ئه‌مه‌ریكا د سزادانا تركیێ ده جددی یه
ویلایه‌تێن یه‌كبوویی یێن ئه‌مه‌ریكایێ وێ ل هه‌فتییا بهێت گۆتوبێژا پرۆژه یاسایاكێ بكه‌ت كو ل گۆر وێ سزا ل سه‌ر ولاتێ تركیێ ب سه‌ده‌ما كرینا سیسته‌ما پاراستنا ئاسیمانی S-400 بهێن سه‌پاندن.
لژنه‌یا سیاسیه‌تا كارێن ده‌رڤه یا ئه‌نجوومه‌نا نوونه‌رێن ئه‌مه‌ریكایێ، ئیرۆ رۆژا چارشه‌می 4/12/2019ان ئه‌شكه‌ره كر، ل هه‌فتییا بهێت پرۆژه یاسایه‌كه تایبه‌ت ب سزادانا تركیێ ب سه‌ده‌ما كرینا سیسته‌ما پاراستنا ئاسیمانی یا ب ناڤێ S-400 وێ بهێت گۆتوبێژ كرن.
هه‌موه‌خت دیار كر، لژنه‌یا سیاسه‌تا كارێن ده‌رڤه یا ئه‌نجوومه‌نا نوونه‌رێن ئه‌مه‌ریكایێ، وێ پرۆژه‌ی نیقاش بكه و هه‌ر وه‌ختا هات په‌ژراندن، پێویسته هه‌ر یه‌ك ژ ئه‌نجوومه‌نێن نوونه‌ران و یا پیران ره‌زامه‌ندیێ ل سه‌ر بكه، به‌را كو وه‌ره بجی كرن.
ل گۆر لژنه‌یا كارێن ده‌رڤه، پشتی ره‌زامه‌ندیا هه‌ردو سازیێن كۆنگرێسا ئه‌مه‌ریكایێ، داوی جار دۆنالد ترامپ سه‌رۆكێ ئه‌مه‌ریكایێ وێ ئیمزایێ ل سه‌ر پرۆژه‌ی بكه.
كۆنگرێسا ئه‌مه‌ریكایێ به‌رده‌وام دۆنالد ترامپ ره‌خنه دكه كو ناخوازه سزایێن بێهتر ل سه‌ر تركیێ وه‌رن سه‌پاندن.
د پرۆژه یاسایا لژنه‌یا سیاسه‌تا ده‌رڤه یا ئه‌نجوومه‌نا نوونه‌ران هاتیه: «پێویسته ب سه‌ده‌ما كرینا تركیێ ژ بۆ سیسته‌ما پاراستنا ئاسیمانی ژ رووسیا فه‌ده‌رال ل گۆر یاسایا ب ناڤێ (جاستا) سزا ل سه‌ر بهێن سه‌پاندن، هه‌موه‌خت فرۆتنا چه‌كێن ئه‌مه‌ریكایێ ب تركیێ ره بهێن سینۆردار كرن».
دوهـ رۆژا سێشه‌می 3/12/2019ان هه‌ر یه‌ك ژ سه‌ناتۆرێن كۆماری و ده‌مۆكرات، «لێندسی گراهام و كرێس ڤان هۆلن» د نامه‌یه‌كێ ده كو ئاراسته‌ی وه‌زیرێ كارێن ده‌رڤه یێ ئه‌مه‌ریكایێ كریه، داخواز ژ ئیداره‌یا ترامپ كرنه، ب سه‌ده‌ما سیسته‌ما S-400 سزایێن هه‌ری دژوار ل سه‌ر تركیێ وه‌رن سه‌پاندن.
