاریێن ئستخباراتییێن ئارتێشا ئیراقێ و پۆلیسێ نەھشتنا تاوانان، ھەژمارا چەکدارێن دائشێ ل سینۆرێن دیالە، سەلاھەدین و کەرکووکێ ژ 1500 کەسان دەرباس بوویە.

ل گۆر زانیاریێن ئستخبارایییێن ھێزێن پێشمەرگە، داشێ د ماوەیا ١٥ رۆژێن بھۆری دە ٣٠ چەکدارێن پەروەردەکری ب سەرپرەشتیا ئەمیرەکی خوەیێ بیانی شاندیە سینۆرێ خانەقین، گولالە، قەرەتەپە و گولەجۆ و ژ بۆ ئێریشکرنا سەر ئارتێشا ئراقێ و ھێزێن لەشکەرییێن ل وی سینۆری پلان دانینە.

هات ئەشکەرە کرن کو چەکدارێن دائشێ 2 کەتیبەیێن خوە ئێن ب ناڤێ کەتیبەیا ئۆمەر و کەتیبەیا ئۆسمان شاندینە سینۆرێ خانەقینێ و ئەو د بەرهەڤن ژ بۆ ئەنجامدانا ئێریشان لسەر وان هێزێن کو وێ ناڤچەیێ دپارێزن.

هەروها چاڤکانیێن دارکا مازی ئەشکەرە کرن کو ب سەدەما زێدەبوونا لڤ و تەڤگەرێن دائشێ، ھێزێن پێشمەرگە ل سینۆرێ نێزی خانەقینێ د ئامادەباشیێ دە نە، ژ بوو رووبرووبوونا هەر پێشهاتەکا نەچاڤەرێ کری ل ناڤچەیێ.