ھات دەستنیشانکرن کو ھەڤدیتنێن د ناڤبەرا ئه‌مه‌ریكا و تالیبانێ ده، کو 3 مەھ بەرێ ھاتبوون راوەستاندن، ل ده‌وهه ئا پایتەختا قەتەرێ جاردن دەست پێ کرن.
ل گۆر نووچەیا ئاژانسا نووچەیان ئا قەتەرێ (قنا)، ژ بۆ تەمامکرنێن ھەڤدیتنێن چوویی، ئه‌مه‌ریكا و تالیبان ھەڤدیتنان دکن دا کو ل ئەفخانستانێ ئاشتی و ئیستقرار چێببە.
د نووچەیێ ده ھەر وھا ھات دیار کرن کو ھەردو ئالیان سپاسیا قەتەرێ کرن کو رۆلا ناڤبەینکاریێ دکە.
دەر ھەقێ وێ یەکێ ده زانیاری نەھات دایین کا ھەڤدیتن دێ چقاس دەوام بکن و ناڤەرۆکا وان چیە.
پێڤاژۆیا ئاشتیا ئەفخانستانێ
تالیبان ئا کو ژ بۆ ھکوومەتا ب سەرکێشیا سەرۆکۆمارێ ئەفخانستانێ ئەشرەف خەنی تەھدیدەکە مەزنە، ھێ ژی ل گەلەک دەڤەرێن ولاتی سەروەریا خوە د دۆمینە.
ھکوومەتێ ل سالێن چوویی، گەلەک جاران ھەول دابوو کو دگەل تالیبانێ دەست ب ھەڤدیتنێن ئاشتیێ بکە و ھەروھا ژ بۆ ڤێ یەکێ کۆنسەیا ئاشتیێ ژی دامەزراندبوو، لێ بەلێ ل گەل ڤێ یەکێ ھێژ تو ئەنجام نەھاتیە بدەستخستن.
ھەڤدیتنێن داوین ئێن د ناڤبەرا ئه‌مه‌ریكا و تالیبانێ ده د چارچۆڤەیا “بەرانبەری گارانتیا کو خاکا ئەفخانستانێ، نەخاسم ژی ئا د کۆنترۆلا تالیبانێ ده دێ ژ بۆ رێخستنێن تەرۆرێ نەبە ھەرێما ئه‌وله‌هیێ، ئەسکەرێن ئه‌مه‌ریكایێ دێ ب تەمامی ژ ولاتی ڤەکشن” ده تێن مەشاندن.
پشتی کو تالیبانێ کوشتنا ئەسکەرەکی ئه‌مه‌ریكایێ کو ل کابۆلێ د ئێریشەکە چەکدار ده ھاتبوو کوشتن ھلدابوو سەر خوە، سەرۆکێ ئه‌مه‌ریكایێ دۆنالد ترومپ 7ێ ئیلۆنێ بریار ستاندبوو و ھەڤدیتن دابوون راوەستاندن.
