پارتیا ماف و ئازادیان HAK-PAR، گرێدایی جڤینا “تفاقا نەتەوی” و سەکنا HAK-PAR لسەر یەکیتیا نەتەوەیی داخوویانیەک ئاراستەیی رایا گشتی کر.
ئەڤ ناڤەرۆکا داخوویانیێیە:
HAK-PAR: “یەکتیا نەتەوەیی ب ھێزێن نەتەوەیی رە مومکون”
دەمەکە کو ژ ئالییێ کاروانێن HDP’ê ڤە ل سەر “یەکیتیا نەتەوەیی ”بانگاوازی تێنە کرن. کاروانێن HDP’ê ل گەل چەند پێرۆ و رێزکێن “کورسیپەروەر” د ناڤ مڵەتێ کورد دە، دەست ب بانگاشانەک بێپایان کرنە، کو گۆیا ئەو ل دو ئاڤاکرنا “یەکیتیا نەتەوەیی” نە.
بێگومان “یەکیتیا نەتەوەیی” ب ھەڤکاریا ھێز و ئالیێن نەتەوەیی، ب کەس و کەسایەت و رایەدارێن نشتمانپەروەر و نەتەوەیی پێک تێ. ئەو کۆم و کاروانێن کو ژ رۆژا ٥ێ مەھێ ل ئامەدێ ب داوویانیەک راگھاندنە کو ئەوێ “یەکیتیا نەتەوەیی” پێک بینن، پرانیا وان ھێزێن کو بەرنامەیا وان نە نەتەوەیی نە.
ئەو رێخستنێن ب سەر HDP’ê ئانگۆ خوەگرتێن HDP، دبێژن کو “ئەم نە رێخستنێن کوردەوارن.” HDP دبێژە “ئەز پارتیەکە ترکیەیی مە”، “ئەز پارێزگەرێ ئونیتەریایێ مە”، “ئەز نە پارتیا کوردا مە”، “ئەز پارێزگەرێ وەلات و ئال و دەولەتەک یەکینە” مە.
لێ بالکێشە کو ھەمان HDP دەما کو ژ ئالیێ سیاسەتێ ڤە دکەڤە تەنگاسیێ، کۆپالێ “کوردایەتیێ ددە دەستێ خوە و ھەر وەکی کو ئەو پارتیەک کوردەوار بە، تەڤدگەرە. HDP ڤێ یەکێ ژ خوە رە کریە ئادەت. HDP و پشتەڤانێن وێ، بێشک د وارێ کریارێن فەراسەتێ دە، ھۆستا نە. ئەو ب ھۆستایی فەراسەتا گەل خەرا دکن و ئاڤا دکن.
ھنەک رێخستن و کۆمکێن دن ژی ھەنن کو دەنگێ دەفا HDP’ê ژ کیژان ئالی ڤە وە رە، پێرە، بەرێ خوە ددن وی ئالی. ب تایبەتی د وان دەمێن کو پێشنا ھلبژارتنان تێ دە. ئەڤ کۆمک، بەرژەوەندیپەرەست و “کورسیھەز”ن. خوە ل با HDP’ê شیرن دکن کو HDP ئەندامەتیەک، مختاریەک یان مەبوسیەک ب دە وان و وان بگێژینە مەخسەدا دلان. ئەو کەس و کۆم، کو ھێ د ناڤ خوە دە نەکارینە “یەکیتی” و “یەکدەنگیەک” ساز بکن، چاڤێن خوە بەردانە سازکرنا “یەکیتیا نەتەوەیا کورد”. ئەڤ خەیالێ وان خەیالێ خامن. ئەو د گۆلا شیلۆ دە، ئاڤژێنیا ماسیا دکن. تو رو و سیانەتا وان د ناڤ مڵەت دە نەمایە. ھێزپەرەستی و ئەڤینداریا وانا HDP’ê زو ب زو نا قەدە. ئەوان قەرارێ خوە دایە. ئەو وێ ھەر دەم سەرگۆڤەند و دەستمالھەژێن HDP’ê بن. راستیێن ژیانێ دانە نیشان کو، ھەتانی ئەو خوەدیێ خوە و ڤی ئاقلی بن، تو خێر و بەرەکەت د رێیا ساز کرنا “یەکیتیا نەتەوەیی” دە ژ وان نایێ. دەردێ وان نە سەرفراز و سەرخوەبون و ئازادیا کورد و کوردستانێیە.
ھەلبەت ب ھێز و کەسێن کو ژ دل نە نەتەوەپەرەستن رە “یەکیتیا نەتەوەیی” پێک نایێ.
ئەڤ گالە-گال و بانگەشانا کو سەرکێشێ وێ HDP و تایفا HDP’ê نە، ل سەر رێیا “یەکیتیا نەتەوەییا ژدل” ھەتانی ئیرۆ، ئاستەنگێن مەزن ئاڤا کرنە. مەبەستا وان نە بدەستخستنا ستاتویەک سیاسی ئان ئازادیا کوردستانێیە.
ئەڤ ھەلوەست رەنگە کو ئامادەکاریا خەندەقێن سیاسی دکە.
یا کو HDP و تایفا HDP’ê، و کۆم و کولفەتێن رێوەنگیا رێیا نەرەوا قال دکە، نکارە پرسا کورد و کوردستانێ چارەسەر بکە، ھەر وھا ژ بۆ مڵەتێ کورد ستاتویەک پەیدا بکە. ئەو نکارە د رێیا بدەستخستنا مافێن کۆلەکتف (ھەڤپار)یێن ملەتێ کورد دە، بریارێن مایەندە ب رێ ڤە ببە و بگێژینە ئارمانجێ.
ملەتێ کورد رێ نادە ڤان خەندەقێن سیاسی.
پرسا کورد و کوردستانێ، پرسا ھەق و ھقووقێ نەتەوەیەکە دۆرپێچ کریە. ئەڤ دۆزەکە مەھقوول و بسیانەتە. ھەقێ تو کۆمەکی نینە ڤێ دۆزا ب رومەت، مردار بکە. رێخستنێن کو ب سالان ب “ئادیەتا نەتەوەیی”ا ملەتێ کورد لەییستنە، ب چی روویی دەردکەڤن پێشبەرێ ملەتێ کورد و بەھسا “یەکیتیا نەتەوەیی” دکن.یا وان ھەبە تونەبە “ رەشکرن و خەراکرنا یەکیتیا ھێزێن نشتمانپەروەر”ە. ئەو چاڤەرێیێ ھلوەشاندنا ھکومەتا فەدەرالا ھەرێما باشوورێ کوردستانێ نە. ئەو چەڤەرێیێ خراکرنا فەراسەت و بیر و رایا کوردایەتیێ نە.
لازمە وەرە زانین کو ژ ئالیێ HDP’ê و ھەر وھا کاروانێ پێرۆ و ئەڤیندارێن HDP’ê ڤە، تو پێشنیارەک د ڤی واری دە، ژ HAK-PARێ رە نەھاتێیە کرن. لەورا دنیا ئالەم باش دزانە کو HAK-PAR ژ بەرێ ڤە دەریێ خوە ژ ڤان پێشنیارێن پووچ و ڤالا و بێباوەر و بێجدیەت رە ھەتا داویێ قایم گرتیە.
ژ ئیرۆ و پێ دا ژی، ئەگەر ژ ئالیێ ڤ کاروانی ڤە بانگەک وھا وە رە ژی، HAK-PAR ب ھچ شیوەیەک د ناڤ وی کاروانی دە، جھ ناگرە. HAK-PAR، نابە ھەڤالبەندێ نەخێرخوازا.
HAK-PAR تەنێ د ھەڤکاریێن خێرخواز دە جھ دگرە. ئەم، ھەلوەست و ئارمانج و سیاسەت و رێ و رێچا HDP و پێرۆیێن HDP’ê د ڤی واری دە، باوەرپێکەر و خێرخواز نابینن.
لەورا ئەشکەرەیە کو “یەکیتیا نەتەوەیی” ل سەر ئاساسا پاراستنا مافێن نەتەوەیی، ب بەرنامەیەک نەتەوەیی/کوردی و کوردستانی بلند دبە، خورت دبە.
کەس و ھێزێن کو پێشنیارا “یەکیتی” ئان “تفاق”ا نەتەوەیی دکن پێش ھەمو تشتی گەرەکە سەجەرەیا وان پاقژ بە. دلخواز و دلڤانێن یەکیتیێ لازمە ژدل و باوەرپێکری بن. ماف و بەرژەوەندیێن شەخسێ خوە و رێخستنا خوە سەردەستێ بەرژەوەندی و مافێ ملەتێ کورد نەبینن.
HAK-PAR ژ بۆ پێکانینا ھەڤکاریا ھێزێن نشتمانپەروەرێن راستەقین چ لازمە وێ بکە.
رێیا HAK-PARێ، رێیا خێرخواز و رەوا ئا مڵەتێ کوردە.
نڤیسینگەھا راگەھاندن و چاپەمەنیا پارتیا ماف و ئازادیان / HAK-PAR
